The everlasting memories of love ( Sinhala Romance)

මටත් තිබුණා ප්‍රේමයක් Chapter 30- The everlasting memories of love

ආදරවන්තයින්ගේ දිනයේ හවස් වරුවේ හෙමින් සීරුවේ සුදානම් වුණ මම රතු පැහැති දිගු ගවුමකින් සැරසුණා.

"‍ අක්කි අපි පොඩි මේකප් එකකුත් දාමුකෝ?"‍රනෝලි නංගිත් සනෝලි නංගිත් මගේ කාමරයට වෙලා කාලෙකට පස්සේ මාව හැඩ කලා.

"‍ ඇති යන්තම් මෙහෙමවත් එළියට බහිනවා.... මෙච්චර ලස්සනක් ගෙයි ඇතුලේ නිකන් නාකි වෙන්න දෙන්න එපා අක්කී...."‍

"‍ ඔන්න ඉතිං ඔයාලත් පටන් ගත්තද මට බණ කියන්න ? මම මේ ගමන යන්නේ ඒන්ජල් අක්කාගේ ඉල්ලීම අහක දාන්න බැරි නිසා.... ඉස්සර මටයි අයියටයි බෑ නොකියා උදව් කරපු නිසා...අනික මම කවද්ද ගෙදරට නාකි වුණේ ? මම මගේ පාඩුවේ වැඩක් පලක් කරගෙන අපූරුවට ඉන්නවා නේ "‍

"‍ හරි හරි... කෝ ඔය කට වහගන්න ලිප්ස්ටික් එක ගාන්න..... අක්කිට මේ රෙඞ් කලර් එක නම් නියමෙට ගැලපෙනවා..... රෝස මලක් වගේ....."‍

"‍ හ්ම්ම්.... මගේ ලස්සනින් දැන් වැඩක් නෑ නේ.... ඒක දකින්න ඕනේ කෙනා......"‍ ඒ වචන සම්පූර්ණ කරන්නට මත්තෙන් මගේ ඉකිය ඉස්සර වුණා.

"‍ අනේ අක්කී.... ඔන්න ඉතිං කඳුළු පුරෝගත්තා.... අමාරුවෙන් දාපු මේකප් එක දිය කරන්නද හදන්නේ.... මේ ටිෂූ එකෙන් ඉක්මනට ඇස් පිහදාගන්න...."‍

"‍ අන්න ඒන්ජල් අක්කත් ආවද කොහෙද.... යමු පල්ලෙහාට...."‍නංගිලා එක්ක පඩිපෙල් බසින්නට සූදානම් වෙද්දීම ඒන්ජල් අක්කා දොරකඩ අසලින් මතු වෙලා මා දිහා බලාගෙන හිටියේ පිරුණු සිනහවකින්.

"‍ සේනා... අම්මෝ ඇති යාන්තම් අද ලස්සනට ඇඳලා.... මම බයේ උන්නේ.....මළගමකට වගේ ඇඳගෙන එයි කියලා....ඉක්මණට යමු දැනටමත් පරක්කුයි..."‍එදා මම ගෙදර අයට සමු දීලා ඒන්ජල් අක්කා එක්ක කොළඹ සුපිරි හෝටලයට යන්න පිටත් වුණා.

"‍ අහන්නත් බැරි වුණා.... මොකද්ද හොටෙල් එකේ නම ? මම දන්න තැනක් ද ? "‍