عندما يعشق الشيطان الجزء الثالث

الحلقة 12

(حطواااااا جااااام قبل ما تقرااااااو)
الحلقة 12:
سمع سؤالها ما لقى ما يقلها صحيح علاقتو بيها لعبة و هي مستهدفة مالاول منهم و مستخدمينها باش يوصلو لخوها اما عمرو لا ربط مرا بيه و لا باش يربط اصلا قلبو مش ملكو و روحو مش ليه والي قاعد يعمل فيه الكل توا جيست باش يرجع يعيش و هو فالاصل على قيد الحياة و يرجع لمرتو روحو الي ولات بروحين و قاعدين يستناو فيه مع نسبة امل ضئيلة بإنو يكون عايش على اذاكا ما يحبش يعلق لا اليزا و لا غيرها بيه باش ما يقعدش تحت وطئت عذاب الضمير، ضميرو الي صحى و تحير بدخول ايثار لحياتو،سكت شوية و تكلم بعد ما بدل الحديث و حاول يتجاهل و يتهرب من سؤالها😊
-انا ما قعدش عندي عقل من نهارت الي قابلتك و سحرتني بعينك و شعرك و شفايفك
يحكي و كل كلمة يقولها يمسلها الحاجة الي سماها وصل لشفايفها عدا صبعو عليهم و تصدم وقت لصقت شفايفها على شفايفو الي ما استحلات و اتطعمت كان شفايف مرتو و روح قلبو و صغرونتو ايثار ما تجاوبش معاها و اصلا ما نجمش يتجاوب و كأنو لسانو تعقد و شفايفو تحنطو قعد حابس لين حسها بدات تترخف بالشوية و طاح راسها على صدرو
قعد شوية و قام بعد عليها غطاها و ركحلها راسها عالمخدة خرج و سكر الباب و ديراكت للبيرو وقف قدام الباب الي تعب و ريقو شاح باش وصل للنقطة الي وصللها توا،النقطة الي باش تكون نهاية لمرحلة ما تنجم تكون حتى شي قدام مرحلة جديدة باش تبدا،الحرف فيها يعنيلو الحياة او الموت...
فالوقت هذا آزر و أيهم و جوزيف ملمومين يستنتو في اشارة من جاد لين وصلهم ميساجو انو سايي حاضر و ينجم يبدا رجعلو ميساج باش يعمل الي قالو عليه،جبد جاد التاليفون و لصقو عالايكرون الي فالباب و بيه وصلت اشارة لآزر الي كان يستنا في هاللحظة على نار باش يبدا خدمتو و بعد شوية بحث عرف نوعية الايكرون و الاجهزة الي محطوطين جنبها و نجم يفك الشيفرة و على اساس سي بون باش يتحل الباب طلعتلتو تابلو جديدة لازمو يعمل مسح بصامات و مسح لشبكية العين الي مش عارفينهم لشكون و المشكل انو المحاولة تكون مرة وحدة و الثانية توصل لآد جين بإنو فما اختراق امني لبيروه، الوقت يجري..جاد مكنو العصب و الاستراس قدام الباب و الاولاد حالتهم مش بعيدة عليه قعدو يخممو لشكون هالبصامات و هوني الزلقة بفلقة حاول آزر بمحاولة قبل ما يجربو حتى حاجة فماش ما يعرف نوعية البصامات و طلعو بصامات انثى و الانثى الوحيدة في حياة آد جين هي اليزا اختو..
جوزيف يمشي و يجي مالعصب،ايهم مخو محروق بين المهمة و الحالة الي هوما فيها توا و بين تساؤولاتو شنو ينجم يكون صار بين جاد و اليزا يعرف انو مش وقتو اما الله غالب ما ينجمش يتجاهل دقات قلبو الي قاعدة تزيد كل ما خمم فالحكاية..
آزر كل تركيزو مع جاد مقابلتو الينا الي التحقت بيهم روتار فماش ما تنجم تعاونهم بحاجة اما صار العكس،شوشت انتباه آزر و ضيعتلو شوية من تركيزو، الكلهم لاحظو الحاجة هذي و فهموها،في كل مرة وين يهز عينو تجي في عينها قاعدة فوق الطاولة مقابلتو اتدلوح في ساقها و تمضغ في شوينقوم😂 الي يشوفها يقول هذي لا علاقة بالطقس اما من داخل هي كيفهم ترحي و ماكلها العصب حطت همها الكل في هك الشوينقومة فماش ما تلاهي روحها، كانت لابسة دجين مقطع طاي هووت و بروتال توب ييضة بالقدر هي و السروال لامة شعرها كعكة كيف ما جاء ،سيب كل شي و قعد يخزرلها و سارح في تفاصيلها كانت كيف الصغار مركز معاها لدرجة انو ما سمعش جوزيف و هو يحكي معاه 😂
-آزر...يا آزر😠😠يا هم هوووووو😡
-هااااا شتحب
-وين كنت ياخي ساعة نبرح عليك
-شي ما بيني،شتحب
-تي شوف جاد شعمل الزح مكني العصب مزال فيا عرق اهوو باش يزيد يتقطع حتى هو
-الكلنا كيفك😒 كلمي روحك و اصبر هانا نستناو
ايهم قاعد عالفوتاي حاط مخدة في حجرو و رامي راسو لتالي مغمض عينو و كالعادة يسيب في بلادتو على آزر خاطر مشلق بيه و بخزرتو لإلينا الي من تحت لتحت😂
-آزر ركز فالبيسي الي قدامك بابا ،فايقين رانا وسع بالك صاحبي😈
قحرلو على جنب خاطر فهمو ما يزيش الاستراس الي راكبو و زاد كمل عليه ايهم ببرودية الدم متاعو،رجع حاول يركز ما نجمش صوت تكتيك الشوينقوم و ساقها الي تمشي فيها و تجي و البوستخالة الي في رقبتها و قريبة من صدرها الي تقريبا شبه عريان الروز الي عاملتو في شفايفها الصغار و خصلة شعرها الي مفددتها هابطة على عينها ضربة ثنين تنفخ عليها باش تطلع فالهواء و تبعد😍عصب المهمة و التوتر الي مكنو و هو يستنا في جاد الي مشى يجيب في اليزا و جوزيف الي خيط الصالة بمشيانو و جيانو كل هالتفاصيل فورولو دمو و دخلوه في حيط يحس فالدنيا الدور بيه و هو قاعد بين هوا و فضى صوت ريشة المنقالة في وذنو،صوت الماء و هو يقطر سايي معادش فيه تخنق حس بالهوا تقطع عليه نفخ بقوة و نحى الكاسك و شد راسو ولى يصيح 😠
-اااااااا يزي اسكتو..