ريحــــانة
بقلم : فاطمة الهادي
الحلقة (9)
مروان سأل مهاد : الخدامات ديل حكايتهن شنو؟
مهاد : نوسة وجيهان! مالهن يعني عملن ليك شنو وأنت شنو حكايتك وكل مره تسأل؟
مروان : لا يامهاد كدي صحصحي معاي شويه وبعدين مالك منفعلة كده و شنو مرة نوسة ومرة لمياء الحاصل شنو بالضبط انا ما فــاهم معاك حاجة
مهاد :لا ياخ ماتكبــر الامور ساي إحتمال سؤ تفـــاهم
مروان كان بتكلم باصرار أنو البنات ديل بقى ما مرتاح ليهن ووراهن قصة كبيرة : شوفي يا مهــاد ياتوريني الحاصل يا قسمــــا باللـــه اطلعهن من البيت ده واليحصل يحصل
مهاد : أنا ماعارفـــه حقيقة شنو البتتكلم عنها
مروان :هو نحنا حنكـــذب علي بعــــض ياخ يا مهــاد قولي الحقيقة لانهم هم جاااين من طـــرفك انتي. واكيــد ومستحيـــل تكوني ماعارفه عنـــهم شي وخصوصا علاقتك الغريبة مع الاسمها نوسة ولا لمياء دي والمكالمات البينكم
شوفي أنا كان مفرووض من البداية اتكلم معاك بس قلت اديك فرصة وشكلو ماف فايدة
مهاد :يعني كنت بتتجسس علينا؟
مروان : سميها زي ما تسميها تجسس انتهاك خصوصية حشرية ، صنفي على راحتك أنا لو ما متاكــد إنو في حاجة ما كنت سألتك ، ياخ أنا شاكي فيهم من يوم سمعتك بتقولي ليها يا لمياء ، صدقيني ياقلبي مااف زوول في الدنيا حيخاف عليك قــدري أها حتحكي ولا اشوف لي طريقة معاهــم
مهاد :طيب يا مــــروان أنا بحــكي ليــك بس توعدني يكون الـــكلام بينــا ســــــــر
مروان : أوعدك .
مهاد : في يوم كنت متضايقة شــديد طلعت من المستشفى ، سوقت عربيتي وبقيت لافه من شارع لشارع مـــن
غير ما اكون محددة لي وجهة .
لُاقًيَتْ البتين الانت شايفهم ديل الصغيرة اسمها سحـــر وكانت حالتها صعبــة شديد وأختها الكبيره لمياء كانت ماسكاها وقاعدين في الشارع بيبكو
صراحة منظرهم استفزاني شديد ووجع لي قلبي وقلت في قلبي احتمال الله جابني من المستشفى عشان اقــدم ليهم خدمــة وأساعدهم قربت منهم بس كنت خايفة يفهمونـي غلط وما يتقبلوني رغم اني واثقة من قــدراتي كدكتورة نفسية
طبعا في اللحظـــة دي مروان مخو بقى جايط ياربي سحر ولمياء ديل مجــــرد صـــدفة ولا ديل اخوات مـــؤمن
مهاد أها قربت منهم واتكلمت معاهم بس وضعهم كان زي الزول الغرقان العاوز ليهو قشه يتعلق بيها
مهاد : انا دكتورة مهاد طبيبة نفسية
لمياء : دكتورة نفسيه مشهورة زيك وتعاين لغلابة زينا
مهاد : أنا واجبي الانساني قبل المهني يحتم علي أساعدكم مالكم الحاصل عليكم شنو؟
قالت لي الموضوع طويل طلبت منها نمشي على cafe كان قريب مننا بس هي رفضت عملت نفسي ما مهتمة وما حاولت اصر عليها عشان أعــرف الحاصل وقلت ليها طيب مع السلامة قبل ما أدور العربية
ندهت علي : يادكتورة لا ما تخلينا
مشينا على مكان قريب وقعدنا بعد ما أديتها الامان سالتها الحاصل شنو؟
أنا يا مروان عمري ما حأنسى نبرة الحزن الكلمتني بيها لمياء ولا عيونا والصدق الفيهم وحكت لي كل شي
لمياء : يا دكتورة أنا من أسرة فقيرة عديمة الام وابوي بره حياتنا شكلو زاتو ما متذكراهو
تعبنا شديد في حياتنا تعبنا من كل حاجة ادفأ حضن لينا كان أمي هي الوحيدة البتعمل عشانا حاجات كتيــــر. هي البتضحي علشان ما نتعب بعد ما ماتت كلو راح قعدنا مع. خالتي واستحملنا رزالت راجلها وكلامو الجارح. في
كل مره يلمح لي بكلام فيهو حاجات ما صاح تتقال وبطلب مني حاجات أشبع بيها رغبتو المــريضة فيني انا ما كنت بستجيب ليهو وكتير هددني انو حيدمر لي حياتي بس انا كنت بستحمل رزالتو علشان ما نتشرد. لحدي ما غدر بي وإغتصب
اختي سحر.
