عندما يعشق الشيطان الجزء الثالث

الحلقة الرابعة

(حطوااا جااام قبل ما تقراااو)
الحلقة 4:
نهارين تعداو كأنهم عامين،نهارين ملي مشى سافر و خلاها،،للمرة الثانية يخليها و للمرة الثانية تحس نفس الاحساس القاتل الي حستو وقت مات موتو المزعومة..مش عارفة على شكون تحس و بشكون تحس، شكونو المعني بالامر جاد الي توفى و تقامتلو جنازة من غير جثة والا جوزيف الي تقلب كيانو و سيطر التناقض على شخصيتو و تقمص فيها شخصية جاد ، جاد الي في عداد الاموات بالنسبة للعالم الكل الا ليها هي،الاحساس الي تحسو في كل مرة،الاحساس القوي الي ما فارقهاش لحظة من نهارت الحادثة احساسها عمرو ما يخيبها و هو ما ماتش ما خلهاش،مدام لتو لا وصلتهم جثتو ولا لقاوها هو مزال حي و مزال عايش بيناتهم و فيهم و معاهم، احاسيسها ملخبطة تحس في روحها رجعت من نقطة البداية،مالصفر.. مش عارفة شبيها،مش فاهمة روحها حتى، سوى كان جاد والا جوزيف من نهارت الي مشى كرهت كل شي كان معاها مونسها في وحدتها و حزنها و حسرتها و بوجودو معاها لا حست لا بفراق بو و لا اخت ولا خو و لا بوجيعة  الدنيا و كفوفها لكانو هابطين عليها كيف المطر..
كانت قاعدة جاء لبالها اول لقاء بيناتهم ترسمت تبسيمة حلوة على شفايفها😊 تذكرت تبهليلها وقت شافتو لاول مرة فالفيلا،عيونو القري الكبار وحواجبو الحاديين و هيأتو، كمية الغرور و الجبروت و التسلط الي على ملامح وجهو، و رغم برودو الجدي الا انو كانت عندو نوع من خفة الدم 😂زاد تبسمت اكثر كيف تذكرت تبهليلها وقت حسبتو  مايحكيش نفس لغتها وقعدت تتأمل في عينو و تتغزل بيهم😍خرجت منها تنهيدة مالاعماق😓 توحشت كل حاجة فيه ضحكتو وتبسيمتو، الحركة الي يعملها وقت يكون متغشش يعدي يدو على شعرو ويعض شفتو اللوطانية،تذكرت بدنو السخون الي يحوطها كل ليلة بذراعو و تخنس عندو، ريحتو الي تعشقها و الي كانت كيف المهدئ ليها، صوتو قداه توحشتو عندها برشا ما سمعتوش و قداه محتاجة تسمعو،للحظة تذكرت حاجة قامت تجري حلت الميكرو متاعها و دخلت لدوسي مسميتو "عندما يعشق الشيطان" قعدت تتبربش على حاجة وقداش ارتاحت كيف لقاتها  حطت التسجيل و قعدت تسمع،التسجيل الي سجلتو وقت هو شارب و خرج قعد حذاها فالجنينة عالبيسين قعد يغنيلها و هي ستغلت الموقف و سجلتو وقداه كانت فرحتها كبيرة و حمدت ربي انها ماضيعتش الفيديو و سجلتو لوقت كيف ما هكا احتاجت انها تسمع فيها صوتو، تبسمت بوجيعة وحطت يدها على كرشها ثمرت حبهم الي ولدها عشقهم و قعدت منو ،لازم تتلهى بيه و بروحها ايامات و ترجع للطبيب عندها كونترول  المهم عندها انو يكون ولدها لباس، تتحسس في كرشها تتبسم تذكرت فرحتها وقت عملت الاكو و عرفت انو عندها طفل تمنات جاد معاها وقتها،تمنات تشوف لمعة عينو و الفرحة الي فيهم حنات راسها شوية لكرشها و  بدات تحكي😊
-جاد الصغرون😍 يا روحي مدة صغيرة و باش تجي للدنيا  باش تشرفنا و تكون ولي العهد و تحمل اسم بوك و اسم العيلة و تكون انت راجل الدار بعدو المهم عندي توصل بصحة وعافية و تكون بخير😍روح امك انت و قلبها و وحيدها تسمع في صوت بوك! و الحنية الي فيه زعمة البحة الي في صوتو تجي في صوتك😍 هذا
