عندما يعشق الشيطان الجزء الثالث

الحلقة 21

(حطوااا جااام قبل ما تقرااااو )
الحلقة 21:
هو تبسم و مشى و هوما الزوز دخلو حذاها و تاليفوناتهم ما سكتتش ،جوزيف يطلب و يعاود متحير و يدو على قلبو يحب يعرف شنو صار لايثار،كلمو جاد و طمنو عليها بعد ما عاود حكالو علي قالو الطبيب..
-ايهم:جاد انا خارج نخليكم على راحتكم اكيد توا باش تسمعك،توصي حاجة قبل ما نمشي؟
قربلو يحكي بالشوية و يوشوشلو في وذنو
-هي توا تسمع معادش تذكرو اسمي هوني و زيد طمن الاولاد اكيد دجو متقلق و باش يصرعني بالتاليفونات (رجع يحكي عادي بصوت مسموع)عيشو الخو سايس روحك 😊
قالو ايهم باهي باس جاد الصغرون و خرج بعد ما سكر الباب وراه..
دخل معاها في الفرش لصق فيها بعد ما خباها في حضنو و غرس خشمو في شعرها يستنشق في ريحتو الي خلاتو يهدى و يغمض عينو محاولة منو انو يرقد شوية و يرتاح بعد الي عاشو فالايامات الي تعداو و النوم الي ما لقالوش طريق...
صباح جديد و النهار الرابع في غيبوبة ايثار قام مالنوم يلقاها مكبشة في مريولو😊فرح و عرف انها حاسة بيه و بقربو و بوجودو معاها و قاعدة في كل مرة تحاول تتحسن و تتجاوب اكثر مع كل حاجة تصير،دق الباب و دخلت طبيبة جاد الصغرون قام هو من حذاها بعد ما ريقللها فولارتها و غطاها مليح دخل غسل وجهو و صحصح شوية و رجع وقف بجنب فرش ولدو يراقب في الطبيبة كيفاه تبدلو و تتفقد في حالتو الصحية كتف يديه يخزرلو و يتبسم جاء لبالو سؤال سألو للطبيبة
-دكتورة جاد سافا؟ شنو حالاو توا؟ زعمة المدة الطويلة الي قعدها في كرش امو تنجم تأثر عليه والا على حاجة فالمستقبل،ما نعرش كيما النمو والا اي حاجة؟
-لا مسيو اتطمن و كون متهني حالتو عال العال حمدلله نمو متاعو مراقبينو و ماشي مريقل كل شي سافا جيست ساعات تجيه شوية سخانة والا يولي يقشع يعني حاجة عادية كيما الصغار الكل اما تبقى تقوم امو لباس  باش ينجم ياخو حليبها خاطر مهم برشا 😊
-اي باهي حمدلله ان شاء الله ربي يفرجها و تقوملنا لباس😊سي بون كملتلو انجم نحملو؟
-اي اكيد تفضل،لحظة لفو مليح رد بالك صغيرون برشا شدلو راسو من تالي،سييي بون..ههه اول بيبي و اول تجربة اما صدقني حلوة برشا و احاسيسها حاجة اخرى ان شاء الله مالذرية الصالحة😊

(حطواااا جاااام قبل ما تقرااااو)

