ريحــــانة
الحلقة (2)
بقلم : فاطمة الهادي
كنت مقتنع بمبدأ (الغاية تبرر الوسيله ) أها المطلوب مني شنو !؟
معاوية ما كان عندو زمن يوقف معاي أكتر من كده قال لي المهم اخدت موافقتك ، حيجيك زول من طرفي بكرة في تقاطع الشرقي وحيرسيك على الدور كلو وعندك شقة دي اعتبرها عربون محبة عيش فيها أنت وأخواتك لحد ما الأمور تظبط ،حسيت بمعاوية متحفظ شديد على انو يديني معلومة وفعلا لمن كان بقعد معانا في الحلة كنت بحس بيهو ما مبين حقيقتو وفيهو غموض رجعت البيت سرحان وبتخيل في النعيم والعز والرطوبة الحأبقي فيها أخيرا حألبس نضيف انا شكلي ممكن لو شوفتني ما اجذبك زول اغبش واثر الفقر واضح فيني حتى الحلاقة دي من عيد لي عيد واخيرا حأكل أكل نضيف بطني زهجت من القرف الباكلو ، تاني يوم الصباح مشيت على المكان القالو معاوية لقيت ليك راجل ضخم ومفتل عمل لي حركة براسو كده عرفت انو ده الزول المرسلو معاوية قعدت معاهو قال لي مهمتك تراقب الهدف وتسوق لينا العربية والباقي ما بخصك واوعك تسأل او تتدخل في حاجة ما بتعنيك عليك بمهمتك وخلاص وأتعابك حتجيك وفوقهم بوسة أها ظريف!
كنت خايف شديد رديت عليهو ( ظريف وموافق بكل شروطكم) . قبل مايمشي مني قال لي "مؤمن " ده مفتاح الشقة وممكن تتنقل فيها من الليلة كنت محتار في الطريقة الحأقنع بيها أخواتي قاطع تفكيري وقال " قوليهم شقه واحد مغترب كنت شغال عندو وحيقعدنا فيها لحدي ما يرجع ، مشيت البيت والفرحة ما سايعاني أخيرا حأقطع لسان راجل خالتي والحال حيتغيير وداعا للفقر ومرحبا بالرفاهية كلمت أخواتي وكانو فرحانين شديد بالخبر ده . من الصباح شلنا كل الحاجات البتخصنا و خالتي قالت لينا ما تمشو وبقت لينا في العزيزه بس راجلها (مالك ومالو إن شاءالله اخر مره اشوف وشوشكم وبعدين راجل كبير ماقادر يوفر سكن لاخواتو يلا يااخوي ادينا خاطرك) ، وريني جمال خطواتك وإنتي يا فلانه ماعاجبك ممكن تطلعي معاهم مافي زول ماسكك من يدك . بكلام جارح ودعنا بيت خالتنا بس ما خليت الحاجة دي تفسد علينا فرحتنا لمياء وسحر انبسطو شديد بالسكن الجديد كل الحاجات الكان بنحلم بيها متوفرة . كان مفترض أثبت لمعاوية واكسب ثقتو والحاجة دي ما كانت صعبة
لمياء سألتني : يا مؤمن أنت بتجيب القروش دي من وين !! ما كنت قادر أرد عليها بصدق
وكل مرة تسألني بهرب منها وهي شكلها ما كانت مصدقاني لانها ذكية وبتفهم .
لحدي مايوم جات اتكلمت معاي كلام حار : مؤمن لشنو انت بتأكلنا قروش حرام
حاولت أهرب منها بس ما ادتني فرصة
_ مؤمن أنا شوفت الرسايل البينك وبين أدم وسمعت تسجيلات صوتية صورتك إتهزت في عيني ومن هنا ولي قدام إنت لا اخوي لابعرفك إلا تخلي الدرب الانت فيهو ده وكمان كذبت علينا وقت قلت دي شقة واحد مسافر نقعد فيها لحد ما يرجع ياخ حريقة في القروش البتخلينا نبيع أخلاقنا .
لمياء كانت أول مره تتكلم معاي بالطريقة دي أنا كنت متوقعها تضربني في وشي من انفعالها
في النهاية عملت نفسي ما مبالي بالكلام مع انو من جواي مقتنع بكلامها
يومي أنا ماش في حالي وهي يومي تتكلم معاي من غير نتيجة حصل بي الوضع اني بقفل الباب عليها هي وسحر لاني خايفهم يهربو خصوصا بعد ما هددتني بأنها حتخلي البيت وقطعت منهم أي اتصال عشان ما يتواصلو مع زول
يوم جيت المساء لقيت البيت هادي وكأنو مافيهو زول ، فتشت البيت كلو لقيتو فاضي وأخواتي مافيشات وقتها قلقت شديد وبقيت مكتف ماقادر أعمل حاجة تلفوني إتصلت علي خالتي وكأنها قاصدة تخوفني
_ أخواتك كيف يا مؤمن !؟
سكت مسافه لانو ماعندي إجابة
قالت لي اكيد ماعارف أخبارهم لانهم قاعدين معاي دي الأمانة الخلتها ليك أمك يا اخو البنات ياراجلهم وياسندهم وياضهرهم
وقتها يدوب قلبي ارتاح وما اشتغلت بلومها وكلامها الحار معاي ومن دربي مشيت عليهم بس خالتي استلمتني بكف
_ بتضرب أخواتك لشنو جنيت أنت ؟؟
عشان ولاية وماعندهم زول يدافع عنهم والله يامؤمن ماأخليك تعمل كده إلا بعد ما أموت
طبعا كنت محتارفي كلامها لأني ما ضربتهم ومستحيل امد يدي عليهم بس خالتي اكيد ما حتصدقني سكت وما جاوبت عليها
عاينت لي ليماء وقلت ليها عاوز اتكلم معاك دقيقتنين ممكن ؟ حدرت لي شديد وجات معاي
_ ياظالمة يامفترية إتقي الله متين يختي ضربتك؟؟
لمياء : ضربتنا لما أكلتنا قروش حرام ودخلتتنا الدنيا الملعونة دي ضربتنا لمن مديت يدك للشيطان اها اقول ليها ضربنا ولا اقول ليها قاعد يأكلنا قروش حرام ولا اقول ليها مانعنا الطلعة ومحرمنا النفس .
_ اسمعي هنا يا لمياء عاوزه تكسريني بأي طريقة وليك الحق انا حأخلي الشغل ده بس اديني فرصة شهر اتحل من الناس دي والشهر ده انتي وسحر حترجعو معاي قعاد هنا ماف سامعة ولا ما سامعة أنا ما برضى ليكم المهانة من راجل خالتي
لمياء : يامحتال وشنو الضمان أنك ما حترجع في كلامك
قعدت ربع ساعه أقنع فيها ووعدتها بوعود كتيرة بس ماكنت متأكد اني حأقدر اوفي ولا لأ على أمل انها تقتنع وترجع معاي هي وسحر
#يتبع
