الصغيرة والصعيدي

طمع

مساء في غرفة رغد كانت تجلس علي السرير مع الأطفال تلاعبهم عندما سمعت طرق علي الباب فأذنت للطارق بالدخول .

دخل فارس والذي كان يحمل الكثير من الالعاب وذهب باتجاههم ووضع الألعاب علي السرير وجلس بجانبهم فكان مقابلاً لرغد .

اخذ جاد يفتح الحقائب ويفرغ الالعاب :- دي ليا يا بابا .

فارس :- ايوه يا حبيب بابا ليك انت واخوك .
ثم امسك بلعبة ومد يده بها لمالك :- دي ليك يا مالك مش انت بتحب سبيدر مان .

نظر مالك إلي أمه فأشارت إليه بالايجاب فتقدم منه وجلس علي قدمي أمه فأصبح أمامه مباشرةً ومد يده فأعطاه فارس اللعبة فمالت عليه :- اللي يجيبلنا بنعمل ايه .

مالك ببراءة :- بنشكره .

رغد :- طب يلا بوس بابا واشكره .

ذهب مالك إلي والده ومال عليه وقبله من خده وقال ببراءة :- شكراً يا بابا .

احتضنه فارس بشدة :- العفو يا حبيب بابا قولي يا مالك انت زعلان مني .

أماء له مالك بالايجاب فتنهد فارس :- طب انت زعلان مني ليه .

نظر له مالك وتحدث :- عشان انت كنت مسافر ومش بتكلمنا ؛ كل اصحابي ف الحضانة كان باباهم بيوديهم مع مامتهم وبيلعب معاهم حتي واحد صحبي كان باباه مسافر بردو بس كان بيكلمه .

دمعت عيني فارس ولم يستطع ان يرد علي الطفل فقالت رغد مخاطبة مالك :- مش انا قلتلك يا لوكا إن المكان اللي كان قاعد فيه بابا مش فيه شبكة وهو كان بيبعتلك العاب كل شهر مش انت كنت بتحب الألعاب اللي بيبعتها.

أومأ لها مالك قتابعت رغد :- يبقي خلاص مش ذنب بابا هو كمان كان نفسه يكلمك بس مكنش فيه شبكة واهو رجع وساب الشغل دا خالص عشان يفضل قاعد معاك هنا ويوديك هو الحضانة ويلعب معاك .

نظر مالك إلي والده وقال :- يعني خلاص مش هتروح الشغل دا وتسبني تاني .

أومأ له فارس بالايجاب فتابع مالك :- وهتلعب معايا وتوديني الحضانة .

أومأ له فارس بالايجاب فقالت رغد :- خلاص بقي يا لوكا ادي بابا بقي حضن كبير .

ارتمي مالك في حضن والده فاحتضنه فارس بشدة وأخذ يقبله فوجد من يمسكه من قميصه من الخلف فوجده جاد وهو يقول :- وانا كمان ثم ارتمي هو الاخر في حضن والده .

فأخذ فارس يحتضنهم ويقبلهم فنظر مالك إلي والدته وهو يشدها من يدها ويقول :- تعالي انتي كمان يا ماما .

فأشاحت رغد برأسها بعيدا عنهم فنظر مالك إلى والده وقال :- هي مش راضيه تحضنك ليه يا بابا هي زعلانه منك هي كمان .

فنظر لها فارس ثم قام بسحبها من يدها فارتمت في أحضانه فنظرت إليه بحدة وحاولت التراجع من بين أحضانه فسحبها مره أخرى وقال بهمس :- هششش اثبتي الاولاد عايزين حضن جماعي مش انا يعني .