أسبوع داز بالحساب .. مادوات معاه ما شافتو .. وباش ماتلاقاهش فاش تخرج فضلات تمشي تكمل العطلة عند ختها وداكشي لي كان .. جلسات عندها ترتاح وبقاو اتصالاتها بسلوى فقط لي ماتقطعوش .. أما هو بقا يتاصل ويسيفط الميساجات العاديين وفالواتساب كذلك وحتى الفيسبوك ماسلمش منو .. عيا يطلب ويزاوگ فيها ولكن كانت باغا تربيه على الكذوب لي كذب عليها وعلاش خبى عليها، جاها انه رجعها دمدومة وبقاو يضحكو عليها، شافها كيفاش كان عقلها ايخرج بالتقلاب على ختو وماقاليها والو .. حزنها ودموعها كلشي داز قدام عينيه بلا مايريح بالها ويقوليها الحقيقة .. فنظرها هي كان هو سبب الموقف المحرج لي تعرضات ليه ولي ترسخ فذاكرتها وعمرها تنساه .. من الاول تواعدو مايخبيو على بعضياتهم والو .. يا الزين يا الخايب يصارحو بيه بعضياتهم .. ولكن هو خلف بالوعد ديالو واخا يكون على قبلها وكيف كايقولو .. "قلقني بصراحتك وماتفرحنيش بكذوبك" ..
اليوم كان آخر نهار فالعطلة وكان خاصها ترجع لدارهم .. تغداو مجموعين فدار ختها وفالعشية جمعات حوايجها ورجعات مع ماماها للدار .. جايبين معاهم عشاتهم باش غير ياكلو وينعسو يرتاحو خاصة ان اليوم التالي عندها عامر كولو وخاصها الراحة باش تقدر تركز فدروسها .. وداكشي لي دارت غير تعشات ودارت روتينها الليلي ودخلات ففراشها، تافقات مع سلوى على الساعة لي يتلاقاو فيها وعمرات الساعة، قرات شوية دالقرآن ونعسات بسلام ..
وفدار وفاء كان الصداع نايض عندهم .. والأم كاتجدب قدامهم .. وفاء جالسة فوق السداري شادة تيليفونها كاتشاطي وتضحك مامسوقاش للضجيج لي كاين .. والأب حتى هو شاعل الأخبار كايتفرج ويسوط بملل نفس الكاسيطة كاتعاود هاد السيمانة كلها، ملها ومل حتى ماليها .. ومنصف شاد قنت تاهو متكي بيدو على ركابيه ووجهو فالارض كايتسناها تسالي هضرتها كيف كل نهار .. طبخات ليه راسو وندماتو على الجلسة لي جالس معاهم، وكون مع موضوعو هو وحنان ماكان يزيد معاهم الدقيقة .. الأم شافتهم عاطيينها النخال وكلها وفاش ملهي زادت شعلات كثر وكثر وصوتها على حتى الجيران سمعوه ..
الأم (بصراخ) : وااااااش أناااا كاااندوييييي ونتوووماااا منخليينييي هااااا؟ دوييييو جااااووبووووني واااش قلت شييي حااااجة دييياااال العييييب؟ دوييي الحاااج ماالك ساااكت
الحاج : اش عندي مانقول؟ راهو قدامك هو مول الري
الأم : يلااا جات علييه هو يا غانبققاااو بلااا حفاااايد يااا غايجيب لينا شي مووصييبة للدااار تخرجهااا منااا وهاااادي لي عمرهاااا تكووووون واخااا يقتلووووني
منصف : وااا الواليدة وااا الوااليدة راه ضرني رااااسي بهاااد الهضرة
الأم : وانا ضرنييي قلبيي ومرااارتي قربااات طرطق ونتااا السباااب سمعتيييني يلا وقعااات ليااا شي حاااجة نتا سباااابي
