#تزوجتها_مراهقه
قروب روايات العنود Beba Pink
《1》
خدت جود وسادتها و غطاها تبي تطلع من الدار ، مراد وقف يشبحلها و هوا مستغرب من تصرفها ..
مراد : هييه .. وين ماشيه انتي ؟
جود بعفويه : ماشيه بنرقد في الدار التانيه ..
مراد : علااش؟؟؟
جود : شنو علاش .. نبي نستاسع في السرير انت حجمك كبير و مش محصله معاك سانتي و اصلا مش شرط نرقدو مع بعضنا ..
مراد فاتح عيونه و مش مصدق عقليتها : من جدك انتي ؟ .. احني متزوجين راه .. و في بداية زواجنا مايجيش هكي ..
جود : ياسلام .. تبيني نخرب نومتي غير عشان انت ترضى .. و بعدين وانت راقد تلوح في دراعك بي تقلها عليا معاد نقدر اني ايوااه ..اهو ليا ايام نرقد جنبك ياسرك توا مش امك اني باش بنرقدك .. يلا تصبح تربح
مراد بخطوات سريعه و بصوت عالي مسكها من شعرها وقال : لااااا زودتيها راك ...............
...................................
نرجعو من البدايه ...
جود عمرها 17 سنه بنت مدلعه و عقلها مراااهق طفولي درجه اولى عايشه مع بوها و امها و عندها اختها جيداء اللي متزوجه من شخص متدين زي "مايعرفو الناس عنه" .. !!
بينما مراد عكس جود في كل شي عمره 33 سنه عااقل و واعر و رازن و جديّ ... بوه متوفي و متحمل مسؤلية امه و خوه عادل اللي عمره 27 سنه, عادل يحب بنت جيرانهم رواسي حب قووي، هي نفس عمره ، يحبها من لما صغار و واعدها بالزواج لكن حالته الماديه الضعيفه خلاته مايقدرش يتزوجها لحد الآن ...
.................................
روح مراد من العمل القى امه في المطبخ اتدير في الغدى.. قرب منها و باسها من راسها ...
مراد : يعطيك الصحه يا امي ..
عزيزه : سلمك يا وليدي .. هيا خش بدل لبين ماجهزت الغدى ..
مراد : وين عادل خوي ..
عزيزه : في الدار .. شكله متكنطي ..خش كلمه ..
مراد : باهي .. توا نشوف خيرا ..
خش مراد لدار خوه القاه مقعمز و حاط يده على راسه و كأنه هموم الدنيا فوق راسه ..
مراد : يا ساتر ياسااتر .. شنو فيه
عادل : جايها عريس يا مراد .. خايف تتزوج و تسيبني ..
مراد : منو ؟ .. رواسي؟ .. باهي هي شنو رايها ..
عادل : هي تبيني اني ..هكي قالتلي ..بس مش مطمن يا مراد .. اني نبيها و انت عارف ..
مراد : باهي انت علاش ماتخطبها .. نمشي معاك و ان شاء الله سنوات و تاخدها و اني نساعدك .. حتى الشقه اللي شريتها اني خودها انت و تزوج فيها و اني عادي ماني مستعجل ع الزواج ..
عادل: لاا عيب شنو تقول انت .. هادي شقتك تعبت عليها باش جمعت حقها .. مايجيش ياراجل ..
مراد : مافي فرق بيننا يا خوي ..و بعدين اني خوك كان ماوقفت معاك منو بيوقف معاك ...
عادل : مستحيل .. مش حلوه في حقي ولا نتسمى راجل كان خديت تعب غيري و تزوجت بيه ... توا نشوف كيف ندير .. مرات انبيع سيارتي مع الفلوس اللي مجمعهم بالك يديرولي حل ..
مراد : حل زي شنو ؟ اذا كان بوها رافض حتى يوافق عليك من غير سكن .. و معاه الحق لانه بنته و يبي يطمن عليها من المرمده ..
عادل : مش عارف .. مش عارف .. اني اللي جمعتهم 20 الف و سيارتي كان بكل تجيبلي 10 .. هما 30 الف مايبنولي حتى حيط ..
مراد : ربي يفرج ياخوي .. وكان من نصيبك حتاخدها لو بعد حين .. هيا نوض توا امك تراجي فينا ع الغدى و حاول تبتسم راهو الام تشقى و تتعب نفسيتها لما تشوف ولادها مضايقين وماعندها كيف تساعدهم ..
عادل : حاضر ياخوي .. حاضر ..
......................................
جود مقعمزه على طاولة المطبخ و تغني وتحرك في يدها في الهوا :من اين أتو ماشكلهم من يعرف سرررهم ...
زينب : اسسسس يابنتي خلاص راسي انفخ ..
جود : هيا مامااا جعااانه ..
زينب : باهي اهو دقيقه و يطيب .. بري جهزي السفره امشي ..
جود : مانعرفش ..
زينب : شنو اللي ماتعرفيش ..
جود : مانعرفش انجهزها ..
زينب : سفره ماتقدري تجهزيها .. ااااخ ياكبدي مسكين متعوس الحظ اللي بياخدك ..
جود ترقص في حواجبها: سعيد الحظ قصدك ..من زيه بياخد جووود ست الحسن و الجمال و الدلال ..
