♡< حب _ عبر _ الانتارنيت > ♡

الحلقة 6

خرجت النتيجة ملمزة احوجي يانا اويلي وهاما حنانة وهاقلبي وهاعمري وهاحياتي الكلبة وهازهري الطحان لمطحن ياااخاااه دارولي بلاتر خفيف ومدولي بومادة وزوج عكازات ويهدر معايا الطبيب واحد لبوقوص مي ماشي كثر مني المهم وانا في عالم المظلات مازلت تحت تأثير الصدمة اودي كون جيت فايقة راني خطفت الطبيب بواحد الطريقة ميثالية هههه المهم خرجت وجاو عاونوني وانا غير نبكي على زهري وهوما يهديو فيا وصلنا للدار لي كانت مقابلة السبيطار المنحوس دخلنا كي شافوني الطايح كثر من النايض وجدي يتخنزر { واش واش نجي نننننن....} كنت نهدر داخل قلبي هكا قعدنا نقصرو مامبا شوي دقايق وبدا الماتش جماعة برشلونة في بلاصة وجماعة الريال في بلاصة المهم كل دقيقة واحد ينوض يسوطي ويعيط ويسب كل مرة هاهم سبو ميسي هاهم سلو سواراز وهاهم سبو نايمار ومرة بيكي ولا هداك راجل شاكيرا العورة وهاداك الفرطاس وهاداك لي عندو الشعر كيما شعري منفخ ومكريبي باراسول حاشا خلق ربي وساعات غونالدو المهم ليجوار شبعو سبان من طرف العائلة سيرتو بابا نانا قاعدة تقشر فالتفاح وتاكل هي وجدي مقصرين ماهمش ماديينها فينا ولا فالماتش نسرين نسات كلش وقعدت حتى هي عايشة اللحظة ماركات البارصا ناضو الجماعة يتباوسو ويتحاضنو جماعة البارصا وانا من الغزول قدمت بالشوي نسايس في رجلي ورحت عند نانا وقعدت في حضنها ناكل فالتفاح كي صباح الخير تقول نتعشا وهي محضنتني وتمسحلي على شعري زدنا شوي وتماركي الريال انا من الفرحة شرقت وحصلتلي وعييت نتنفس حتى جا امير شدني من  وسطي ويلض حتى خرج الطرف نتاع التفاح لي قريب قتلني مي جا في وجه جدي ياو هو وجهو ولا مايضويش انا رحت عند نانا نتخبا وهي حكمتني غطاتني وهو ناض يضحك وانا ثاني والجماعة كامل يضحكو زادو الريال الثاني نسيت بلي رجلي مكسورة رحت نجري عند عمي عماد مي فنص الطريق نجيبها على فمي اهاه نستاهل بيسك نخمم بزاف

امير : يايما الزلزلة هاربي
عماد : نتا كون ماتهدرش من الفوق تطرطق من لتحت
انا : سلام لرض توحشتك بصح سبحان الله مانجيب خبر نلقا روحي نسلم عليك ايه مكتوب ربي واش نديرو

ناضو الجماعة يضحكو وانا نتخنزر المهم خلص الماتش والريال كانت رابحة وانا نضت نشنشف في نانا وهي قاعدة ترمش بالزربة وتروح وتجي بين يديا وماهي فاهمة والو وعماد طايح فوق امير بالكفوف وامير غير يكفر مصعب حكم ايوب وكانو يهدرو ويضحكو مافهمنا والو عمي حسان هاز ليلى فالسماء ويشطح وهي تعيط هبطني هبطني وطاطا مليكة طايحة فالرض تبكي على بنتها عمتي ونسرين حاطات الراس عند الراس ومشوكيات وعمي نونو يرش فالماء عليهم باش يفيقو مي والو ورنومة عند جدي تلعب معاه وطاطا وصال تبوس في رانيا وفوفو من شدة الفرح وطاطا حنان حاطة يدها على فمها من المجزرة لي صارية وعمي عاصم جامد في بلاصتو الدموع عند طرف عينو وولادهم يتباوسو ويتحاضنو طاح عليهم الحب اجدكم المهم الداب راكب مولاه خلصنا تبهليل وقررنا نخرجو نروبلها كامل حتى جماعة البارصا وهاداك لي صرا خرجنا كل واحد بطموبيلتو دايرين كورتاج باليصونات والضواوي بلا مانهدر على الدنيا لي في وسط لبلاد قايمة نتاع الصح قارينا وخرجنا ورا بعض ولي نفوتو عليه يحل فمو بيسك كنا في جيش تقول حنحررو فلسطين اودي لي نفوتو عليه يبقا يتبع فينا وانا نقرا فالمعوذتين نخاف من العين والحسادة كاثرين ههههه المهم رحنا وين كانو ملمومين كامل ويسوطيو وكلش في واحد الرومبوان نتاع تمثال روبلناها عيطنا شطحنا غنينا صوطينا درنا كلش وروحنا على الثلاثة وكل واحد شد دارو تسحرنا وصلينا وغرقنا في عالم الاحلام  نستناو في يوم جديد مليئ بالمفاجاءات رح يكون مليح ولا حزين ولا مخلط مانعرف ان شاء الله فيها خير ارقدي اامينة برك ارقدي اطفلة ع العام ونتي تهدري وحدك قبل ماترقدي تقول مجنونة ربي يهديني المهم تصبحون على واقع اجمل ♥♥

___________________________

نشالله يكون البارت خفيف وظريف عليكم ♥♥

اعطوني رأيكم فيه .؟!

# امينة وزينو ♡