سايكو sayko (رواية ليبية )

الحلقة ٤

للبنوتة يلي وعدتها انزلها امس ، كان النت فاصل هدا ليش ما نزلتش 🥺

#الحلقة_٤

بلع ريقه وهو يشوفلها بتفحص : سلاماً قولا من رب رحيم

_____________

لبست نظاراتها الشمسية وهي فاتحة اغنية بصوت عالي في ودانها ، شادة الشيت في يدها الايسار ، تمشي في ساحة الكلية يلي كانت اجوائها مشمسة ،  ادندن بصوت خافت لعند ما وصلت لباب سيارتها ، طلعت المفتاح من شنطتها الجلدية يلي موجودة على جنبها الايمين ، خداته وحطاته في باب السيارة ، فتحت الباب وكيف جاية بتخش ، شافت مجموعة بنات جايين ناحيتها ، طفت الاغنية من زر السماعة وشافتلهم وهي مبتسمة

احلام بضحكة : شن صار فيكم ؟

وحدة من البنات بوجهه حزين : ما جاوبتش

احلام بإبتسامة : تعوضيها في الامتحان النهائي سرو

اسراء "كان تعطيني ربع دماغك راه هدا مش حالي" بإبتسامة مجاملة : ان شاء الله

ضحكت احلام بينها وبين نفسها على تفكير اسراء

نطت بنت منهم ويلي كان واضح من شكلها انها مش محترمة هلبا ، كان المكياج معبي وجهها وكأنه ماشية لصالة ، ملوحة الحجاب تلويح على شعرها ، اما لبسها فا كان كله ضيق وقصير مع كعبها العالي

تكلمت بصوت مرخي وهي تضحك : تيي عاااادي شن فيها ماجاوبتيش

حطت يدها على كتف اسراء وكملت بضحكة : ها قدامك العرض ، توا ندادي في حياشهم واني قاعدة نعاود ، شن صارلي ؟؟  ، ما صاارلي شي ، ههههه ايزي عاادي

ضحكت اسراء وهي تاخد في شيشة المية بتشرب : اتز اوكي يعني

ضحكوا البنات وهما يشوفلها كيف تقول فيها

احلام بإبتسامة اشرتلهم بيدها لسيارة : تعالوا معاي بنات

وحدة من البنات بوجهه مرهق  : وين ؟

احلام بنفس الابتسامة : للمطعم نتغدوا ...

ماكملتش كلامها لأنها بمجرد ما قالت مطعم لقتهم كلهم في السياة

ضحكت وهي تهز في راسها يمين ويسار ، خشت لسيارة وهي تعدل في نظارتها ، تلفتتلهم  : مش واتيين بكل

ضحكت البنت يلي مقعمزة جنبها في الكرسي القدامي هي نفسها يلي وجهها مرهق : جعاانين ، تعرفي من امس ما كليت شي

احلام بعتاب : مايجيش منه يلي اديري فيه ، حارمة روحك من كل شي على خاطر القراية

تكلمت اسراء من تالي وهي مقربة منهم : لالا هلبا سناء تضغط على روحها

سناء بضحكة : غر فكوني ترا ، نبي ناااكل ، هياا ارفعينا

اسراء بحماس : اسمعي افتحيلنا المسجل على سعد المجرد