ريحانة
بقلم : فاطمة الهادي
الحلقة (6)
مهاد شافت انو لسه ما جا الوقت المناسب عشان تسألهم عن السمعتو بس كان عندها فهم وقررت تسأل لمياء
مهاد : لمياء انتي متأكدة انك ما مخبية علي حاجة
لمياء راسها جاط وبقت مستغربة مهاد دي بتسأال لشنو ؟
_ لا ما مخبية حاجة
مهاد : متأكدة يا لمياء؟!
لمياء بتردد وارتباك : ايوه متاكدة هو في شنو بالضبط !؟
مهاد : الما مخبي حاجه ما برتبك كده!! والمامخبي حاجه ما بكون متردد كده
مهاد اتلاعبت بالكلام عشان تأثر على لمياء
عشان تقيس نبضها وكده اتاكدت انو في حاجة لمياء ماعاوزه تكلمها بيها وعلى كده مشت .
سحر : تفتكري بتسأل لشنو !!؟
لمياء : والله أنا ماعارفاها شكلها شاكه في حاجة بس الله يكضب الشينة الزولة دي طيبة شديد بس لمن تقوم ما بتعرفيها تتذكري لمن كنا في المستشفى كانت مؤدبة ليك الناس ديل كيف غايتو انا ذاتي ماعارفاها دكتوره نفسيه كيف
سحر : بس شخصيتها تحسيها فيها قوه كده
ما مسكينه زينا كان نفسي ابقى زيها وادافع عن نفسي
لمياء : سحر اسكتي هسي النفسيات تقوم عليك وست البيت تطردنا اصلا الزينا غير الشقا ما مكتوب ليهم
شي الله يعدي الايام دي على خير .
***
الإخوة
العلاقة بين مهاد واخوها مروان نوعا ما كانت مكركبة وكل واحد متحسس من التاني وفي كل مره يتشاكلو ويجرحو بعض بالكلام وفي مرة كانو بتناقشو
مروان : مهاد البنات الشغالات عندنا ديل وراهن حكاية تحس بيهم غامضات كده بسألك لانو انتي الجايباهن وبعدين وينو ورقهن ما شوفتو
مهاد : غامضات ! وراهم حكايه !! ده شنو الهبل البتقول فيهو ده البنات شايفات شغلهن كويس جدا وبعدين جايباهم انا يعني مفترض تتطمن ياسيد مروان وبلاش حركاتك دي واوعى تحاول تقطع عيشهم زي ماعملت مع الخدامه الفاتت ياقطاع الرزق
مروان : ومن متين الحنية النزلت عليك
مهاد : عشان واقفه مع الحق!! حركاتك دي ما حقت زول طبيعي اصلا من يومك غريب وبقيت اغرب برغم ده انا شايفه انو نشوف لينا حل لانو ما ممكن نكون بالطريقة دي كل يوم في النقاشات والتوتر وحرق الدم مروان انت عاوز تصل لشنو ؟
مروان : مهاد انتي دايما بتستفزيني بكلامك وأنا عشان ساكت ليك وما برد فاكراني راضي ولا مابعرف اتكلم انتي ما باقي ليك الا تقولي لي أحجز ليك عندي لانك مريض نفسي ، انتي اختي وعشان كده انا عاوز اوريك الانتي ما شايفاهو شكلك كده نسيتي روحك ما تفتكري نفسك بقيتي الدكتورة مهاد الكل الناس بتحبها وبتعمل ليها الف حساب يبقي انتي خلاص
انتي عمرك ما بتعرفي تحبي وكتير بتجرحيني بتصرفاتك وكلامك تتذكري لمن بتجيني في السجن وانتي متنكره عشان مافي زول يعرفك تفتتكري ما بتوجعيني وكأنك خايفة يقولو دي اخت مروان المسجون مع انك واثقه اني برئ مهاد انتي حتى دخولك لمجال الطب النفسي كان عشان خاطر الطيب البتحبيه
ولا دي فاكراني ما بعرفها حولتي مجالك للطب النفسي بعد ما الطيب جاتو نفسيات وقررتي تعالجيهو وتكوني قريبة منو وبعد سنوات من المرض إتوفى ودي كانت صدمة حياتك
بس لا انتي واصلتي واشتغلتي في نفس المستشفى عشان دي الحاجة الوحيدة البتطمنك ولا ماكده يا دكتور
مهاد : مروان كفاية كفاية
مروان : انتي استفزيتيني ما قصدي اذكرك بحاجة بس عاوزك تشوفي روحك الضعيفة المكسورة وعشان تحسي بربع الانا حاسي بيهو
مهاد دموعها نزلت وجرت على غرفتها مقهوره من مروان شديد وحتى الغدا قالت مشغولة وماعاوزة تاكل
مروان حس بالذنب من ناحية اختو والله ما كان في داعي اقول ليها كده
شكلي جرحتها وفتحت عليها جروح هي بتحاول تنساها اااخ من غبائي .
مشى على غرفتها وسألها
ممكن ادخل؟؟
مهاد وهي بتبكي : اتفضل
مروان : حبيبتي أنا أسف ما مفترض اتصرف معاك بالفظاظة دي والله ما بستحمل اشوف دموعك وعليك الله ما تزعلي مني نحنا مهما كان اخوان
مهاد : انا الاسفه يامروان تصرفي معاك كان غير لائق ومستفذ لاني مضغوطة شديد في الشغل بجي افضي قهري فيك ، نحنا أخوان ولازم نستحمل بعض نخت يدينا في يدين بعض أنا محتاجة ليك زي مانت محتاج لي خمسه سنين بعيدين من بعض مروان انا دكتورة فاشلة لأني ماراعيت لحالتك النفسيه وبتمنى اعتذاري مايكون جا متأخر
مروان : انا بكون مبسوط لو شوفت ابتسامتك يلا فكي التكشيره دي يلا ورينا اسنانك الشينه دي
مهاد ابتسمت رغم عنها ومروان من وقت ماطلع من السجن وهو منتظر اللحظه دي
القبول الاجتماعي وخصوصا من عائلتو بتدعم ثقتو بنفسو وحتنقذو من حفر
وكماين كتير ممكن كان يقع فيها
مروان : يمكن كان محتاجين نواجه بعض بكلام قاسي عشان ينفض الغبار العالق من ارواحنا
مروان كان محتاج نقاهة اولا حتى يبدا يشوف ليهو شغل ولو انو ثقتو اهتزت شديد في الشغل الفيهو حسابات
إلى مؤمن
في نفس الزنزانه جاهم سجين جديد
وشكلو كده ما مريح وعنيف والحاجة دي وضحت من أول يوم لمن اتشاكل مع واحد ضربو في كتفو من غير ما يقصد
مؤمن ما اشتغل بموضوعو كتير بس الراجل ده كانو عندو كلام تاني والخلا مؤمن يحتار اكتر لمن لقاهو عارف عنو اي حاجة .
مؤمن : انت عاوز شنو مني بالضبط
الراجل : انا اسمي شيكو اعرفني كده وخلاص انا البيني وبينك تار وعدوك لازم تعرف عنو كل حاجة أكتر من صديقك
يتبع....