بوك و هذا صوتو جاد بن الياس آل راشد ههه اكبر رجل مافيااا،تعرف انهم ملقبينو بالشيطان! الناس الكل تخاف منو و حد ما يتجرأ ياقف في طريقو،بوك كان مغرور شموخو و كبرياؤو فوق كل شي ملامحو ديما باردة و جامدة حد ما ينجم يتنبأ والا يعرف عليه حاجة و لا شنو يدور في مخو😂و انا عشقتو بكل الصفات الخايبة هذي الكل،عشقت غموضو، تعرف زادا يا روح ماما انو احلى و احن و اطيب راجل بالدنيا و تصدق انو فالتسجيل هذا كان قاعد ويغنيلي معجزة في حد ذاتها و حدث مستحيل انو يتكرر على اذاكا انا تذكيت و سجلتو😂 تحكي و تتبسم و في لحظة التبسيمة تقلبت لبكاء و دموع و وجيعة ما فارقتهاش لحظة،تحيرت عليها آلامها و جراحها،تبكي بهستيريا ما نجمتش تمنع روحها و تحبس دموعها😢 غصة في حلقها خلاتها مش منجمة تبلع حتى ريقها،حطت يدها الزوز على وجها و اتطرشقت بالبكا اكثر و اكثر غيابو حارقها عدات حياتها الكل من غير ام من غير حنان،عاشت اهم مراحل حياتها وحدها ونهار الي ربي بعثلها الحب و عاشت الفرحة كيف العباد عاودت الدنيا لعبت دورها وفي لحظة بين ليلة و نهار سرقت منها كل شي و رجعتها لنقطة الصفر، النقطة الي عانات و ذاقت الويل باش نجمت تتجاوزها..
حست روحها تقلقت و خلوقها دارت  قامت تجري بقات ترد وموجوعة ودايخة كملت قعدت على القاعة تمسح في وجها تبسمت وعرفت انو  هذي الحركة اشارة   مالبيبي حسسها بيها انو معها ولات تضحك مست كرشها 😊
_قاعد تواسي في ماما ياروح قلبي مازلت صغرون اما حاسة و متأكدة انك باش تكون كيف بوك 😘
بقات تعدي في يدها على كرشها و تتذكر في كلام جوزيف انها لازم تاكل وتقوي روحها لازمها تتلهى بروحا اطثر و تحاول تخرج من دوامة الاكتآب الي هي فيها،قداه وجودو كان مرتحها و مفرحها سواء جاد او جوزيف كان مش مخليلها و لو لحظة تحس فيها بالخوف و الرهبة مالمجهول الي التخمام فيه توا ماكللها قلبها،مش مخليلها فرصة تحس بالحزن و الفراغ كان ماليلها و قتها و حياتها و غامرها بحبو و اهتمامو..
كانت قاعدة فالقاعة مغمضة عينها متكية راسها عالحيط لين سمعت باب بيتها يدق  مانجمتش تقوم ،كانت دانا فالباب،دانا الي  غياب جوزيف حرقها هي زادا اول مرة تحب وتعشق و تسلم مفاتح قلبها لراجل لكن كل شي قسمة و نصيب فالاخر.. الراجل الي تحبو حب الطفلة الي حسبتها عشيرتها و اختها الي ما جابتهاش امها العرس الي ما فهمتش اسبابو و لتو مجهولة بالنسبة ليها،لحظات تعداو قدام عينها بينو و بين ايثار وجيعتها تحفرت في قلبها مش منجمة تنساهم شافتو و هو  حاضنها و هو يستنشق في ريحتها و هو يبوس فيها،شافت في عينو كمية الحب الكبير لايثار، الحب الي ما شافتوش في عينو ليها هي، اما الي مصبرها و مخليها مطمانة رغم القلق الكبير الي حاستو جيتو الاخيرة ليها لبيتها كل ما تتذكرها خلاتها تحس براحة مؤقتة مش عارفة نهايتها وقتاه نهارين تعداو عليها بعامين حبست فيهم روحها في بيتها والي زاد وكمل عليها غياب خوها اسامة على الدار الي ولات باهتة كأنها بلاش روح هزت روحها نهارتها و مشات حذا ايثار تطمان عليها عندها برشا ما شافتهاش و حست روحها محتاجة تشوف و تلمس حاجة تابعة جوزيف فماش ما تطفى نارها شوية😧وصلت للفيلا الي هي زادا حسها باهت لا حس لا حركة طلعت فالدروج وقفت قدام بيتها و دقت عليها الباب و ما جاوبها حد عاودت المرة الثانية و الثالثة كيف كيف خافت يكون صارتلها حاجة دخلت تجري تلوج عليها بعينيها في البيت ما لقتهاش زاد كبر خوفها لمحت باب بيت البانو  محلول مشات تجري دخلت لقاتها قاعدة فالقاعة منهارة عينها منفوخة دموعها تجري و تبكي من غير صوت عاونتها باش قامت حطتها في فرشها و جابتلها منشفة وقعدت تمسحلها في وجها لكان اصفر وذابل مكسورة من برا ومن داخل غيابو عليها للمرة الثانية قتلها و قتل فيها كل احساس حلو و كل فرحة و لهفة كانت فيهم و عايشتهم،😦 بقات دانا تحاول تهديها تعدي في يدها على شعرها حاسة بيها و بوجيعتها هذا احساس الاخوة الي جامي دانا حساتو طول عمرها وحيدة وسط زوز رجال قعدت تحاول تنسي فيها وجيعتها و ما لقات هي شكون ينسيها و يواسيها مخنوقة و ما تنجم تحكي لحد و لا تشكي لحد حبها سرها المدفون..