خرجت الطبيبة و هو قعد باهت ما يعرش كيفاه نطق بهك الكلمة و لا اراديا اندفع و حب ياخذو في حضنو رغم انو ما كانتش على بالو الفازة،ملي تولد صحيح فرحان بيه اما فرحتو ناقصة و ديما يلوم في روحو على عدم احساسو بوجودو بيناتهم، كان موجه كل اهتمامو لايثار خوفو الكبير عليها خلاه ينسى و مايحسش بولدو لدرجة انو لا مرة خمم انو ياخذو في حضنو و يحسسو بوجود بوه و حنيتو و حبو في غياب امو و انو مش وحدو.. بين يديه كأنو مش هازز شي و اول ما خزرلو في عينو و تأمل تفاصيلو الصغيرة حس بأحاسيس الدنيا الكل الحلوة و كأنو ملك العالم،قلبو يرعش و لحمو قشعر،كورون سرى في كل نقطة من بدنو و عينو تملات دموع،دموع فرحة ما تعادل حتى فرحة تذكر انو كان نافي تناما هالحاجة من حياتو و رافض انو يتجاوز الخط الاحمر الي سطرو لروحو و فرضو هو بالسيف على روحو، ضيق عينو شوية يتساءل دخلاني و هو مستغرب😕
-هذي هي يا جاد الفرحة الي كنت خايف منها؟هذي الي كانت سبب باش ما تحلش قلبك لحتى وحدة؟هذا الاحساس الي كنت رافض تعيشو و ناقم عليه مالصغرة؟😢قداش كنت غالط،ممكن كنت صحيح زادا اما دخول ايثار لحياتي  هو الي بدل خزرتي للدنيا و خلاني نشوفها من منظور آخر،هي الي خلاتني نشوف الدنيا من عينها و بيهم ولى كل شي في عيني حلو،هي الي عاودت رباتني و ولدتني من جديد و خرجت مني جاد متناقض تماما و عكس لجاد القديم،جاد جديد مش الشيطان،انسان عكس الي كان بروح و قلب جدد و هي الي زرعت فيهم كل حاجة حلوة موجودة فيا توا😢😊
محملو خايف عليه من قوة يديه يسايس فيه تقول شاد حاجة بلار جويدة و خايف عليها تتكسر كان تقوى شوية،كان بين يديه هادي يخزرلو بعينو الكبار الي خذاهم على ايثار يرمش فيهم و يضحكلو،خارجة منو اصوات غريبة تماما على جاد،اصوات خلتو يضحك بصوت مسموع نابع من اعماق قلبو،يتأمل في ملامحو الصغيرة، خذا منو كل شي حواجبو ،خشمو ،فمو الصغرون، نظرتو الحادة اما لون العين الزرقة الي ساعات ما تفهمهاش كيفاه تتحول خضراء لون غابتو الي يتوه فيها و ما يعرف فيها خروج و لا رجوع، الشوافر الطوال الكحل و نظرة البراءة و كبرهم كل هاذم خذاهم من ايثار..للحظة جات لبالو حاجة و ديراكت صمم انو يتأكد منها و من شكوكو بعدلو مريولو شوية شيرة كتفو اليمين و تصدم من توقعاتو الي كانت في محلها و مجرد شك،خمم فيها صحيح اما كانت احتمال شبه مستبعد،عينو وساعت على كبرهم مش مصدق الي يرا فيه😨 الوحمة الي في كتفو هو و جوزيف جات في ولدو زادا..ما عرفش يفرح والا يخاف..
وفعلا خاف و قلبو خض خضة فزع،كلمة خوف ممكن شوية مقارنة بلي دار في مخو و السؤال الي سألو لروحو و كان يخوف اكثر لدرجة انو غمض عينو بقوة محاولة منو انو يفسخ طيفو من مخو..
هذا جاد بأتم معنى الكلمة ،هو نسخة منو اما مصغرة،نفس الاسم،نفس الملامح و تفاصيل الوجع الصغيرة و الاكيد باش تكبر مع كبرو بالشوية،نفس الوحمة... و السؤال الي خلا الدم ياقف في عروقو زعمة يكون شيطان؟...😯زعمة يمشي في نفس طريقو و على دربو؟الطريق الي خذالو 10 سنين من حياتو؟طريق المافيا و السلاح؟؟...

(حطوااا جااام قبل ما تقراااو )

