#مريم
الحلقة 1
مريم بنت حلوه عيونها عسليه بيضاء جسمها حلو شعرها اسود
جمالها خلى اي حد يشوفها يتمنى يتحصل عليها
كانت تقرا جامعه و كان هدفها تكمل قرايتها و بس كانت متفوقه و مستواها الدراسي ممتاز
كانوا صاحباتها كل وحده مدايره علاقه و تكلم في هذا و هذا و هي بالرغم جمالها و انوثتها الا انها ما دارتش علاقه و لا حبت نهائي
عائلتها كانت تتكون من أخ و أخت و أمها
و في يوم خوها أحمد تسكرت سيارته و ما لقاش المفتاح اتصل بي حسام صاحبه قاله امشي للحوش و جيبلي مفتاح الاحتياط و اتصل احمد بي امه و قالها جايك صاحبي اعطيه المفتاح الاحتياط
....................
نادتني امي قالتلي حسه الباب شوفي شكون مرات صاحب خوك .. نزلت و كان شكلي مبهدل و حالتي حاله فتحت الباب و كان حسام صاحب احمد خوي واقف اول ما شافني ابتسم و انا ابتسمت وسلمت و اعطيته المفتاح و خشيت كانت لحضات لكن حكاية عمر ..
حكاية عمر هزت كل شي فيا ♥️
ركبت داري و انا في غيبوبه شن الي صار ! خيرني ! سرحانه ! خيره قلبي يدق هكي ! قصدي عادي اعطيته المفتاح و تم علاش قاعد الموقف في ذاكرتي !!
قلت خلي نخش نقرا و خلاص و بمجرد ما فتحت كتابي قعدت نتخايل في وقفته و سلامه فجأه خطر ع بالي نشم ايدي لقيت ريحتها عاديه و كأني ندور على شي فيا يخصه
شن الي صارلي قصدي حتى شكله عادي مش واو يعني
كان جسمه رياضي متناسق لحيه خفيفه عيونه كبار ناعسات و رموشه كبار ضحكته قصه بروحها
سكرت كتابي و فتحت فيس و خشيت صفحة خوي ندور عليه من بين الاصدقاء و ما لقيتاش
قررت ندور في اللايكات كلهم و ما لقيتاش
هنا انا قعدت نقول انا شن ندير و علاش هذا كله استعوذت من الشيطان و نضت نضم في الحوش
روح احمد و قعد يحكي لي امي قصة السياره و قالتله امي باهي الي خليت الاحتياط عندي قالها الحمدلله جابهولي حسام و مشت الامور قالته امي كيف حال امه حسام ؟ قالها هوينا في تونس قاعده تعالج و قاعد معاها ولدها الكبير .. طلع احمد قلتلها امي شن عرفك ان امه مريضه ؟ قتلي مش يومها قتلك هي امشي معاي للعياده نشوفوا ام صاحب خوك ؟ و انتي ما تبيش ؟ قتلها به ! قتلي هادي هي
اها به كيف حالها توا قتلي عاد سمعتيه خوك شن قال توا
تجاهلت كل شي و رجعت نهتم بي قرايتي بالرغم ان احمد لما يروح بيا من الجامعه مرات يبدا معاه حد من صحابه بس حسام كان اول مره نشوفه
تاني يوم مشيت جامعتي و جوي جميل و لما روحت فتحت الانستا و دورت على اسمه و ما لقيتاش و فتحت فيس احمد خوي تاني و بديت نخش بالاسم للصفحه و نشوف الصور البروفايلات لين لقيته و قعدت نتفرج على صفحته و صوره و كل صوره نتأمل فيها وقت
نفكر نكلمه او لا ندير لقطه او لا نعرف بي نفسي او لا
قررت ننسى هداكا الموقف و نفوته و نلهى بي قرايتي
