#الحلقة_٢
شافتله وبدت تعيط بإنفعاال : خيييررركم قاااعدة مهبلللتش قاااعدة بعقلي
شافولها كلهم وبعدها شافوا لبعض بخوف
_________
وسجلولها خروج ، وطلعت رنا من المستشفى في وسط خوف عيلتها عليها من تصرفاتها يلي كانت غريبة ومش مفهومة ، تحملوا دوتها يلي معش بت اتم طول الطريق كانت بالعة راادييو مش زي عادتها الهاادية ابدااا
شاف بوها لأمها وهو قاعد يسوق ، بادلاته مرته نفس نظرة الخوف على بنتهم ، زادو انخلعوا لما سمعوها تعيط بصوت عالي وهي تبكي
رنا تمسح في دموعها بعصبية : والله كرهتكم كللللكم انني رنااا بنتكم تقولوووا علياا هبلت وختشت
شافلها خوها وهو خايف منها ، حاول يبعد شوية مسافة بينها وبينه في الكرسي متع السيارة
وصلوا قدام الحوش وهما قاعدين يشوفوا لبنتهم ومش عارفين شن مزال مخبيتلهم من هبال تااني اكتر من يلي شافوه !!
شافلها بوها بنظرة ترجي : بالله سلم بنتي ماتحشميناش في الشارع خشي للحوش وديري يلي تبيه
حطت رنا يدها على قلبها ورجعت تبكي : امتى حشمتكم اني...
كيف جاية بتكمل كلامها تلفتت لخوها بصدمة لما سمعاته يقول " بدينا في الدراما عاااد "
شافتله رنا وعيونها معبيات بدموع : سراااج ماتوقعتهااش منككك
شافلها سراج بخوف ورجع شاف لأمه وبوه : تواا اني قلت حاااجة ؟؟؟
بوها هز راسه يمين ويسار بنفي وفتح باب السيارة : هيا انزلووا انزلووا
نزلت رنا وهي تمسح في دموعها بعصبية ، خيرهم متغيرين معاها مافهمتش
اول ما نزلت قابلهم ولد جيرانهم ماشي لجامعة وبيركب سيارته
الشاب لوح بإيده ليهم : صبااح الخير
كلهم بأصوات متقطعة من غير رنا يلي قاعدة تبكي : صباح النور
شاف الشاب ل رنا بإستغراب : ان شااء الله لا بااس خيرهااا ان شاء الله خير
الاب تنهد وشافله : لا خير مريضة شوية رفعناها للمستشفى
الشاب شاف ل رنا بشفقة : باهي باهي ان شاء الله ربي يشفيها
وفي نفسه " ما شينهاااا باهي ماخطبتهاااش خلي نرجع لأمي نقوللها تكنسل الموضوع "
رنا سخنت مع بعضها وبدت تلعلع : والله مااافي شييين وانتتت هنننني ، شننني تسحاااب روووححككك حلووو ؟؟ تييي والله مااايتصبح فييك حتى القرررد ، شووف رووحك في المرايااا قبببل مااا....
حط بوها يده على فمها وخداها بيدخلها للحوش بعد ماحشماته في الشاارع بدي يتأكد ان بنته هبلت توا
أنت تقرأ
سايكو sayko (رواية ليبية )
Mistério / Suspenseشاف الدكتور لبوها : حرارتها مرتفعة حاليا ، طبيعي بدير حاجات مش من طبيعتها كانت تسمع في كلامهم وهي بتبكي سمعت صوت خوها وهو يشوفلها ، يتكلم في نفسه " حيي علينااا حيييي اختنا شكله بدت مهبولة " شافتله وبدت تعيط بإنفعاال : خيييررركم قاااعدة مهبلللتش ق...
