ريحــانة
الحلقة ( 4)
بقلم : فاطمة الهادي
بعد إنقضاء بضع شهور ....
مروان : خلاص أنا بكرة مدتي في السجن حتنتهي صدقني لو قلت ليك حأشتاق ليك شديد
مؤمن : حاسي كأني بعرفك من سنين رغم الكم شهر العرفتك فيهم أنت الحسنة الوحيدة في السجن ده أنو اتعرفت عليك ويا صحبي جا اليوم الانا خايف منو لحظات الفراق
مروان : كان نفسي مدتي في السجن تزيد عشان ما افارقك يارفيقي بس اخدو وعد مني ما حأتخلي عنك وحأفضل ازورك على طول .
كانت ليلة جميله على زملاء السجن ومليانة شجن ومؤمن كان شايل هم خصوصا بعد ما مروان طلع
الأيام الاولى كانت مريره على مؤمن بس مع كل يوم يمر كان بخش في الناس أكتر ويتعرف على ناس جديدة مروان اختفى واختفت معاهو ملامح البهجة والابتسامة لكن بعد مدة جا زياره لمؤمن
مؤمن : مالك مستاء مفروض تكون مبسوط مش خلاص طلعتا ؟
مروان : طلعت ولقيت نفسي تايه لا الدنيا هي الدنيا ولا الناس ياهم الناس كل شي متغير إلا أنا
مؤمن : الحاصل شنو وده شنو اليأس الانت فيهو ده؟
مروان : في أول يوم طلعت كنت فاكر انو حألقى أهلي فرحانين بطلعتي ومنتظرني بس لا وكأنهم ماعندهم ولد اسمو مروان ومحرجين انو يقولو ولدنا كان مسجون شكلو السجن حيكون وصمة عار لحد ما نموت ،ياخ حتى مهاد أختي تعاملا اتغير
مؤمن : قول الحقيقه يامروان الواجعاك دلال مش كده كان نفسك تطلع وتلقاها منتظراك وعيونها كلها شوق مروان فوق من الاحلام الوردية الانت راسمها دي
مروان : بقيت تفهمني اي دلال هي الواجعاني طبعا قالو اتزوجت الدنيا ضاقت بي شديد اتمنيت لو
اعمل جريمه وارجع السجن واكون مجرم بحق وحقيقي ماهو ما ممكن أكون مظلوم هنا وهناك كتر علي يا مؤمن .
مؤمن : ياخي ما تشيل هم كل دي حاجات لحظية وبتروح ما تقلق كلو بتغير وماف حال بيقى زي ماهو
عيش عادي مع الوقت حتقدر ترجع زي اول وأحسن كمان .
ليطمئن قلبي
_ مروان أنا عاوزك في خدمة صغيرة كده وصدقني ما عندي اي زول ممكن أثق فيهو غيرك
مروان : أبشر عيوني ليك يا مؤمن
مؤمن : أخواتي شكلهم ما عاجبني خصوصا في الفترة الاخيرة زي الحاصله حاجة وهم ما كلموني بيها سحر مختفية ولمياء بتجي براها وشكلها مخبية عني حاجة ده عنوان خالتي أمشي ليها وشوف الحاصل شنو وبتمنى قلبي يطمئن
مروان : خيرإن شاءالله حأشوفهم .
تمر الايام والليالي ويطول الانتظار ومؤمن منتظر لا مروان ظهر لا اخواتو زاروه والحاجة دي خلتو يسيء الظن بمروان (أصلا هو زول غريب ومعرفتنا شكلها كانت معرفة ساي لا صداقة لاحاجة وكلو كان تمثيل واتذكر كلام مروان لما قاليهو ما تثق في زول يامؤمن ، أيوة هو قال كده وأنا مااخدت بنصيحتو ، طيب اخواتي مالهم غايبين ياربي لمياء كويسه ؟ طيب لو كويسه مفترض تجيني ول خلاص بطلت تحبني وسحرأكيد شالتني من حساباتها أنا خلاص بقيت وحيد ماعندي زول بحبني وبقى في لوم وعتاب مع نفسو والشيطان لاعب معاهو ضاغط وجاتو فكرة الانتحار لانو مفتكر دي الطريقة الوحيدة للخروج من الأزمة
#يتبع
