Biography

1- الفاتح

"ومات الممثلون جميعا"

طول عمرنا بنهزر بالجملة دى ، بس عمرك سألت إن ممكن تكون الجملة دى حقيقية ؟ طب ايه هى قصة الفيلم اللى كل الممثلين فيه ماتوا ؟ او الفيلم اللعنة زى ما أطلقت عليه هوليوود ؟

تعالى يا سيدى أقولك..
تعالى نرجع كام سنة ورا كداا فى سنة 1956 المخرج والممثل "ديل بول" قرر إخراج فيلم تاريخي وهو عن قصة حياة ملك المغول "جنكيز خان" .
طب مين ياسيدى اللى هيمثل جنكيز خان ؟ قالك نجيب الممثل اللى اترشح للأوسكار وواكل مع الناس والبنات بتحبه وهو "جون واين" وهو أكتر ممثل اشتهر بأدائه لأدوار رعاة البقر فى فترة الخمسينيات ، وقالك نجيب مزة الفيلم الممثلة العالمية "سوزان هايوارد"

تصوير الفيلم مكنش سهل أبدا ، المخرج كان عايز واقعية فى العمل فأخد كل طاقم العمل والكاميرات وكل حجاته وراح عسكر فى منطقة صحراوية بعيدة فى منطقة سانت جورج فى ولاية يوتاه الأمريكية .

والمنطقة دى على بعد 220 كم كان موجود فيها قاعدة نيفادا العسكرية واللى الجيش فى الوقت دا كان بيجرب تجارب نووية خطيرة أسمها "أب شوت نوثول" .
الهوا اللى كان بييجي من ناحية القاعدة العسكرية كان دايما بيبقي محمل بالاشعاعات الذرية الخطيرة طبعا
المخرج أكيد كان عارف عن التجارب دى و راح القاعدة وسأل هل فيه خطورة علينا ؟ قالوله كمل فيلمك يا كبير ومحدش هيحصله حاجه
سألهم تانى .. يا جماعة متخوفونيش على نفسي ، قالوله عيب عليك يا مخرج مفيش حاجه دى كلها اشعاعات ذرية مالك خرع ليه ؟
فكمل تصوير الفيلم براحة بعد مالحكومة طمنته طبعا ان كل حاجه هتبقي تمام .

بس بعد كاااام شهر ، المخرج ، الفأر كان لسه بيلعب فى حجره بردو راح عمل ايه ؟ تعالى اقولك..
راح ناقل كام طن كدا من الرمال بتاعه الموقع اللى كانوا بيصوروا عنده لهوليوود عشان يكمل التصوير

قالك أنا هاخد كاميراتى و رملى وحجاتى وهروح عند أمى أحسن حد يجراله حاجه وأنا خايف عليكوا يولاد

الفيلم خلص واتعرض فى صالات السينما فى نهايات سنة 1956 ، الناس مسابوش الفيلم فى حاله وسخروا منه
والنقاد مكنش قدامهم شغلانة غير فيلم "الفاتح"، قالولك ايه بقا *الفيلم سئ للغاية ومريع لدرجة كبيرة حتى أنى لم أكمل النصف ساعة الأولى لركاكة القصة والأداء والحوار* وقالوا أن المخرج يروح يبيع ترمس عالكورنيش أحسن .
والجمهور كمان مقدرش يستحمل الفيلم وكانوا بيخرجوا من السينما وهما مدايقين وغضبانين على الفلوس اللى دفعوها فى تذاكر الفيلم دا

بس الفيلم نجح فى أنه يدخل موسوعة جينيس كأسوء فيلم فى تاريخ هوليوود

أستنى..الحزن لسه مجاش وقته

كل طاقم العمل كانوا بيشتكوا بوجع وآلام فى جسمهم وبعد فترة أكتشف 91 شخص من طاقم العمل أنهم أصيبوا بالسرطان .
بعد سبع سنين من تصوير الفيلم دا والسبب كان ايه ؟ كان استنشاق الهواء المحمل بالاشعاعات الذرية .
أول اللى اتصابوا كان المخرج نفسه اللى مات نتيجة السرطان و بعده كان الممثل "بيدرو ارمينداريز" واللى اتصاب بالسرطان سنة 1963 ومتحملش خبر المرض فضرب نفسه بالرصاص ومات فى نفس السنة .
نجم الأوسكار "جون واين" أصيب بالسرطان فى الرئة بردو لكنه عاش ومات فى سنة 1979 بسبب سرطان فى المعدة المرة دى
*بيغير عشان متزهقوش😂*
مزة الفيلم *سوزان هايوارد* بردو ماتت بسرطان الرئة عام 1975

أخر المتوفيين بالفيلم من طاقم العمل كان سنة 1991 .
استنى متمشيش... الاصابات مكنتش فى طاقم العمل بس دى كانت هيصة..
كان فى ناس بتزور طاقم العمل فى وقت التصوير عشان يتفرجوا منهم "مايكل واين" الشقيق الأصغر لبطل الأوسكار "جون واين" اللى أصيب بسرطان الجلد
وكمان يا حبة عينى ابن بطلة الفيلم "سوزان هايوارد" اللى كان عنده 8 سنين أصيب بسرطان الفم
ومنتج الفيلم أصيب بالاكتئاب بسبب كل اللى حصل دا راح أشترى كل نسخ الفيلم ومنع الفيلم من العرض لفترة طويلة جدا *أنت السبب يا حاج*
أحوال المنتج ساءت وملامحه اتغيرت وكان كل يوم من سئ لأسوء وكان دايما حاسس بالذنب وتأنيب الضمير فمات وهو وحيد ومكتئب
معظم الناس قالت أن دى صدفة . وبعض الناس قالت بردو أنها لعنة أصابتهم عشان تعدوا على منطقة سانت جورج نتيجة لوجود كنيسة سانت جورج ودى كنيسة ملعونة ومليئة بالأشباح ؟
أنت رأيك ايه ؟؟؟؟

..
..
..

هولااااا
زى مانتو شايفين دا كتاب عن حجات غريبة حصلت زمان
لو انتو بتحبوا المواضيع دى فوت وكومنت وادعمونى ☺♥