شغفها حبَّاً

شغفها حبَّاً(الجزء التاسع)

يوسف وقف مع فؤاد ك أخ الكبير وحاول يكون السند لهلعيلة بمصيبتن

بعد شوي بيوصل زياد،ورند كمان بتجي،بيزعلو عهلخبر كتير،رند بتتأثر وقت بتلاقي شغف وهية متسطحة،بتتغير كل افكارها بلحياة وبتقرر تتراجع عن كلشي عم تعملو بهلحياة..لأنو الحياة قصيرة كتير

يوسف:رند لو سمحتي تعالي شوي..

بينزلو سوا علحديقة
يوسف:احكيلي كلشي صار يومها وماتنقصي أي حرف

بتبلش رند تسردلو كلشي وبلفعل مابتنقص ولا شي
يوسف بعصبية مكتومة:لكن هيك يازاهر الواطي،وكمان انتي يالينا حسابك معي كبير ومارح عديلك ياها

رند:عفكرة هية عم تتصل فيك كتير،وقلقانة عليك بس ماقدرت تجي لهون يمكن ندمانة

يوسف:إذا بتخافي ع صديقتك بتخبريا لاعاد تتصل،وتبعد عني كل البعد افضل الها،لأنو كل غضبي رح صبو عليها وقتها..وانتي كمان ماقصرتي يلا روحي من هون كمان

بتدايق رند وبتمشي،بيجي زياد بيحط ايدو ع كتف زياد:شو..بلاقيها راحت

يوسف:اصلاً ماكان في داعي تجي
زياد:شغف بتكون رفيقتا كمان
يوسف:هدول مالهن صاحب صدقني..
زياد:أنا كنت متدايق منك صراحة،بس واضح عليك اديش متأثر بيلي صار..وفرحت بوقفتك مع عيلة شغف،انت رجال يوسف حقيقي،لاتتخلى عنهن

يوسف:مستحيل..أنا رح ابقا جنبها بكل لحظة
زياد:فيك الخير..أنا صار لازم امشي،بلأذن
يوسف:الله معك..

بتمر الأيام،والوضع ذاتو ماتغير،وضع شغف مافي تحسن بنوب ومابيقدر الطبيب يعرف شي إلا لتصحا

عيلة شغف صارت تتناوب تروح وتجي،على عكس يوسف،يلي استقر بغرفة خاصة بلمشفى يلي قدر أبوه يأمنلو ياها..ماكان يطلع من المشفى إلا للضرورة القصوى

الدكتور سمحلن يفوتو لعندها لوقت محدود،كان يفوت ويأعد حدها وهو عم يراقبها لفترات طويلة،وحتى من ورا القزاز ببعض الأوقات،حفظ ملامحا علغيب وبأوقات كان يحكي معها بصمت،ويبتسم وقت يحس أنها عم تجاوبو..مع أنو ماكانت تصدر أي ردة فعل منها..

صوت مأشرات النبض والاجهزة يلي حوليه انحفظو براسو لدرجة حتى وقت يطلع من غرفتا يحس لسا عم يسمعن

عيلة شغف تأقلمو ع وجودو،وتقربو من بعض كتير

وعهلحال بيمر ٣ شهور..

لينا ماقدرت تتواصل مع يوسف بنوب

وبهليوم بلذات،كانت ندى آعدة علكرسي برا الغرفة ويوسف آعد بجنب شغف،تغير كتير،دقنو عم تطول عم يظبطها بنفسو ماعاد حلقها بلكامل متل قبل،عطتو شكل رجولي اكتر...في شوية سواد تحت عيونو من السهر والقلق

مو بس الشكل تغير والمضمون عم يتغير❤

بيهمس يوسف:ولأيمت رح تبقي هيك شغف،اصحى بترجاكي..ماتعبتي من النوم..فتحي عيونك في شي كتير بدي خبرك ياه..بحياتي ماتوقعت اتعرف عشخص ب صمت يدوم تلت شهور..أنا تعبت بترجاكي اصحي

بينتبه لصوت مؤشر النبض،بيرفع نظرو باستغراب..

بيرجع بيتطلع بجسدها كامل،ناطر حركة وحدة،حس حالو رح يدخل بحالة نفسية بعد يلي صار

ولحظتا بيلمح حركة لاارادية من اصبعا،بيفتح عيونو منيح مو مصدق مفكر متل كل مرة عم يتهيألو انو تحركت..

بيركز منيح بيرجع بيلاقي حركة من اصبعا بيطلع ركد والكل بيخاف وبينده للدكتور

وبعد وقت قصير،خلص الدكتور الفحص
عصام:طمنا دكتور
الدكتور:بحب طمنكن في مؤشرات ايجابية وعلأغلب تصحا بأي لحظة

بيرجعو بينزلو دموع الفرح من عيون ندى
الدكتور:بس لو سمحتو بدي تتصرفو بشكل طبيعي بحيث أي شي ظهر ع شغف
يوسف:كيف يعني فيك توضحلنا دكتور عن شو بتقصد؟
الدكتور:للأسف أنا ماقدرت حدد يلي صاير معها بلضبط،ومتل مابتعرفو الضربة كانت علراس و٧٠% شغف رح تخسر شي

عصام:دكتور لو سمحت احكي بوضوح
الدكتور:يعني اذا صحيت شغف وماعرفتكن ممكن تكون فقدت ذاكرتا أو يمكن تفقد شي من حواسا لهيك لو سمحتوا مابدي تخوفوها بنوب وتوقعوا كلشي،أول ماتلاقو اشارات تانية بتمنى تخبروني

الكل عاش اللحظة نفسها يلي عاشوها قبل تلت شهور..وبعد مارجعلن الأمل رجعو فقدوه

قررت ندى تبقا الليلة كلها هي ويوسف عند شغف..

لحظات حرجة..وفجأة..في شي عم يصير،حتى وهي بغيبوبتا..عالم شغف الخاص يلي متعودة تعيشو بمفردا بكل تفاصيل الروايات،بلحظة منفصلة عن الواقع

بأواخر الليل رجعو لاحظو حركات شغف بس هلمرة بشكل زايد،وقدرت تحرك راسها بصعوبة كبيرة..

وبدأت تصدر انين..
شغف:أا..اه..أمي..

ندى بلهفة ودموع:يانضر عينها لأمك،عمري شغف رجعتيلي ياروحي

لسا كانت شغف مغمضة وعم تحاول تتحرك
بيقرب يوسف ونبضات قلبو متسرعة

شغف:وين أنا..أمي انتي هون

ندى:أي ياقلبي انا جنبك..انتي متذكرتيني

بيتطلع يوسف ب ندى وبيطلب منها تهدا وماتبلش تسألها بهي الطريقة،وبيضرب جرس لحتى يجي الدكتور

بتحاول تفتح عيونها شغف:أمي..وينو بابا مين هون انا وين

يوسف:اهدي..نحن جنبك وهلأ رح يوصل الدكتور

بتحس شغف أنو لازم تفتح عيونا لتعرف من مين هاد الصوت،هية متذكرتو بس بدا تشوف لتتأكد،وتعرف شو عم يعمل هون كمان

بتفتحن بهدوء
شغف:ماما..ليش هيك المكان معتم،فيكن تشغلو الاضاءة،مين هون معك أمي أنا خايفة

بترفع ندى نظرها لعيون يوسف،وهية مصدومة ومرعوبة وترفع ايدها عتمها لتكتم شهقتها

#سارة_العلي💙 #يتبع #حكاية✒ #قصص @hekaea_tna