الزوز كانو في دوامة طويلة عريضة طاحو في بير غارق الخروج منو صعيب، ايثار شدها كريز متع بكاء مرة اخرى،تبكي بصوت عالي مش منجمة تسيطر على روحها حطت يدها على فمها تحاول تكتم صياحها دانا كانت فاهمتها و حاسة بيها هي زادا قلبها مكسور و محطم تذكرت جوزيف والليلة الي جا فيها لبيتها و ودعها من غير ما تشعر عدات صوابها على شفايفها للتو حاسة حرارة بوستو، البوسة الي وحدت مشاعرهم و قلوبهم😊
بقات مع ايثار تهدي فيها لين غفات حطتلها راسهاوعلى المخدة و هبطت لوطى تكلم فالبون باش يعملولها حاجة تاكلها مالصباح على ريقها ماكلات شئ  و هي طالعة في الدروج عرضتها كلبة ايثار "بالما " ديراكت ترمات عليها هزتها داما بين يديها بدات تلعب عليها و تضحك  طلعتها معاها للبيت و حطتها عالفرش بدات  تنقز و تلحس في يدين ايثار😂 حتى فاقت بقات تحك في عينيها تستوعب فالحاجة الي تتحرك قدامها شافتها تدور وشايخة خزرت لدانا و تبسمو الزوز هزت روحها شوية تكات عالفرش و حطت بالما في حضنها😍
_ ياروحي انت مالصباح نلوج عليها وين لقيتها ماتقوليش كانت في البرا
_ لا كانت في الجنينة وكي جيت طالعة خلطت عليا والله تقول بيبي محلاها هي الي عاملة الحركة فالفيلا و خالقة جو
_ حتى هي اسمها "بالما" يعني عسل
كانو يحكو لين دخلت البون هازة بلاتو الماكلة ايثار اول ما شمت الريحة قلبها غم عليها حاولت تشد روحها و ما تشلقش قدام دانا الي خذات البلاتو من عند البون و حطتو قدامها و بدات توكل فيها
_ ايثار ايا عزيزتي طيارة طيارة 😂لازمك تاكل و ما تقليش لا مالصباح ماكليت حتى شئ راك😒
_ بلاهي انتي وتبوليدك مش منجمة والله حاسة روحي مخنوقة من الريحة
_ اسمع ما تبداش تكسح في راسك خيرلك يلا كول تي شوف حالتك كيفاه خزرت لروحك فالمراية اليوم والله صفرا اللطف تقول كعبة قارص اي عيش اختي..