فات وقت لاباس بيه و كملت امتحاناتي و في يوم جتني امي قتلي اليوم بيرفعني خوك لحوش صاحبه امهم كانت مريضه تعالج برا و روحت قتلها ام حسام ؟ قتلي ايه بعدين قتلي شن عرفك ام شكون ؟ قتلها لا عادي غير المره الي فاتت سمعتكم تحكوا عليها
قتلي اهاا به
قعدت نفكر كيف نقولها نمشي معاك .. و نمشي او لا ؟
جيتها قتلها مكسده و خاطري ضيق نمشي معاك عادي
قتلي من وين جاتك تبي تمشي معاي ؟
قتلها اهو كساد و خلاص
قتلي به وتي روحك
نضت نجري نوتي في روحي و نخمم شن نلبس و كيف بنسلم و شن بنهدرز و و و
وتيت روحي و جى احمد و رفعنا
و هنا كانت الصدمه
حوشهم كان قصر و جهة راقيه و لما خشينا كانت عندهم شغاله و الاثاث فخم و الحوش و لا في الخيال
اخواته و مرت خوه جوا سلموا علينا كل وحده ارقى من التانيه
وقتها حسيت انه بدا صعب الشخص هذا
انا انسانه بسيطه و نشري في الحوايج من العيد للعيد و مرات امي تعطيني ناخد حاجات بسيطه من احتياجاتي الخاصه
هما وين يا مريم و انتي وين
كانوا مذواقين في التقديم في الهدرزه في كل شي
اخته عايشه في بريطانيا حكت على يومياتها و كيف عايشه
اما انا و امي كنا نردوا كلمه كلمتين و بس و عزمتنا اخته الكبيره على عرس بنتها في الصيف
جى احمد بيروح بينا و احنا طالعين كان حسام واقف على احمد
بمجرد ما شفته حسيت بربكه عجيبه حطيت ايدي على قلبي من كثر نبضاته تنفسي مشيتي تفكيري تصرفاتي كل شي اختل توازنه
ركبت السياره و جى حسام يسلم على امي و عيوني فيه و هو و لا تلفت حتى جيهتي قالتله امي باش تجي تتغدى عندنا نهار تاني قاللها حاضر من عيوني قلت في قلبي تسلملي عيونك يارب و روحنا
اول ما خشيت داري اتصلت بي نهى صاحبتي و حكيتلها كل التفاصيل قتلي شكله اعجاب او حب من طرف واحد و قعدت تضحك عليا
شدتني كلمتها هلبا معقوله انا بنحب شخص من طرف واحد !!
هذا خيره مغرور و تافه و شايف روحه مش عارفه على شنو اصلا
قررت ننسى قبل ما نبدا اصلاً
بس ما قدرتش
بعد مده بعتتله اضافه ع الفيس و تجاهلني لا ضافني و لا كلمني خاص و لا كأن شاف اضافتي
ياربي لا قدرت نشيله من راسي و لا قدرت نوصل فيه
لغيت اضافتي و حسيت بأهانه في داخلي
مش انا الي نتعامل هكي و كل راجل يتمناني
ناس عايشين يسافروا كل شهر و كل مره دوله سياره وحده من سياراتهم بحق سيارات شارعنا كلهم
على قولة امي الناس هادوا مش لينا
و في يوم نوضتني امي الصبح قالتلي بنطلع ناخد شن ناقص جاي صاحب خوك بيتغدى هنا
نضت من عز نومي قتلها خلاص توا نساعدك
نضت طيبت معاها و ضميت و بخرت و دوشت و رتبت كل شي .. على قولة امي الناس الناس مش جايين يخطبوا فيك
شديت روشن داري نستنى امته يجي لين سمعت صوت سياره
ياربي هادي سيارته 😨 !!
