(حطواااا جاااام قبل ما تقرااااو )
الحلقة 18:
تبسم جاد بوجيعة و رجع قعد تكى راسو لتالي و غمض عينو يحكي ببرود و وجيعة عمرهم ما لاحظوها فيه..
-اليوم جنازتي هههه😢و اليوم تبعثت من جديد اما جاد صغرون و اليوم زادا طلعت روحي للسماء مرة اخرى اما ما وصلتش و قعدت معلقة،نعرف ربي يعاقب فيا و هذا مصير كل قاسي متجبر ما يملكش في قلبو ذرة رحمة لا على روحو و لا على خلق ربي،هذا مصيري راضي بيه و الحمدلله اما يا ليتو جاء بكري شوية وقت كنت بلاش قلب..وقت كنت شيطان و في اوج جباروتي،وقتها على قلبي احلى مالعسل نموت ما نموتش ما على باليش، اما ربي يعرف شنو يعمل و فعلا يمهل ولا يهمل..(سكت شوية و رجع يحكي عبارة يخاطب في روحو) نموت و تتقاملي جنازة،يسكت قلبي و يرجع ينبض في نفس الوقت يسكت قلبها هي..يسكت قلبي ،و انا السبب،انا تعبتها،ااااه حملك ثقل يا جاد يا ويلك من ربي(هبطت دمعة سخونة بالنار الي شاعلة دخلاني فيه، سالت على خدو من عينو الي مزالت مسكرة) يسكت قلبي اما يرجع ينبض بدقتين،بروحين الف حمد و شكر ليك يا ربي روحي رجعتلي اما مازلت معلق مانيش فالدنيا،معلق لا سايعتني ارض ولا رافعتي سماء،فرحتي بولدي ناقصة،اصلا انا مش حاسس بالفرحة في غيابها،هي فرحتي و سبب تبسيمتي،هي قوتي والي مقويتني،اليوم انا ضعيف وينو الجباروت و القوة و السلطة و الجاه؟😏ويني عجرفتي و قسوتي؟وينو دمي البارد و جبل الجليد الي كان فيا؟ وينو الشيطان...
-ايهم:يزي جاد اسكت،عمري ما ريتك هكا و لا نحب نشوفك بالحالة هذي و لا نحب نشوف ضعفك الي ما نتفكرش نهار ريتو،ايثار سبب قوتك و انت قوتنا و بيك هي تتقوى زادا،لازم ترجع تاقف على ساقيك مش وقت اتطيح و تتهد توا هي في امس الحاجة ليك و يزي من تأنيب الضمير الي تركب فيه لروحك ما عندك حتى ذنب فلي صار هذي مشيئة ربي، لازمك ترجع قوي و تاقف مع ولدك شنو ذنبو هو ما تفرحش بيه كان تعرف ايثار الحاجة هذي باش تتجرح و برشا زادا😢
-آزر: جاد ايهم عندو الحق والي تعمل فيه في حق روحك غالط،فيق ملي انت فيه و ارجع كيف ما نعرفوك والا عاللقل حاول تتقوى على خاطرهم و تعرف مليح انو احنا معاك لحظة بلحظة و خطوة بخطوة كيف ما سبق و كنت معانا..قوم روح ارتاح خلي جوزيف يجي في بلاصتك باش يموت الراجل و هو محصور فالكرهبة و صرعنا بالتاليفونات
-جاد:لا امبوسيبل نروح ما نجمش نخليهم وحدهم
-ايهم : احنا معاهم و تو يخلط دجو و الدار الكل عادك بيهم وصلو
-آزر:برا روح شوف حالتك كيفاه اعمل دوش و ارتاح مدام الجماعة جايين و ما تخلي حد يشوفك منهم
-جاد:باهي هاني قايم ما نبطاش ماكس ساعة و نجي ديجا لازمني نجيب لايثار و جاد ما لازمهم،كلم دجو يطلع و وصي الطبيب كيف يجيو الدار ما يخليهمش يطولو حذاها
كمل تفاهم مع الاولاد و تعدى للطبيب المسؤول على حالتها دق الباب و دخل،هز الطبيب راسو و تبسم كيف شافو نحى ليناتو و شاورلو بيدو😊
-مسيو جوزيف مش هكا،تفضل
تبسم جاد بالسيف و جاوبو براسو معناها اي و دخل قعد عالكرسي مقابلو و القلق و الخوف ماكلينلو قلبو الي ضعف و معاد قادر يتحمل مصايب اكثر من هكا كل شي صار قبل و تعدا بيه في حياتو الكل في كوم و الي صار اليوم و عاشو في كوم آخرخاطر تعدى طاقة تحملو و صبرو،ما يعرش علاه جاء للطبيب مع انو الطبيبة سبق و فسرتلو كل شي اما ممكن كان عندو شبح امل انو فما حاجة اتطمن اكثر ما عرفهاش💔
دكتور طمني مرتي شنو حالتها توا ما تخبيش عليا و وقتاه باش تقوم مالغيبوبة،و ولدي بعد ما عاينتو حالتو تجاوز الخطر؟😢