                       * * * *
في ايطاليا كانت قريب 4:00 متاع الصباح قاعد في فرشو ماجاهش النوم البلاصة تبدلت عليه وزيد صغرونتو ماهيش في حضنو مش حاطة خشمها في رقبتو ولا  غارسة ظوافرها في صدرو كيف العادة شعرها الطويل مش حاسو طايح على وجهو، حس روحو مخنوق عدا يدو على شعرو و قام😧 كيفاه باش ينجم يعدي هالثلاثة شهور و بعدهم ما يقارب 3 سنين كان مش اكثر مش قادر على فراقها حس بركان شاعل في قلبو و نار شاعلة في جواجيه تحرق فيه مع كل نفس يتنفسو، مع كل لحظة تفوت و كل نهار يتعدا يزيد يلوم روحو على عمايلو الزفتة لكان يعمل فيها و يلعن روحو الف مرة على اللحظة لدخل فيها للمافيا و ورط روحو في الف حكاية و حكاية كان جاء يعرف انو المستقبل باش يكونلو هكا وقتها لا عمرو يوصل لهالمواصل و لا عمل هالعمايل الكل ولا لعب مع "سفاح تكساس" شلال افكار هبط عليه ليلة كانت باردة و هو  لابس شورط و من فوق عريان مش حاسس لا ببرد و لا بثلج الي كان يصب يحرق فالدخان و نار الندم تحرق فيه زاد شعل كنينو و لهب وقت تذكر ولدو الي جاي فالثنية،تذكر ايثار الي نورمالمون يكون معاها في وقت كيف هكا اكثر وقت هي مستحقتو فيه و لازم يكون معاها نعارين توا ما كلمهاش و ما سمعش حتى صوتها شاد روحو عليها بالسيف يعرف روحو كيف يكلمها ينهار و ممكن ياسر ياخذ طيارة و يرجعلها لتونس😦تذكر ولدو الي قاعد توا ينمو و يكبر  بعيد عليه كل شي  واقف ضدو مش باش ينجم حتى يعيش كيف اي بو اللحظات الاولى الحلوة معاه مش عارف اذا كان وقتها باش يكون  عايش  ولا حس بخنقة كبيرة حل البركون و قعد الريح كانت قوية نفس العاصفة الي حاسسها هو في داخلو و مش عارف كيفاه يوقفخا فيسع و يرجع لاحضانها الي تستتا فيه على احر من الجمر،شعر السيقارو الثاني ركز يدو عالبلار و قعد يتأمل فالعباد الي مروحة الفجاري لديارها و كل حد و حكايتو للحظة حس بالعباد لكان يقتل فيهم بكل برودة دم و لا مبالاة لا احساس و لا ضمير، توا حس بوجيعتهم وقت كان يعذبهم ويحرقهم من غير ما يرفلو جفن و لا تغمضلو عين، وجعو قلبو عليهم رغم كانو يستاهلو الي صارلهم اما توجع على خاطرهم حسو نفس الاحساس الي حاسو هو توا،احساس الغربة و الوحدة،وجيعتو القاتلة و هو بعيد على حب حياتو و روحو،بعيد على ولدو والا بنتو الي يستنا في ولادتو على احر من الجمر..
حبل الافكار طويل و الذكريات زادت احساسو بالندم و الخوف الي يتمكن بيه و يتملكو وقت يبدا وحدو،النوم طار هليه و لازم يلاهي روحو بأي حاجة جبد طابلو كبير وقعد يرسم يحب يبعد هالافكار من  راسو خذا البانسو وكل مايعمل بيها خط يتخيلها بكرشها الكبيرة تمشي و تتكعبر والا وهي قاعدة تضحك شفايفها الروز وشعرها الاكحل كيف عتمة الليل بشرتها الشفق الطرية، ساعات يتخيلها تبكي على  غيابو و وحدتها من بعدو و احساسها انو هو جاد قاتلها و قاتلو هو اكثر لعجزو انو يعمل حاجة يرتحها بيها و ينسيها حتى شوية، مش وقت انها تضعف توا و تتهد ،مش وقت انها تسكر على روحها و تقعد تبكي و تلعن فالنصيب الي فرقهم لازم يعمل حاجة اي حاجة سوى كان باش تزيد تبكيها والا باش ترتحها و تفرحها المهم عندو انها مهما دخلت في مرحلة اكتآب و حزن والا غيرهم فالاخر تتقوى على الدنيا و الضروف و كل حاجة تعرقللها طريقها و تخليها ما توصلش لحلمها و تحقق طموحها لازم تاقف  لروحها بروحها😟فد لازم يلقى حل لكل شي مهما كان راسو رزن مالتخمام يحس فيه باش يتطرشق كبس عليه بيدو الزوز كأنو يحاول يخرج منو الافكار السلبية و يستقبل افكار جديدة تكون حل لمشاكلو، هز راسو للسماء يناجي في ربي
- اووووف كيفاه شنو باش نعمل يااا ربي دلني على الطريق الصحيح و نور بصيرتي، مجرد اني نتخيل دموعها نضعف و ننهار فما بالك و هي قدامي، عذابي يزيد وقت تبكي و وقت تتوجع،وقت تحنلي و تتوحشني،وقت نجي على بالها و نعرف اني ما نفارقهاش لحظة و ديما تخمم فيا، هذا الكل انا السبب فيه،انا سبب وجيعتها و اجراحها الي لتو لا حبت تتسكر و ترتحها😢 كيفاه انجم نمحي الشك من قلبها ونخليها تصدق انو انا مت، نعرف وقتها باش تزيد وجيعتها تكبر اما على الاقل فترة و تتعدا بعدها اكيد باش ترتاح شوية.. لازم نلقى حاجة و ما يحلي هالمشكل كان اك الكلب لا زم نكلمو...
                      * * * *