(حطوااا جاااام قبل ما تقرااااو)
الحلقة 24:
قعد على ركبتو و شدلها يدها الزوز الي رعشو بين يديه، حس انو وراء هالقوة الا انو قربو المفاجئ ليها في كل مرة يخليها داخلة بعضها،تبسم و فرح كيف فهم انو مزال عندو تأثير كبير عليها..زاد قرب اكثر لدرجة انفاسهم تخلطت هز يدو على خطها يتحسس فيه بكل حنية و في عينو لمعة عشق الدنيا الكل ليها و البيد الاخرى كبسلها على يدها،حالتو ما كانتش تبعد على حالتها هو زادا كان مش فاهم روحو و لا شنو هلي يعمل فيه،علاه ما نفذش وعدو لروحو بإنو يسيطر على قلبو و تصروفاتو في حضورها علاه يدو خانتو و تمدت ليها و ساقيه الي جابتو جري لعندها اول ما عرف انها فالشركة،وينو كلامو لروحو كيف تعهد انو يتقوى قدامها و يتحاول يتفداها بأي طريقة و مهما صار حتى لو بادرت هي و حكات معاه والا حاولت تتقرب منو انا صعيب و هو متأكد انها مستحيل تقدم هي بخطوة هكا يعرف عزة نفسها و صحة راسها و من نهارت الي جاء لا عبرتو و لا خزرتلو حتى بشطر عين ظاهر انها ماخذة موقف عالاقل هي خير منو و كانت اقوى و نفذت الي عزمت عليه و هو توا الي قاعد يلف و يدور قدامها حتى جابتو ساقيه ليها..حرك راسو بالشوية محاول انو يخرج هالافكار الي مش وقتها و يعيش هاللحظة الي جاتو صدفة من غير حساباات،يزي ما تعذب قداه عندو ما ملاش عينو منها و قداه ما تحسسش نعومة بشرتها الي يعشق رطوبتها،قداه ما شمش ريحتها الي تخدرو و تخليه مرهوج..وقف اما مزال مطبس عليها نظراتو اخترقو كل انش منها و كلات عينها ماكلة،غمض عينو للحظة و حلهم حرك صوابعو بخفة على خدها يتحسس فيه، هزلها يدها الاخرى قربها من شفايفو و طبع بوسة طويلة عليها...
و بعد لحظات صمت مش طويلة تكلم بصوت واطي هادي كأنو يوشوشلها و ما يحب حد يسمعو غيرها رغم وجودهم وحدهم في البيرو،يحكي و يتأمل في وجها لعل و عسى يفهم حاجة من تعابيرهم الي كانت جامدة ما تبدلتش..
-توحشتك..متعذب من غيرك و بعدي عليك قاتلني.البعد الي فرضتو الضروف عليا بالسيف و انا فرضتو عليك..مش عارف لوقتاه باش نتحمل و وقتاه باش يوفى هالكابوس الي فرقنا الناس الكل على بعضنا و حرقنا بنارو الي لتو ما طفات و مزالت باش تشعل اكثر و اكثر😔
رغم كلامو الي كان كلو ألغاز و ما فهمت منو شي الا انها حست بكمية وجيعتو و صدق الي قالو مع انو الي سبق و عملو عكس الي حكاه..مش كان يدها ترعش بين يديه كانت بكلها كيف الي واقفة في مهب ريح،حاسة بدنها الكل يفبري قدامو و قاعدة تحاول انها تسيطر عليه و ما تظهرلو شي..عاودت هزت عينها فيه كيف رجع يحكي..
-رغم الضروف الي فرضت انو نتقيد بيها بالسيف و رغم الوعد الي قطعتو الا اني مش عارف جيتك ساقي اعلى من راسي تول ما سمعت انك هوني،مش عارف شنو الي جابني و شنو المغزى من جياني كأنو على اساس باش تتبدل حاجة😏ممكن خاطر الي جاي باش يكون صعيب و خبيت نستمد قوتي منك بما انك سبب هالصبر الي فيا و قوتي الي نستمدها بمجرد خزرة عينك ليا و تبسيمتك الي تبعث فيا الروح من جديد..دانا خليك معايا..استناني اكثر شوية..انا ليك وكان عرست بنساء الدنيا الكل فاللخر الرجوع ليك انت وحدك.. و انت ليا انا لجوزيف الي عشقك و مات فيك و مزال.. كيفك ضايع و جاهل وين باش ترسي بينا هالسفينة،يا نكونو في بر الامان يا ياكلنا الحوت.. نعرف ما عنديش الحق و لا الصلاحية اني نقلك استناني اما باش نمنح روحي هالحق حتى لو بالغصب خاطر متاعي..(بدات ملامحو تتبدل للغش و صوتو بدى يعلا😡 يحكي بكل استحقاق) اما انت ما عندكش الحق تسألني شي و انا مش ملزوم باش نفسرلك والا نبررلك حاجة هذي مش مشكلتي و ما يهمنيش..انت وعدتني دانا.. انت الي وعدتني انك تصبر معايا و تستناني مهما يصير لازم توفي بوعدك و رد بالك تخلف بيه كان نعرف نقتلك و ما تكون لغيري..نقتلك و لا نتخيلك بين يدين راجل غيري.. ما تخليش المظاهر تخدعك و حاول اقرا بين السطور..ما تصدقش عينك مش كل حاجة نشوفوها صحيحة..
و في غفلة منها شدها بخفة من رقبتها و جبدها ليه لصق شفايفو على شفايفها طبع بوسة طويلة تغلغل فيها بلسانو لأعماق روحها و حرك كل حاجة كانت ساكنة فيها،
بوسة هادية من طرف واحد بدات تتحول بعد لحظات قصيرة لبوسة عنيفة..
أنت تقرأ
عندما يعشق الشيطان الجزء الثالث
Romanceالجزء هذا القيناه مش كامل الي كاتبتو ماكملتوش نحنا كملنا حلقات للجزء هذا و عملنا جزء رابع يهبط بعد هذا الكاتبة الأصلية: أثير كمالة الجزء هذا و الجزء الرابع بقلم : #hyba & #Ritta