اغتصبها ودمــــر لينا حياتنا اصلا هي براها مدمره ده كلو كوم مشي شوه سمعتي مع خالتي. وقال انا بطلب منو حاجات غير شريفه
واني طمعانه فيهو
ودي الخزله التانيه خالتو وصدقتو. وطلعنا من البيت واحنا مزلولين. ومنهارين انا حاسه بذنب عظيم ناحيه سحر
رجولي ساقوني لحد المكان ده انا بالجد ما عارفه اعمــل شنو والله تعبت شديد يا
دكتوره فكرت اموت وارتاح بس اختي اخليها لمنو "
ساعتها يا مــروان حسيت بقشعريره في جسمي قلت ليها اختك لازم اوديها المستشفي وانا حاشرف عليها البت دي حالتها النفسية كعبة مره وحـــده. قلت ليها نفتح بلاغ في راجل خالــتك
قالت لي لا. بلاش شرطــــة وكانت قلقانه
خفت انها تهرب مني وعدتها باني ما حاكلم الشرطــــة وبواسطتي دخلت اختها عشان تكون تحت العلاج النفسي حالتها اخدت زمن ، سحر ما كانت بتتكلم هسي رجعت تتكلم وتاكل وتشرب كانت يا مروان زي الجثمان المتحرك
والله كنت محتاره وشايله همهم انو حيمشو
وين بعد فتره المستشفى تننهي وجات حكاية الشغالة المعانا وفكرت أجيبهم بيتنا لحد ما اشوف ليهم طريقة وخصوصا انو سحر (حامل)
وغيرو اسماءهم لحاجة في نفسهم
مروان. من خلال كلام مهاد عرف انو ديل اخوات مـــؤمن صحبو ورفيقو. وصديقو
بس ما كان مصــدق "طيب هم لو بالجــد اخواتو. لشنو سيره مـــؤمن في القصــه ديش ماف ولا حكايـــــه سجنو يارب انا اعمل هسي
_ مهاد البنات ديل اخوهم اسمو مـــؤمن؟
مهاد : وانت بتعرفو من وين!!
مروان : ده اعز اصدقائي الكانو معاي في السجن مـؤمن السيد. كده انا قدرت افسر لمن شوفتك في السجن واتصلت عليك وانتي كذبتي علي قلتي في شغل. انتي بتعرفيهو! ؟
مهاد : ولا عمــــري شوفتو انا سمعت لمياء بتتكلم مع اختها عنو كم مره. ويوم قالت ماشه ليهو انا مشيت وراها وعرفت انو مسجون
بس حتي انا قصة مؤمن دي ما حكتها لي
مروان : وتفتكري لشنو ما حكت ليك امشي اسأليها
مهاد : سالتها قالت كانت خايفة
مروان أوعى لمياء تعرف انك صاحب اخوها وإنك عارف الحقيقة
