Biography

9- سليمان نور

قصة النهارده صغيورة وكيوت كدا عشان ملحقتش ادور على حجات تانية

سليمان نور كان شخص مصرى عادى ، او دا اللى كان بيظهره للناس لأنه كان مجند من الموساد
جندوه ودربوه ونزلوه القاهرة عشان يشوف شغله هناك ويجند ناس مصريين

بس الحلو اللى فى الحوار أن المخابرات المصرية كانت مرقباه وشامة خبر ان هو بيجند ناس ، يقبضوا عليه بقا؟؟

قالولك لا سيبوه ينبسط ، احنا هنديله معلومات غلط من غير ماهو يعرف فالموساد ينبسط واحنا نتفرج عليهم وننبسط احنا كمان😂

فى يوم الموساد اكتشفت ان المخابرات عارفة بشأن سليمان فقالوله يا مغفل انت بتهبب ايه عندك دا المخابرات المصرية عارفاك وانك اتكشفت

فقرر ينفد بجلده فلم هدومه وبعت لضابط الموساد جواب ان هو هيهرب لأنه انكشف.

فأخد بعضه وهرب من الحدود المصرية لاسرائيل واستقر هناك.

وحب بنت يهودية فقرر يغير ديانته لليهودية هو كمان.

فالموساد غيروله اسمه من سليمان نور لشلومو نور وقالوله متزعلش يا حبيبى ، ايه يعنى لما المخابرات المصرية قفشتك؟؟ لكل جاسوس قفشة😂

وقالوله احنا هنطلعك مهام لأوروبا تتجسس ضد دول أوروبية وهنعملك كمان شركة سياحة عشان تغطى على شغلك هناك.

لحد هنا تمام صح...كل دا مقدمة

مسابقة ملكة جمال العالم فى روما سنة 1998 كان نفس الوقت دا سليمان كان طالع فى مهمة تبع الموساد فى روما

يا محاسن الصدف..

اتعرف سليمان على بنت اسمها لينور..دى ملكة جمال اسرائيل وكانت من ضمن المتسابقين فى مسابقة ملكة جمال العالم ، كانت اسرائلية من أصول مغربية يهودية

سليمان قالها أيعقل ؟ أيعقل نكون انا وانتى يهودين اسرائليين زى بعض وأسيبك تتمرمطى وأنا عندى شركة سياحة وسفريات وملكيش دعوة انتى وانا هضبطلك الدنيا ، أنتى متعرفيش الاسرائليين بيعملوا ايه مع بعض فى الغربة ولا ايه؟؟

الكلام اللى جاى دا بقا على لسانها هى فى لقاء تليفزيونى

*بتقول انها كانت قاعدة بتتمرن على حفلة التتويج وهو كان هناك وشرب كتير وسكر وبعدين قابلها وأصر انه يوصلها بعربيته للمطار ، قالتله لا ومفيش داعي تتعب نفسك والكلام دا ، قالها هو ايه اللى لا انتى متعرفيش الاسرائليين بيعملوا ايه مع بعض فى الغربة ولا ايه؟؟ هوصلك يعنى هوصلك ، وخدها رماها فى العربية

وبعدين خدها فى مكان مهجور كله غابات وطلع سكينة وحطها على رقبتها ، قالتله انت بتعمل ايه..قالها هوريكي الاسرائليين بيعملوا ايه مع بعض فى الغربة*

بتقول ان بعد جريمة الاغتصاب ماحصلت يعنى ، قالها ياساتر يارب هو ايه اللى حصل تقريبا انا مكنتش فى وعيي!؟ ااه انا كنت سكران معلش سامحينى بقا اشطااا؟؟

وطلع بالعربية ، قالتله انت رايح فين انا عايزة انزل ، قالها هوصلك ، انتى عايزانى انزلك هنا حد يخطفك يغتصبك ولا حاجه؟؟
حد قالك انى راجل مش تمام

البنت راحت رفعت عليه قضية فى الشرطة الايطالية واتهمته باغتصابها وحكت تفاصيل الحادثة ، جابوه وحققوا معاه

قالها اخص عليكى..يعنى انا أوصلك تقومى تبلغي عنى

قالوله يعنى نفهم من كدا انك معملتش كدا ؟ قالهم طبعا بنكر

قالوله اشطا احنا مصدقينك ، يلا براءة ومفيش أدلة كفاية

رجع إسرائيل لقي فى بلاغ متقدم ضده باغتصاب ملكة جمال اسرائيل
والموضوع بقا قضية رأى عام لأن لينور كانت واخدة مرتين سفيرة النوايا الحسنة

والحكومة الاسرائلية قدرت تجيب أدلة..كاميرا كانت فى عمارة قريبة من مكان الحادثة صورت اللى حصل.
ولقوا شوية أدلة فى قلب العربية يعنى من الاخر القضية لبسته واتحكم عليه ب16 سنة سجن

القاضي قاله يابنى لو اعترفت هنخفف العقاب ، قالهم لا انا معملتش حاجه

قالوله هتأخد 16 سنة ، قالهم ماشي هاتهم بس انا بردو معملتش حاجه

وفعلا اتحبس

بعد 16 سنة خرج واتعمل معاه لقاء فى التليفزيون

قالوله شلومو نور الانسان يقول ايه لشلومو نور المغتصب؟
قالهم الموضوع دا بيدايقنى خلااص

قالوله طب ازاى كان بيتم معاملتك فى السجن؟
قالهم والموضوع دا بيعصبنى خلااص

قالوله طب انت ندمان
قالوله لااا انا خلصت مدتى باحترام وخرجت ومش هتكلم فى الموضوع دا.

وبدلا ما سليمان نور يتحبس فى مصر عشان خاين ، بقي شلومو نور واتحبس فى اسرائيل عشان مغتصب

ايه رأيكوا؟؟