#تزوجتها_مراهقه
《11》
قروب روايات العنود Beba Pink
طلعت جود من دارها و هي متضايقه ..
زينب : خيرك ..
جود : ناقصاتني هلبا حاجات نبي نشريهم قبل الفرح ..
زينب : الفلوس و عندك ..علاش ماشريتي ..
جود : ماعنديش من يطلع معاي .. انتي ماتحبيش السوق و صاحباتي كلهم عطيتهم بلوك بعد انخطبت ياريتني صبرت و حظرتهم بعد الفرح ..
زينب : ربي يهديك يابنتي ... باهي اختك جيداء .. كلميها تطلع معاك...
جود : يا مامااا اني بنشري ارواب و مكياج و عطور وهما كلهم جيداء عندها ممنوعات .. رغم اني بنشريهم لراجلي مش للشارع .. مش عارفه علاش افكارها هكي من دون خوات الناس ...
زينب : الله غالب راجلها فاهم الدين غلط .. رغم انه صادق في بعض الحاجات بس فيه حاجات متشدد فيهم حتى ربي ما منعهم ..
جود : المهم ياماما نبي نطلع ..
زينب : تو اني نكلمهالك ..
طلعت زينب تليفونها و ضربت على رقم جيداء .. قعدت فتره وهي تقنع فيها تمشي مع اختها ليييين وافقت .. فرحت جود و مشت تجري تغير في حوايجها قبل ماجيداء تغير رايهاا .. و نست جود تاخد اذن من مراد زي ما وصاهاا!
.........................
رواسي زي كل يوم تبكي و خلاص و تحاول ترن على عادل من رقم اختها بس تلقى فيه مقفل .. و كل ما يجي بوها يلقاها تبكي يضربها لين جلدها تعود ع الضرب ..
ناديه : خلاص يا رواسي اسكتي و اقتنعي بالامر الواقع .. وليد نصيبك و الاسبوع الجاي فرحك .. الله غالب ربي مش كاتبلك عادل ..
رواسي و هي تبكي : مانبيه .. مانبي وليد .. نبي عادل .. انتي مش عارفه شنو معناها انك تتزوجي بحد ماتبيه .. بتوهبي نفسك و جسمك و حياتك كلها لشخص انتي ماتحبيه و في قلبك حد تااني .. اااه يا ناديه .. ربي ما يدوقك احساسي .. اني بنمووووت ..كان ربي بس يحن عليا و يقبض رووحي .. معاد نبي نعيش ..خلااص ..
حضنت ناديه اختها و قعدت تبكي معااها ..
احيانا نتمنو الموت بس عشاان شي نبوه ما حصلناه .. او عشان لفتره حسينا انه الحياة مسكره ابوابها علينا و انه الدنيا الواااسعه ضاقت بينا ..
بس مانعرفوش ربي شنو مخبيلنا في الغيب .. يمكن حياه اجمل يمكن استجابه لدعواتنا .. يمكن تعويض ماتخيلناه حتى في احلامنا ..
الصبر و بس لانه الله ديما مع الصابرين ❤
............................
كان مراد طالع بسيارته حاصل في زحمة الشوارع و خلوقه ضايقات من الزحمه ...
في الوقت اللي كانت فيه جود طالعه و لابسه قميص طويل و جينز و وشاح وردي و كل شوي تطلع خصله من شعرها و تدخلها بسرعه ... كانت معاها جيداء تمشي بكل عصبيه لانها ما تحبش تطلع مع جود ..الفرق في العقليه و العمر و التفكير بينهم مسبب فجوه بيناتهم ..
و فجأه جود وقفت و كأنها تذكرت حاجه ..
جيداء : خيرك وقفتي في الشارع ..
جود : ححي نسيت ماقلتش لمراد اني طالعه ..
جيداء : و هوا منو عشان تاخدي منه الاذن .. قاري فاتحتك ؟؟
جود : لا طبعا .. بس هوا منبه عليا ..
جيداء : يلا يلا تحركي بلا دوه فاضيه .. ماليشي علاقه بيك ... طالعه باذن بوك انتي ...
جود : نعرف .. بس حيزعل .. و مرات يعاركني ..انتي ماتعرفيش مراد ..عصبي هلبا ..
جيداء : عصبي لما يتزوجك مش توا ..
جود : اوووه و انتي يتزوجك يتزوجك .. هوا خطيبي و طلب مني ناخد اذنه و اني وافقت و بما اني وافقت خلاص مفروض طلبت منه الاذن .. بعدين اني ناخد بخاطره لما نسمع كلامه ..
جيداء : تفااهه ..
جود في داخلها : مش عارفه كيف متحملها سالم ..
جيداء : توا بتتحركي ولا نمشي نروح لحوشنا ..
جود : خلاص نكملو ..هوا اصلا حوشنا قعد بعيد ..
جيداء : يلا ..
جود تلفتت للمحلات المقابله و صفقت باعجاب ..😍
جيداء: خيرك فضحتينا ..
جود :lsg .. فيه كل الارواب اللي نبيها ..
جيداء : محل العري هدا مابنخشلا ..
جود : لا بتخشي .. و دوري حتى انتي بالك تلقي رويب تلبسيه لسلومه ههههههه
جيداء : قلة ادب ..
جود : بموووت اناا في قلة الادب دي هههههه
