وصل الليل ودخلات لبيتها بعدما مشات ختها مع راجلها وجمعات روينة العشا ومها دخلات تستاراح من عياء النهار .. سدات عليها الباب ومشات لفوق سريرها هزات فوطة صغيرة مسحات بيها وجهها بلطف بعدما نظفاتو ودارت روتينها الليلي لي مازال ماكمل، عزيز عليها تهلى فراسها .. جلسات فكرسي قدام مرايتها وهزات مرطب رطبات وجهها وشفايفها ومشطات حجبانها وشعرها كذلك سرحاتو وتحدرات مهبطاه كامل القدام كاتماصي جلدة راسها شحااال عاد جمعاتو القدام كعكة وخلاتو، رشات عطرها وطفات الضو ودخلات لبلاصتها هازة تيليفونها .. نقصات ليه الضو خوفا على عينيها وبقات مكونيكطية ففيسبوك وواتساب نفس الوقت مجمعة مع افراد عائلتها وصاحبتها الوحيدة وفاء ..
داز شويا دالوقت وهو يجيها ميساج فواتساب من نمرة مجهولة ..
💬سلام!
دخلات ليها تشوف اش دايرين فبروفايل لقاتو خاوي من غير statut لي كايبين ان الكونط جديد ويالاه تصاوب بخمسة دقايق فقط، دخلها شك وعقدات حجبانها وفضولها دفعها تجاوب باش تعرف شكون مسيفط ليها فديك الوقت ..
حنان : وعليكم السلام ورحمة الله!
فالبلاصة طلعو ليها جوج شريطات زرقين دليل على أن المرسل داخل ل conversation وبان ليها كايكتب ..
💬صافا؟
هزات حاجبها وجاوبات ..
حنان : c qui?
💬معجب
حنان : قول ليا شكون معايا بلا بسالة ولا غانبلوكي النمرة
💬والله يلا معاك بصح، أنا واحد المعجب شافك وهبلتيه وباغي يتعرف عليك
حنان : لا اخويا ماكانتعارفش أنا والله يعاون
💬مالك قاصحة همم؟ رخفي الحبل ماتعرفي نعجبك تانا
حنان : سير لعب مع قرانك، مالقيتي مايدار تبرهيش يخ
قبل مايجاوبها بلوكاتو، ومسحات الميساجات كاتسوط معصبة ماكايعجبوهاش بحال هاد البلانات حيت ديما واقعين ليها ففيسبوك ولكن واتساب هادي اول مرة خاصة ان نمرتها عند الناس القراب فقط .. ماكاتعطيها لحتى غريب .. كملات اجموع ديالها مع صاحبتها وعاودات ليها شنو وقع ..
وفاء : واااه؟ ونمرة ماعرفتيهاش؟ كيفاش زعما طاح من سما وقاليك معجب ديك ساع عرفيه غير شكون ماكانش عليك تزربي ماتعرفي يطلع بصح
حنان : ايوا صفات، نحليه الباب باش يدخل يتكسل ليا فالمرح، اوهو اختي نتي عارفاني كي دايرا عندي نيشان وخاطيني دوك بسالات
وفاء : هههه باز ليك ياختي، وشحال قدك تبقاي زامطة راسك هكا؟ راه عندو الحق رخفي الحبل شويا وتعرفي تانتي على شي بوكوص وعيشي لاموغ مع راسك راك كبرتي مابقيتي صغيرة