تقلق و فد و مكنو الخوف من حاجة كانت مجرد فكرة اما رغم انها فكرة الا انها خلاتو يرعش و مجرد التفكير فيها قبضلو قلبو و سد عليه النفس،مستحيل يخلي مجرد فكرة سخيفة جات لبالو تصير والا تتحقق،طول ماهو عايش و فيه روح و يتنفس يخلي ولدو يعيش الحياة الي عاشها هو و ذاق مر عذابها😢قربو اكثر لصدرو باس جبينو و خباه عندو و كلو خوف و قلق سكنو ملامح وجهو...
الباب دق اما تركيزو الكبير مع افكارو و مخاوفو خلوه ما يسمعش و ما يحسش بالشخص الي دخل،مزال واقف معنق ولدو لابس بكلو فالنوار لونو المفضل الي يعطيه جاذبية ما تتقاومش تخلي الغموض و السحر يطغاو عليه و يسيطرو على كل ملامحو..دخل جواد في يدو بوكاي كبير من ورد الجوري الاحمر شاف ايثار راقدة اما كيف دار بعينو عالبيت لمح  راجل واقف عاطيه بالقفى تقول جبل شاهق و بعلو يعاند فالريح..ضيق عينو و عاود دق الباب الشي الي خلى جاد يفيق من شرودو و يدورلو.. الزوز عاقدين حواجبهم،جواد الي كتم صدمتو و نجم يسيطر على ملامح وجهو و دهشتو و جاد الي يتساءل على هوية هالراجل الي جاء يطل على مرتو و شنو علاقتو بيها..
قربلو جواد مش مصدق عينو😨على اساس هو ميت و حتى جنازتو تعداو عليها 4 ايام زعمة شكونو هلي واقف قدامو!؟ تضاربت الاسألة في مخاخهم الزوز و حارو و الزوز مش فاهمين شي..وقف جواد مفابل جاد يرى فيه محمل بيبي بين يديه عرف انو ولد ايثار،حب يوقف هالحرب الي تقامت في راسو و يلقالها اجابات على اذاكا رسم تبسيمة على شفايفو و مد يدو سلم على جاد😊
-عسلامةانا جواد المستثمر الجديد فالشركة كنت مسافر و اليوم رجعت و سمعت بلي صار،الحمدلله على سلامتها و مبروك ما نزادلها
-سلام،جوزيف(تبسيمة صفرا)
مشى جواد حط البوكي بجنب ايثار وقت كان جاد يهز فيه و يحط و يخزرلها في خزرة ترعب ما صبرش و سألو و الدخان باش يخرج من اوذانو 😂
-سامحني كيفاه عرفت انو ايثار تحب ورد الجوري😠
-ااا بون،ما كنتش نعرف اما صدفة حلوة☺سامحني سؤال شخصي شوية ..على حد علمي مسيو جاد متوفي  و صدف ريت فالاخبار انهم لقاو جثتو نهارة جنازتو انو جنازتو 4 ايام لتالي،نعرف تصاورو بما انو رجل اعمال ناجح و مشهور اما انت شكون كان ما فماش مانع؟
-جوزيف بن الياس آل راشد😐
و هذي كانت الصدمة الثانية لجواد
-يعني انت خو المرحوم؟
-التوأم...
سكت جاد شوية يتفحص في ملامح وجهو الي ماشية و تتبدل مع كل كلمة يقولها،ماةيعرش علاه ما رتاحلوش و لا طمانلو قلبو،تجربتو فالمافيا خلتو يعرف العباد من خزرة وحدة و يكتشف نواياهم خايبة كانت والا باهية،حب يزيد يتأكد مالشكوك الي مراودتو باش كيف يعمل الي ناوي عليه ما يكونش ظلمو،كمل يحكي و هو مركز في عينو
-خوه التوأم و راجل ايثار😏
جواد تصعق فعلا مالصدمة الثالثة و تهدت كل اسوار الامل الي كان بانيها باش يوصل لقلب ايثار الي سحرتو هو زادا و سلبتلو عقلو بدون سابق انذار و صدمتو كانت واضحة وضوح الشمس على وجهو و مستحيل جاد يلقالها تفسير آخر غير التفسير الوحيد الي في مخو
تكلم جواد محاول انو يتدارك روحو و ما يفضحش مشاعرو
-سامحني ما كنتش نعرف الحاجة هذي و حتى كيف سبف و سألتها نفات انها عاودت حياتها مرة اخرى
هوني جاد بدى يتنرفز و كيفو بدا يطير😡حس انو قاعد يستفز فيه بكلامو و لازم يشد روحو باش ما يكسرلوش وجهو،جاوبو بنبرة سخرية تدل عالقوة و الجباروت و الثيقة بالنفس
-على ما اظن انك مستثمر في الشركة يعني بيناتكم امور خدمة لا غير فاش قام تدخل في روحك في امور ما تعنيكش و تتجرأ و تسألها سؤال شخصي بالدرجة هذي😒اسمعني حاجتين نوضحهملك و اازمك تفهمهم مليح اولا رد بالك تتجاوز حدودك  لو كان بحرف و ثانيا مرتي خط احمر يا سيد نمحي كل من يتجرأ و يخمم مجرد تخمام انو يتجاوزو😬