شغفها حبَّاً

شغفها حبَّاً(الجزء الثاني عشر)

شغف بتقول لحالا:هيك أفضل خلي يعرف أنو معي رجال هون
الشب:تمام

بيعمل حالو عم يتصل
شغف:عم يرن؟
....
مابيجاوبا
شغف:لو سمحت؟الموبايل عم يرن؟
الشب:لك اهدي شويي شو صرلك،عم يرن بس ماحدا عم يرد

منرجع عند رند
استاذ زياد(المجهول):وينها شغف؟حكيتيلي هية واقفة هون
رند:أي انا تركتا هون،لك وين راحت هي؟
زياد:رند إذا بيصير شي لشغف انتي رح تكوني المسؤولة
رند:أيوا ايوا،عفكرة انت صاحب الفكرة

زياد:هلأ بلا حكي روحي طلعي عليها بهلاتجاه وانا رح فوت اسأل بلمحلات

بتمشي رند بتحاول تتصل بس بتلاقيه مغلق وبتبقى عم تدور،فجأة بتخبط ب شخص

رند:اخخ..يوسف!هاد انت
يوسف:أي أنا،وينها شغف؟
رند:شغف..أاا بصراحة شغف..

بيمسكا من كتفها وبيهزا وبيقلا بعصبية:رند نطقي وينها شغف؟شو صار معا

بتطلع بعيونو بحقد،وبتقول بينا وبين حالا:كلكن بدكن شغف،هي يلي ماكان حدا يتطلع بخلقتا

رند:شغف ضاعت وهلأ عم دور عليها
يوسف بتزيد عصبيتو لدرجة بيحمر وجهو:انتي مجنونة؟كيف ضاعت منك؟امشي قوليلي وين تركتيها!

أما عند زياد،بيفوت ع محل بس مابيلاقي حدا،بس بيلاحظ ع شنتة مرمية علأرض

زياد:معقول هية هون؟

بالغرفة يلي جوا كان الشب عم يحاول يستدرج شغف بكلام حلو،وهو بفكرو أنها من البنات يلي بيمشو مع اي شب بكلمتين..وبلأخص أنها عميا

زياد بنبرة عصبية وخوف:شغف..شغف انتي هون؟

بتبرم شغف والشب ع مصدر الصوت،بتبعدو عنها بقوة وبتمشي فوراً ب خطى ملخبطة تحاول تمد ايديها قبل جسدها لحتى ماتنصدم أو توقع

شغف بتنده:أنا هون...

بيقرب زياد أكتر وبس يشوفا بيقرب وبيمسك ايديها
زياد:شغف..انتي بخير

بتدمع عيونها أول ماتتعرف علصوت،وأخيراً قدرت تحس بأمان،هلأ عرفت شعور أنها عمياء وضعيفة

بيقربو من بعض،بس فجأة بيلتفت علشب وبيصرخ فيه:ياواطي،شو كان بدك منها

بيترك ايد شغف ليروح يضربو للشب،بس شغف بتشد مسكتا

شغف بخوف:لا لا ماعمل شي بس كان رح يتصل بلتلفون ويعطيني اشرب مي،بترجاك تركو خلينا نروح من هون

الشب بيوقف مكانو مستغرب من كلامها وبنفس الوقت ارتاح انو ماعملتلو مشاكل

أما عند رند ويوسف
يوسف بيقلا:متأكدة هون تركتيها
رند:أي متأكدة

بيحاول يروح شوي هيك وشوي هيك ويتطلع لجوا المحلات وأخيراً بيلمح شغف

نبضات قلبو بتتزايد سرعتا من خوفو وبيهمس:شغف

فوراً بيتوجه علمحل،أما رند بتطلع وين متوجه وبتلحقو

بيفوت من الباب وبيندهلا:شغف..

