مراد وقف يضحك و يشبح لجود بنظره معناها "اني هني معاك ماتخافيش" ، نظرة الاب لبنته لما تكون خايفه و ماترتاحش الا و هي مع بوها ..
مراد بصوته الرجولي : يلا .. عشان ماتتأخري عن الحوش اكثر من هكي ..
جود ببتسامه مع خجل : يلا ..
مشى مراد و كانت جود وراه زي الطفله اللي تلحق في بوها وين ما يمشي عشان ماتضيعش منه ، و كان مراد كل شوي يتلفت لجود اذا كانت وراه او لا ..
وصلو قدام السياره ..وقفت جود تشبح للسياره و هي
مرتبكه ..
مراد بحركة اختبار ليها زي أي شاب يختبر في البنت اللي مرتبط بيها ..
مراد فتح باب السياره اللي جنب السائق .. وقعد يشبحلها .. بس جود نزلت راسها و قالت ..
جود : كيف بنركب معاك بروحنا ..
مراد : اني خطيبك ..
جود ضمت فمها للداخل بارتباك : باهي ترا نحاول نتصل بي بابا مرات يرد عليا و يجيني .. و انت اقعد معايا لين يجي ..
مراد لما شاف صدق نيتها في عيونها ابتسم و قال : تمام اتصلي بيه ..
حاولت جود تتصل بي بوها القاته مقفل ..
جود متردده : باهي نتصل بي ماما نستأذن منها ..مرات ترد عليا توا ..
مراد قام حواجبه و كتوفه بمعنى زي ماتبي ..
جود اتصلت بي امها مرتين .. المره الاولى ماردت و المره التانيه ردت ..
جود فرحت : ماما ..
زينب : خيرك جود شنو فيه ..
جود بصوت واطي : ماما ، بابا مايردش عليا و السواق ماقدرش يروح بيا صارلا ظرف .. و توا مراد هني عادي نروح معاه ..
زينب قرنت حواجبها تحاول تفهم بنتها و بعد لحظات تفكير قالت : عادي يابنتي .. روحي معاه خليك عاقله و قعمزي ورا مش قدام ..
جود : ايه اصلا هكي ناويه ..
زينب : تمام .. في امان الله يابنتي ..
جود : سلام ..
حطت جود تليفونها في الشنطه و ابتسمت لمراد و سكرت الباب اللي فتحه مراد .. و فتحت الباب اللي وراه و شافت لي مراد و قالت ..
جود : يلا .. ماما وافقت ..
هذا كله و مراد يشبحلها بتركيز على حركاتها و بترقب على تصرفاتها و كأنها قاعده في اختبار عنده .. اول ماسمعها قالت يلا ابتسم و ركب في كرسيه و بدا في السواقه ...
كانت جود وراه مركزه في تفاصيله و عيونها قلوووب و هايمااات ..مركزه في لحيته و قبضة يده على الدومان و عروقه اللي يبرزو كل مايحرك الدومان يمين ولا يسار .. ساعته الفضيه .. تيشيرته الاسود ..غمازته اللي اول مره تنتبهلها ..و اخر شي دبلته اللي زادتها هيااام و حب ليه ... حب لخطيبها مراد .. حست لما شافت الدبله و كأنها عقد تمليك ليها ..انه هذا الشاب مرتبط بيا اني و ملك مقدس ليا و بس ❤
..........................
خبط باب حوش عيلة مراد فتح عادل الباب القى ولد اخت رواسي جاي و في يده بطاقة .. دعوة ليهم لحضور فرح رواسي و وليد 💔
خدا منه البطاقه و فتحها و قلبه يدق .. اول مافتحها شاف اسمها جنب اسم وليد .. اسمها اللي طول عمره كان يحلم انه بيكون جنب اسمه هوا في دعوة فرحهم .. دعوة الفرح اللي ياما خططولها كيف بتكون و شنو بيكون الكلام اللي مكتوب فيها ...
