سر نوفمبر ( روايات ليبية )

حلقة 5🔥

#سر_نوفمبر
الحلـقة 5
الكاتبة : Mariam Ali

عقد مجدي حواجبه وقاللها بتعب : الله يسلمك ، لكن من انتِ ؟
ضحكت رهف وقالت : حتى وانت مداير حادث تتسهوك
مجدي بجدية : ما نتسهوكش يا بنت الناس مني انتِ ما نعرفكش ؟
زالت ابتسامه رهف لما شافت الجدية علي وجهه وتلفتت للدكتور يلي كيف خش وقالت بحواجب معقوده : دكتور ، مش متفكرني !
عقد حواجبه الدكتور بإستغراب بدوره وقال : كيف ؟
وقرّب من مجدي فناضت رهف من السرير حتى تخليله مجال فقال الدكتور بعد ما اشّر علي رهف  : ياحاج ، منو هادي ؟
مجدي شاف لرهف ثواني وشاف للدكتور وقال : مانعرفهاش !
اشر الدكتور علي زهرة يلي واقفة مكانها ومصدومه وقال : وهادي ؟
مجدي : زهرة مرتي
ابتسمت زهرة بأمل بينما تعبو عيون رهف بالدموع
نزل الدكتور ايده وشبحله وقال : قداش عندك صغار ؟
مجدي سكت ثواني وبعدها قال بحزن : ربك ما رزقش
شبحو رهف وزهرة لبعض بصدمة
وطلعت رهف بسرعة من الغرفة بينما لحقتها زهرة
وقفت لجين يلي كانت متكية ع الحيط تراجي فيهم وانصدمت لما شافت دموع رهف وقالت : خيركم شن صاير
وتلوحت رهف في حضن اختها وهي تبكي
ولجين مصدومة : شن فيه شن صاير ؟
زهرة وهي تمسح ع ظهر رهف : بوك فقد الداكرة
نزلت الكلمة علي رهف زي الصاعقة وقالت : شنو ؟
طلقتها رهف ومسحت دموعها وقالت  : ما يتفكرش  فينا !
لمح حازم يلي كان طالع حمام الرجال المركون جهة الصالة حركة مش طبيعية ووقف عليهم وقال بأستغراب : شن فيه
شافتله زهرة بحزن وقالت : مجدي فقد الداكرة شكله
عقد حازم حواجبه وقال : كيف فقد الداكرة وين الدكتور ؟
زهرة : معاه في الحجرة
خش حازم للغرفة بدون استئذان
بينما قعدو البنات يراجو البرا
وبعد دقايق طلع حازم وقال : قعمزو في كراسي صالة الانتظار ، بيصوروه وبيديروله شوية فحوصات باش يتأكدو
وفعلاً اتجهو للكراسي وقعمزو
مرو الثواني كأنهم دقايق ، ودقائيق كأنهم ساعات ، والساعات كأنهم سنين
لابين طلع الدكتور ونادى ع زهرة وحازم وعزمهم لمكتبه
فلحقتهم رهف الفضولية بعد ما فشلت لجين في ردعها
قعمزو الاثنين مقابل مكتب الدكتور بينما وقفت رهف بجنب كنبة امها وهي شادة فيها
الدكتور : بعد الصور والفحوصات تبينلها ان مجدي مصاب بضربة في الفص الصدغي والي هو مسؤول علي الذاكرة ، وطبعاً فقدان الذاكرة يعتمد علي مدى شدة الاصابة ، وعمر المريض ، ومدة الغيبوبة ، وحني هكي عندنا نقطين في صالحنا !
وكمل كلامه وهو يعد علي صبعيه : اولهم ان الاصابة مش شديدة هلبا ، ثانيهم مدة الغيبوبة كانت اقل من 48 ساعة 
رهف بأمل : يعني دكتور فيه امل انه يشفى ؟
الدكتور شبح لرهف وقال : ايه في امل
ابتسمت زهرة وشافت لبنتها بينمت سأل حازم : فيه ادوية معينة تساعد علي الشفاء ؟
الدكتور هز راسه وقال : الذاكرة ترجع تدريجياً من تلقاء نفسها ، لكن فيه ادوية تساعد في سرعة الشفاء زي نتروبيل يلي ح نوصفهوله اني
رهف بحزن : قداش تبي الذاكرة باش ترجع ؟
الدكتور : تبدا الذاكرة تتماثل للشفاء من تلاته شهور الى سنة ، يعني بعد تلاته شهور يبدا المريض يسترجع في شوية ذكريات وبعد سنة يكون استرجعهم اغلبهم
رهف عقدت حواجبها : اغلبهم ؟
الدكتور : اغلب حالات فقدان الداكرة يسترجعو في اغلب الدكريات بينما تقعد فيه فترة زمنية امستحت نهائي من دماغاتهم !