بتفلت ايد زياد أول ماتسمع صوتو،وفوراً عبق ريحتو المميز بيفوت لقلبها

بتتوجه لعندو ويوسف بيلحق يوصلها قبل لاتتأذى بشي،وقدام الكل بسحبا لعندو وبيضما بقوة
بيحس بنبضات قلبها القوية من الخوف

يوسف بيهمس:هسس اهدي أنا جنبك،رح تكوني بخير

بتكمل بكا،هلمرة بقوة اكتر،كان بدا تعاتبو عشي مو ذنبو
يوسف:انتي منيحة؟احكي لاتضلي ساكتة وعم تبكي
شغف:وعدتني تكون عيوني،وماتتركني ولا لحظة

بيحس بخوفها اكتر،وبيعرف أنو هلكلام مو قاصدتو غير لأنها بلفعل بدها يكون قريب بكل وقت

بيتطلع نظرة غضب برند لما بيشوف جنبها زياد وعم يتطلعو فيهن..

بتقرب رند:تمام،كلو صار منيح خليني رجعك علبيت

يوسف:لا..شغف أنا برجعها عبيتها،ومن هون ورايح ممنوع تتحرك ع أي مكان بدوني وهلكلام موجه للكل

بيقرب زياد:شو..بلاقيك عم تهدد،عفكرة أنا يلي لقيت شغف
يوسف:وأنا رح اخدها وامشي من هون،وماعاد تلاقيها بعد اليوم،يلا امشي شغف..

شغف:بتشكرك استاذ زياد

بيشد يوسف قبضتو عايدها لدرجة بتتألم بس بتكتم ألما،وبتمشي جنبو بحذر

وهو بيكون عم يمشي خطى سريعة وعلحظة كانت رح تتفركش شغف
يوسف:..آسف انتي منيحة؟
شغف:شكلك ناسي أني مابشوف يوسف
يوسف:لا..بس توترت شوي بعتذر رح امشي بهدوء..بعدين وقفي لحظة

بيبعد عنها خطوة وبيتطلع فيها من فوق لتحت،بتتلفت شغف حوليها
شغف:يوسف..لاتروح واللهي ماعاد احمل ها
يوسف:شو يلي صاير اليوم؟شو هلتغيير المفاجئ

بتلمع عيون شغف بحب:عجبك؟
يوسف:امشي بلسيارة منحكي،مابدي حدا يشوفك هيك..

بتمشي وراه وأول مايطلعو
شغف:كيف يعني هيك؟ليش شو عاملة فيني رند؟
يوسف:ليش اخدتك ع سوق؟وليش لتغيرك بهلطريقة
شغف بزعل:يعني صرت بشعة؟
يوسف:بلعكس،انتي من قبل حلوة بس هلأ صايرة أحلى بكتير..

بيرفع ايدو عشعراتها وبرتبهن بعد يلي صار تخربو شوي
بعدين بيجيب منديل وبيمسح طرف عينها من الكحل الاسود يلي نزل شي بسيط منو

يوسف بشغف وهو مفتون بملامحا:أنت بتجنني يابنت

بتتفاجئ بكلماتو العفوية وبيحمرو خدودها،بيقرب منها كتير وبيبوس خدها،بتفتح عيونها علآخر من الصدمة،هو حس بحرارة خدودها من الخجل،أما هية بتبعد بحركة لا إرادية وبتلزق بلباب

يوسف:هههه خلص..لك ماعملنا شي،رح وصلك علبيت روئي

طول الطريق كانت ساكتة ومصدومة،مابتنكر فرحتها بس بنفس الوقت مستغربة من جرأتو

وهو مستمتع بخطف نظرات عليها وهي هيك،وكأنو لوحة من فنان عاشق،رسم كل ملامح الحب بملامحا

أول مافاتت علبيت،سمعت صوت أمها وهية عم تحاكي أخوها فؤاد بصوت مرتفع،وبنفس الوقت فؤاد صوتو مرتفع..

حاولت تتأقلم علوضع الجديد وفاتت عغرفتا

#سارة_العلي💙 #يتبع #حكاية✒ #قصص @hekaea_tna