#تزوجتها_مراهقه
《21》
الأخيره
قروب روايات العنود Beba Pink
بعد اسبوعين قرر مسعود يمشي لعند عادل يهدرز عليه و يرطب في الجو معاه ..
اول ماخبط الباب فتحله عادل ...
عادل شبحله من فوق للوطه : تفضل ؟؟
مسعود : كيف حالك يا عادل ..
عادل يرد فوق من نفسه :الحمدلله ..
مسعود : اني عارف انك واخد على خاطرك مني .. و ..
عادل قاطعه : كنت .. بس حاليا معادش هامني ولا نشبحلك اصلا ..
مسعود نزل راسه : اني اسف يا ولدي و حقك عليا ..
عادل قعد يشبحله بحقد .. شوي و خش و سكر الباب في وجهه و قعد مسعود واقف .. شاف للباب و نزل راسه و مشى رجع لحوشه ..
خش عادل لأمه و حكالها شنو صار ..
عزيزه : مايتعبش روحه .. مش حناخدو بنته ..
عادل : بتم عدتها و بناخدها .. غير قاعد نقرص في ودن بوها .. اني و رواسي تعدبنا هلباا و جي الوقت اللي بنرتاحو فيه ..
عزيزه : بتكسر كلمتي ..
عادل : انتي امي و الام تفرح لما تلقى ولدها مرتاح.. و اني اخترت .. و راحتي مع رواسي ..
طلع عادل و خلا امه ياكل فيها قلبها على ولدها و تصرفاته اللي ما يعجبوهاش..
.......................................
حطت جود سفرة الشاهي و المكسرات قدام مراد ..
مراد : يلا تعالي قعمزي هني جنبي .. قريب يبدا الفيلم ..
جود بتعب : اهو جيت ..
قعمزت جود جنبه و حطت راسها على كتفه ..
مراد : خيرك جودتي .. حسيتك تعبانه ..
جود : حاسه كبدي في رقبتي ..
مراد : ههههه كيف هادي ..
جود : مش عارفه .. بس طول الوقت تعبانه و نبي نرقد ..
قطع كلامهم صوت الجرس .. فتح مراد القاها زينب و نبيل جاينهم زياره ...
خشت سلمت على جود و قعمزت هي و مراد .. جي نبيل سيب يد زينب و قعمز على جود .. حضناته جود و قعدت تبوس فيه من خدوده و تدغدغ فيه ..
مراد قعد يشبحلها و حاس بالغيره من نبيل .. عيونه مفنصات فيها يبيها تشبح فيه و تبطل بس هي ما انتبهتله..
مراد القى سبله : جوود .. خشي للمطبخ ضيفي امك..
زينب : لا عادي مش غريبه اني ..
جود : لالا توا انجيبلك عصير و حاجات ..
ناضت جود و كان نبيل بيلحقها بس شده مراد من يده ..
مراد : نبيييل .. صف كم تقرا ..
نبيل : السنه هادي صف تاني ..
مراد : به كويس شاطر .. هي قعمز جنب حناك ..
ناض مراد و لحق جود للمطبخ .. و كرها من يدها و لصقها ع الحيط ..
جود بصوت واطي : خيييرك .. ماما هني ..
مراد قرب منها و بصوت واطي : الحضن هدا ليا اني ..
قرب منها اكتر و باسها على خدها : و الخدود هما ماحد يقربهم غيري ...تسمعي فياا..
جود : ههههه مجنوون ..
مراد : كنت عاقل انتي اللي خليتيني زيك ..
جود : ههههه باهي بعععد .. تو ماما تخش ..
مراد بعد عنها : اساسا اني طالع توا .. نخليك تاخدي راحتك مع امك .. يلا سلام ..
جود : سلام حبيبي ..
طلع مراد .. و طلعت جود الضيافه لامها ... هدرزو مع بعضهم و حكتلها شنو تحس الايام هيا من دوخه و نووم و تعب ..
زينب : فيه عياده قريبه من هني .. نوضي نمشولها ديري تحليل حمل ..
جود : 😲.. حمل شنو ياماما ..
زينب : شنو حمل شنوو .. طبيعي تزوجتي بتحملي ..
جود : ححي .. بس مزال مانبي توا ..
زينب : نوضي نوضي ..اتصلي بزوجك قوليلا قبل ما نطلعو..
جود سكتت تفكر شوي : باهي حنقوله بنمشي مع ماما للمحل .. باش كان طلعت حامل انديرها مفاجأه ليه .. لاني لو قلتلا ماشيه للعياده بيجي و بيخاف علياا ..
زينب : باهي غير بسرعه قبل ما يجي بوك يروح بيا ..
