عندما يعشق الشيطان الجزء الثالث

الحلقة العاشرة

(حطواااااا جااااام قبل ماتقرااااو)
الحلقة10:
تعدا الوقت فيسع و جا الليل،الليل الي ظلامو مالي الدنيا و منور قلوبهم رغم تعبها و صبرها،رغم حنين و وحش اشهرة تعدات عليهم اعوام..
الليلة هذي تعدات زادا و كانت ليلة طويلة على عالاولاد و هوما كل حد مطيش في شيرة كل واحد فيهم شاغلتو حاجة، المهمة الي يخممو فيها نهار و ليل و ساكنتلهم في قلوبهم تفكيرهم الي مركز على الف حاجة و حاجة و هذا غير مشاكلهم الخاصة الي مخليتهم متحيرين و متقلقين اما صابرين خاطر ما عندهم حتى حل آخر كان انهم يصبرو...
كانو ملمومين كيف العادة يبحثو على اي حاجة تنجم تعطيهم راس خيط يتمسكو بيه و يتناقشو على ادق كل التفاصيل الي عندهم،كل حد غاطس في حاجة آزر الي كان قاعد فالقاعة كيف العادة متربع الكاسك على رقبتو لابس ليناتو و مركز فالبيسي الي قدامو و صوابعو ما تتاراش ما كثر ماهو حاط مخو الكل و يفركس في حاجة ممكن انها توصلهم ل آد جين، جوزيف الي كان واقف و في نفس الوقت متكي على الطاولة في يدو كاس قهوة يحاول يصحصح بيها شوية و يحكي مع جاد الي كان قاعد و كل اذانو صاغية مركز معاه و مع كلامو الي يشرحلو بيها في الخطة الي عملوها باش ينجم جاد يدخل لبيرو آد جين، الوحيد الي كان همو هم آخر و عقلو مشوش و مشاعرو مفرعسة هو ايهم الي من وقت خروجو من دارها و هو يغلي دخلاني و يخمم ما نجم يحكي لحد فيهم مع انو محتاج انو يحكي و يفضفض و يفرغ قلبو الي يحس فيه باش يتطرشق،حضورو بيناتهم كان زايد خاطر كيفو كيفو عدمو كلمة يسمعها و عشرة لا وقت يقول لازمني نركز و نتبعهم لحظات و يلقى روحو رجع لدوامة افكارو و رجع يخمم فيها و فالاحساس القوي الي يعاود يتحير عليه و يحسو من جديد وقت يتذكر البوسة الي جمعتهم و وحدت مشاعرهم😍...
الوقت يجري ما حسو بشي زرقت عليهم الشمس و هوما كل حد مطيش في بلاصة، كان ممدود عالفوتاي الي مقابلة البركونة الكبيرة الي تطل على ساحة بياتزا نافونا و منظرها الساحر،هز روحو بالسيف و قام عمل دوش فماش ما يصحصح شوية و ينشط و يستجمع افكارو الي تبعثرت ليلة كاملة،نهار اليوم مهم برشا بالنسبة ليهم و ينجم يكون نهار الحسم و اليوم الموعود الي باش توفى فيه رحلة البحث على المعلومات و الادلة القاطعة الي كانت سبب جيانهم لروما، احداث نهار اليوم سوى كانت ناجحة او فاشلة النتيجة جاد هو الي باش يحددها و بيها يتحدد مصيرهم و مصير مهمتهم الي توا باش تبدا،اليوم لازمهم يلقاو طرف الخيط الي باش يتشبثو بيه و يوصلهم لآد جين و كل ما كان اسرع كل ما ربحو الوقت و كان لصالحهم اكيد..
كمل لبس ريقل امورو و هبط يلقى الاولاد قامو و جوزيف كالعادة يحضر فالفطور الي دوب شم ريحتو حس بالجوع قعد جنب آزر لكان ميت بالنوم بعد ليلة البارح الي عداها عالبيسي ،كان يحاول يصحصح و كل ما يتغمضو يرجع يحلهم بزربة كيف المرعوب من حاجة😩خزر لجاد على جنب
-ما علموكش تصبح 😒
-جوزيف:قليل حياء بلاهي شباش يجي منو😛
-جاد:صباح النور،سامحوني يا جماعة والله مكوفخ و راسي في حالة😩
-أيهم:صباح الخير
جاي يمشي يكر في ساقيه و بالسيف يحل في عينو جبد الكرسي و قعد
-آزر:يا والله عملة شهالحالة لا واحد فينا مصحصح كيف العباد جينا في النهار الي بيه الفايدة و بركنا رجع علينا تعب السهر و قلة النوم برا عاد توا شباش يحزها😣
-جوزيف:اي فيقولنا شوية عاد يا جماعة افطرو مليح فماشي ما ترجع فيكم الروح شوية، و انت جاد اليوم يومك يا فوق سابع سماء يا تحت سابع ارض اي حاجة باش تصير اليوم مهما كانت بسيطة هي بالنسبة لينا مسألة حياة او موت ركز مليح عيش خويا الزلقة بحسابها..