-هدي روحك مسيو جوزيف اول حاجة نتقدم بتعازيا الحارة ليكم ربي يصبركم سمعت انو اليوم يصادف جنازة المرحوم مسيو جاد الي لقاو جثتو اخيرا بعد عام الحاجة الي كانت سبب صدمة مدام ايثار و الحالة الي هي فيها توا..الدكتورة الي كانت مشرفة عليها و مختصة في امراض النساء و التوليد نظن فسرتلك، بون ما نخبيش عليك صدمتها كانت قوية برشا و الي صار اليوم نقلك راهو معجزة الاهية كبيرة سوى من ناحية المريضة والا البيبي الي تجاوز المدة الي كان مفروض يتولد فيها في الحالات الي هكا البيبي كان يموت في كرش امو و كان ما ماتش وقتها يموت كيف يتولد ديراكت اما الي صار بالحق كان عكس توقعاتنا و خلاني انا شخصيا كبروفيسور و طبيب ننظر في الحكاية و باش نزيد نتعمق في دراستها..نرجعو للمريضة و بعد ما تناقشت في حالتها انا و دكتور مختص في علم النفس و عاين حالتها و باش يكمل يتبع حالتها حتى بعد ما تفيق ان شاء الله فسرلي انو صدمتها كانت قوية و هي استقوات على روحها و على كل شي و حملت روحها اكثر من طاقتها ما نعرش انا كيف ما نقولو كانت متوقعة حاجة مطمانة بيها و صارت حاجة اخرى عكس حساباتها و هذا اثر عليها من جميع النواحي و خلى ولادتها روتار برشا نزيدو عليهم الاسباب الي فسرتهملك الدكتورة اما حمدلله البيبي تجاوز مرحلة الخطر نسبيا اما ما نجموش نخرجوه والا نحطوه مع امو لازم يكمل تحت المراقبة في 24 ساعة الجاية عالاقل..بالنسبة للغيبوبة كيف ما تنجم اتدوم نهار كيف ما تنجم اتدوم جمعة و ثنين و شهر و هذا يعتمد على قوة المريض و تجاوبو مع العلاج و الدواء و اصرارو انو يعيش و الاهم من هذا اذا كان عندو اسباب تخليه يتشبث بالحياة اكثر و يصر انو يرجع يعيشها على خاطر اشخاص والا اسباب معينة تعنيلو برشا..للاسف هي توا مش قاعدة تتجاوب و بدنها ما عطى حتى ردة فعل فالساعات الي تعداو و للاسف زادا نقلك انو و هي فالغيبوبة مش قادرة لا تسمع و لا تتجاوب و لا حتى شي..هذي حالتها حاليا بما انو اول نهار و مزالت كيف دخلت فالغيبوبة هذا كل شي حد الان و ان شاء الله الايامات الجايين تتحسن حالتهم اكثر الزوز خلي ايمانك بيهم و بربي كبير و باذن الله لباس..
سلم عليه و خرج بعد ما شكرو،يمشي يكر في ساقيه بالسيف مش عارف يفرح و الا يخاف و يحزن و الا يخلي عندو امل،ما عرفش كان كلام الطبيب زادو قلق والا ريحو خاطر معادش عارف شنو يحس والا شنو يحكي حتى بينو و بين روحو،يمشي مش عارف لوين لحظات و لقى روحو واقف يخزر لولدو مالبلار،استوعب و فاق من دوامتو قلبو خض في صدرو و دقاتو قوات ما نجمش يقاوم الدموع المتحجرة في عينو على اذاكا طلق سراحها و خلاها تهبط على خدو خاطر معادش عندو قدرة انو يمنعها،هز يدو الي كاانت ترعش حطها عالبلار كأنو يتحسس في ولدو،كل شي فيه ترخف حتى ساقيه رخت بيه و معادش حاملينو اما تمالك روحو بالسيف،معادش عندو جهد باش يتصنع القوة الي كان يتصنعها المدة لفاتت الكل،معادش عندو قوة يتظاهر بالبرود و الامبالاة بعد الي كانو صيفات ما تتجزأش منو...رعشة سرات فيه و خلات لحمو يقشعر،لاول مرة يحس كل شي غريب عليه،قاعد يعيش في احاسيس و حاجات جديدة غرابتها محلاها طاير من فرحتو الناقصة بولدو..هذا هو احساس الراجل الي يكون فيه بو لاول مرة؟؟ اما ناقصة من غيرها،العايلة مش كاملة و متفرقة كل حد في شيرة و هو وسط كل شي،فرحة ما تكمل كان بيها و بوجودها معاهم و قتها تكمل العيلة الي علمتو هي كيفاه يحلم بيها و كيفاه يأسسها،هو رب هالعيلة المصغرة توا لازمو يحميها و ياقفلها و ما يخلي حد مهما كان انو يهدها حتى لو هالحد هو نفسو.
أنت تقرأ
عندما يعشق الشيطان الجزء الثالث
Romanceالجزء هذا القيناه مش كامل الي كاتبتو ماكملتوش نحنا كملنا حلقات للجزء هذا و عملنا جزء رابع يهبط بعد هذا الكاتبة الأصلية: أثير كمالة الجزء هذا و الجزء الرابع بقلم : #hyba & #Ritta
