تزوجتها_مراهقه

الحلقه الرابع عشر

#تزوجتها_مراهقه

《14》

قروب روايات العنود Beba Pink

سالم مقعمز في مربوعة شقة سوسن بكامل اناقته و عطره اللي يفحفح .. و مقعمزه مقابلته فوزيه ..

سالم : نبي نطلب يد سوسن منك على سنة الله و رسوله .. اني قبل قالتلي سوسن انه بوها متوفي و وحيد و ماعندهاش عمام .. و ما عندي ممن نطلبها الا منك ..
فوزيه : انت شاب كويس و مع انك متزوج بس حتى بنتي ارمله .. و بما انك تبيها و هي تبيك اني موافقه ..

في اللحظات هادي خشت سوسن بفستان احمر و مكياج كامل و عطرها القوي زي عادتها .. قدمتله القهوه و عيونها في عيونه.. سالم كان فرحان و الدنيا مش سايعاته و مش مصدق انه اللي يبيه صار ..

حطت السفره ع الطاوله و قعمزت سوسن قريب منه ..
سالم : شنو طلباتك يا اميرتي ..
وقفت فوزيه استأذنت منهم و طلعت و خلتهم بروحهم ..

سوسن قامت يد سالم و حطتها عليها و قعدت تلعب بساعته اللي لابسها ..
سالم الحركه هادي خلاته مستعد يطلق حتى جيداء لو طلبت منه يطلقها ..
سوسن : امممم .. طلبي الاول نبي شقه في نفس العماره ماما ساكنه بروحها و نبيش نبعد عليها ..
سالم بعيون هايمه : الشقه في الطابق اللي فوقنا فاضيه حنأجرها لينا ..
سوسن : كويس .. مش حنقولك نبي فرح كبير او طلبات كبيره .. بس نبي مقدم و مؤخر نفس اللي دفعتهم لي جيداء ..
سكت سالم شوي و لانه حالته ميسوره وافق ..
سالم : حاضر كل شي تبيه حاضر .. ممكن طلب
سوسن : شنو ..
سالم : جيداء مش حتعرف بزواجنا ..
سوسن : شنو ؟؟؟
سالم : مؤقتا بسس .. هي و عيلتي مش حيعرفو و بعدها اني حنصارحهم ..
سوسن قالت في داخلها : قصدك لين اني نقولها ليهم و بطريقتي 🙂
سالم : اي طلبات تانيه ..
سوسن : ايه ..
سالم : آمريني ..
سوسن : نبي نبوس يدك ..يا حلالي و تاج راسي ..

قامت يد سالم و باستها .. و سالم زااد تعلق بيها و قلبه ملهوف عليها ..
تمت الخطبه و طلع سالم لمحلات الذهب عشان يشريلها الدبله و تاكم معاها ...
................................
بعد ساعات طويله كانت الساعه 2 ليل بعد ما تمت عمليةمحمد و نجحت .. طلع الدكتور خبرهم فرحت ساميه و حضنت راجلها و قعدو يبكوو ..

قعد عادل يشبحلهم و يبكي و حاس بفرحه انه قدر يدير شي كويس فحياته .. حس روحه انه انقذ روح و دخل الفرحه على عيله بكاملها .. قرب منه عمر و حضنه و قعد يبكي معاه ...
عمر : جميلك هذا عمري ما ننساه لك..
عادل : مافيها جميل يا عمر .. بالعكس اني فرحان لانه ربي سخرني انفك كربة غيري هدا دليل انه ربي بيفك كربتي ..
عمر : بإذن الله .. والله انت راجل مقنط لو كنت نا مكان اللي تبي بنته راه عطيتها لك بدبشها .. الفلوس تمشي و اتجي بس الرجاله كان مشت معاش ترجع ..
عادل : تسلم بارك الله فيك شهاده تنحط ع الراس ..
عمر : هذا كله و ماقلنا شي ..
عادل : تسلم تسلم .. هذا واجبي ..
................................
جي الصبح و فاقت جود من نومها على صوت امها تنوض فيها ..
جود : مامااا علاش تنوضي فيااا .. خلاص مدرسه و تمت..
زينب : انتي غير افتحي عيونك و شوفي ..
فتحت جود عيونها القت بوكس فيه هدايا و شكاليط..