-جاد: ان شاء الله ربي يوفقنا و تتعدا هالغصرة على خير..نعرف كل واحد فينا بحكايتو و الاربعة جمعتنا حاجة وحدة و هي الانتقام،الانتقام من نفس الشخص و  جمعتنا الصدفة و القدرة باش نكونو صحاب و يد وحدة ضد نفس العدو الي كان سبب في خسارة انسان عزيز علينا و سبب في تدمير حياتنا و حياة غيرنا😢
قام آزر من بلاصتو بعد ما سرح مع كلام جاد الي زاد حيرلو جراحو و خلا عينو تلمع لمعة شر مخبية وراء ماسك البراءة الي ديما على وجهو😈تبسم على جنب تبسيمة قوة توحي بنصر جاي،تبسيمة حلوة هادية بين الحسرة عالماضي الي تعدا و مستقبلو الي ممكن يضيع بسبب نفس الماضي الي لتو يتبع فيه، حاول يبعد هالافكار الي لا الوقت وقتها و لا البلاصة مناسبة باش يخمم فيها،قام و  رجع مد اباراي صغيرة ترونصبارونت لجاد
-شد هذي حطها في وذنك ما تنحيهاش باش تعاونا إنا نتواصلو معاك و نوجهوك كيف تمشي لدار اليزا رد بالك تضيعها راهو من غيرها ما يصير شي،تره اقرب خلي نركبهالك و نجربوها
كمل آزر ريقلها و رجع قعد عالفوتاي بعيد عليهم شوية و على مشيتو جاد سرح و نسى روحو بدا ياكل مش هوني جملة و آزر ريقو شاح مسكين و هو يكلم فيه بالشوية يجرب فالفوليم متع الاباراي و لاخر شي ولا على بالو آزر طلعو العصب و وجهو حمار مالغش لا يزي فاشل و بالسيف يتكلم زيد كمل عليه جاد ببرودية الدم متاعو شخلاه ولى يعيط و يصيح😠 جاد تهز و تحط تفجع من صياح آزر الي طرشلو وذنو
-يعمبوك و بو تراب بوك يا كلب هكا وذني يا خرا😠
-طرش يشدك ان شاء الله و انت ما تسمعش ساعة و انا نبرح عليك و سيادتك مش هوني😡سي بون اوكا مريقلة
قام رجع حذاهم و مدلو تاليفون
-جاد:و هذا شنو زادا عندي تاليفوني😒
-آزر:تاليفونك خليه خوذ هذا تستحقو اكثر،كيف تجي باش تتدخل انزل عالبوطون هذي يخرجولك زوز سنون صغار تحطهم عالاكرون الي في باب البيرو باش انجم انا نحلك الباب و زيد فيه فلاش في صورة ما فما بيسي والا حاجة تنسخ المعلومات الكل فيه و فيه كاميرا باش تصور الي نستحقوه😉
-جاد:اوكي الزو،كهو سي بون معاد عندك ما تعطي
-آزر خمج مخو😂:الي مزال ما يتعطاش ليك انت صاحبي😈
-هامل زايد 😒اما يقول القايل كان تطلع الشيفرة الي باش تحطها انت غالطة و يطلع عمك آد جين حاط سيستام الارم للاكرون و تعمل هكا و تفزع الدنيا شعملنا و جاء مليح وقتها 😒
-ايهم:وقتها تهردت علينا  يطيح كل شي فالماء و استنا عمك آدجين و تفرج فالعرض الي باش يعملهولنا وقت يفيق بينا 😂😂
-آزر :انت بلع فمك نعرف تكهناتك زبلة و اذا حليت عينك في حاجة عليها السلام و برا😒 جاد اخدم خدمتك بابا و خليني انا نخدم خدمتي و الستار الله كيف ما قال دجو ركز انت باش انجمو احنا نركزو و راهي الزلقة بفلقة شيحتلي ريقي برا الله يشيح ريقك يا هم 😧