Biography

8- عائلة الجواسيس (السقوط فى بئر سبع)

*حمدالله على السلامة يا مدام دينا*

الحكاية كلها خلصت بالجملة دى..بس يا ترى بدأت منين؟؟

معروف عن الجواسيس أن نو ضمير ، نو انتماء ، عشان يعملوا كجواسيس لازم تكون بلدهم أذتهم فى حاجه..طب تعالى اقولك حكاية العيلة الوسخه دى

فى سنة 1934 فى المنيا اتولدت إنشراح على مرسي ، وكبرت وكملت تعليمها لحد الاعدادية ، بعد مانجحت راحت مع عيلتها للقاهرة عشان تحضر فرح حد من قرايبهم ، وهناك قابلت إبراهيم سعيد شاهين مواليد 1929 مصرى من أصول فلسطينية وكان موظف حسابات .

حبوا بعض وإبراهيم قرى أنها هتكون شريكة حياته اللى بيدور عليها من زمان ويا دبلة الخطوبة عقبالنا كلنا وكدا.

راح المنيا عشان يتقدملها بس عيلتها كانت رافضة بعد المسافة بين المنيا والقاهرة بس انشراح اتمسكت بيه تقولش عمرو دياب..المهم اتجوزوا

سنة 1966 ابراهيم اتسجن تلات شهور فى قضية رشوة وبعد ما خرج اتنقل العريش وبعد كام شهر .. قبل النكسة قال لمراته انا شامم ريحة حرب تعالى نودى العيال لجدتهم فى القاهرة وفعلا بعتوهم هناك.

جت نكسة 67 واسرائيل احتلت سيناء وسدت كل الطرق لسفر ابراهيم وانشراح لعيالهم فى القاهرة وأمل انهم يشوفوا عيالهم انقطع خالص ، وابراهيم قعد فى البيت من غير شغل ولا فلوس زيه زى أى حد كان فى العريش وقت النكسة.

فى الوقت دا الموساد *المخابرات الاسرائيلية* كان شغالة على نار فى تجنيد الناس والعملاء اللى بيقعوا فى الفخ بسبب الحصار والفقر.

ابراهيم زهق و راح لمكتب الحاكم العسكرى الاسرائيلى بيطلب منه تصريح للسفر للقاهرة ، فأدولوا الطرشة كام مرة لحد ما قابل ضابط إسرائيلى اسمه *يوكانا أبو نعيم* وقاله متخافش أنا هبص فى حوار التصريح دا قاله بجد والنبى يا كابتن قاله عيب عليك إسرائيل لما بتوفى بتنفذ ، وقعدوا مع بعض مدة مش قصيرة كام ساعة كدا شربوا فيها عشروميت كوباية قهوة وهما بيتكلموا ، وبعد ماخلصوا أبو نعيم دا أشفق على حالة ابراهيم فأداله شوال طحين وكام كيس شاى وسكر.

روح البيت وهو فرحان جدا وسعيد

فى يوم أتفاجأ انه مطلوب فى مكتب أبو نعيم ولما راح قاله بص يا كبير الحاكم العسكرى وافق أنه يديك التصريح وقاله مش بس كدا دا بوشكاش محفوظ بيضحى النهارده وهيدى مراتك التصريح هى كمان بس بشرط.

قاله ايه هو الشرط..قال أنك تقولى أسعار الفاكهة والخضار فى الأسواق فى القاهرة والحالة الاقتصادية هناك كمان