كانت Bmw
آخر موديل نزل حسام لابس جاكيت كحله و شال و سروال بيج
و كأنه الرجل الوحيد على هذا الكوكب
خش حسام و احمد خوي و معاهم واحد تاني نزلت لي امي و انا دايخه و كان الممر كله ريحة عطر رجالي
ياا الله شن الي قاعد يصيرلي
تغدوا و خش للحمام يغسل في ايديه و طلعوا و انا خشيت الحمام لقيت فيه خاتم رجالي ع الرف
زعمه الخاتم لي حسام او لصاحبهم التاني ؟
خديت قمته عندي و ما قلتش عليه لي امي او احمد و احمد ما سألش عليه
و قعدت هكي كل يوم نخش على صفحته نشوف في صوره و نصكر و كل ما نشوف صوره ليه نقوله مش عارفه علاش مغرور و شايف روحك انت تحمد ربي اني مهتمه بيك
و بعد فتره قالنا احمد ان اخت حسام عازمتنا على عرس بنتها
فرحت و حسيت انها فرصتي قلت لازم نخليه يشوفني و نعلقه بيا و بعدها نتجاهله و ننتقم لنفسي لان مش انا الي يتجاهلني رجل
لاول مره في حياتي نصبغ شعري كستنائي و عكس على لون عيوني و غيرني هلبا اللون
طلعت لبستين لبسه يوم الحنه و لبسه يوم الحفله لفيت شعري و حطيت ميك اب و رموش و لبست قفطاني كان لونه برونز قصير هلبا و ضهره كله عريان و لبست شخشير لحمي و شوز بكعب عالي و اكسسوار خفيف
ركبت انا و امي في السياره و في الطريق استغربت ان نفس طريق حوش حسام قلت لي احمد خوي علاش جايين من هنا ؟ قالي اختهم حوشها صغير و عازمه ناس هلبا ع الحنه مشت دارتها في حوش امها
زادت فرحتي و قعدت نفكر كيف نخليه يشوفني و شن ندير و كيف نتصرف ؟
وصلنا للعرس و خشيت نحيت عبايتي و كانوا يحطوا في عشاء الناس و مزال ما بدتش الحنه قاعدين يعولوا
خدت مني اخته عبايتي و عيون الناس كلها عليا كان شعري لي نهاية ضهري نازل
قلت لي اخته نساعدك في حاجة قتلي لا في شغالات يهتموا بالعشاء لكن تعالي معاي نشوفوا الحلو و الكونفيتي و البكلاوه
حسيت ان امالي حسام كلهم عيونهم عليا لدرجة انهم ما نزلوش عينهم مني بكل
ركبت معاها للدور التاني و خشينا الدار و قعمزت على السرير الي فوقه بوكسات الحلو و قلتلها خلاص تو نهتم انا بكل شي هنا و نستف الكلينكس .. فرحت و قتلي اوك به
نزلت هي بتشوف ناسهم و ركبت مرت خوه و اخته التانيه هدرزوا عليا شويه و مشوا بيوتوا روحهم للحنه
و هي نازله اخته نسمع فيها تتكلم في التليفون تقول لي حد اركب دوش توا ما فيش حد فوق خير من بعدين تزيد تزحم
اااه قلبي
زعمه حسام الي يكلم فيها ؟
منو غيره به خوه الكبير متزوج و البديهي يدوش في حوشه !
اكيد هو
كيف نعرف شكون ؟
و شن ندير ؟
تفكيري تشتت
الي كنت نفكر كيف ندير باش يشوفني جابه ربي لي عندي
كملت نهتم بالحلو و البكلاوه و كل شي
خليت باب الدار مفتوح و كان ضهري يقابل الي بيخش الدار
نسمع في حد راكب الدروج و يتكلم في التليفون
يااااااربي هو و الله هو
هذا صوته
حسيت روحي بندوخ خلاص
في روح تانيه سيطرت عليا استحكمتني
في شي خدر جسمي كله
يا رب قويني
قرب صوته من الدار و كحيت انا بصوت خفيف و نضت وقفت
خش الدار
انصدم
قالي اسف نحساب وحده من اخواتي
طلع
ناديته
حسام
تلفت قالي نعم .. كانت احلى نعم احلى ن و احلى ع و احلى م
قتله انا مريم اخت احمد
قالي نعرف
كانت نظراته ليا تحكي هلبا اشياء قتله عندي حاجة ليك نبي نعطيهالك
قالي شنو
مشيت خديت الخاتم من شنطتي و اعطيتهوله
قالي خليه عندك
قتله ليش ؟
قالي خليه و خلاص
قتله انزعجت لاني بعتتلك اضافه ؟
قالي ابدا لا
قتله به اناااا
قص عليا كلامي و قالي انتي احلى بنت في الدنيا
انصدمت و تحشمت و حرارتي ارتفعت و توترت
عيونه كانوا بياكلوني حسيت بنفسه يتسارع
قعد يشوفلي هلبا و طلع فجأه
يعني هو مهتم زيني و اكثر حسيت روحي وصلت للي نبيه
و ركبت اخته و انا في حالة غيبوبه
قعدت تهدرز عليا لين طلع حسام من الدوش و هو طالع ناداته قتله الرزاطه مزال ما وصلتش و هو يكلم فيها من ورا الباب ما يبيش يخش يشوفني قاللها حاضر تو نكلم متع التوصيل نشوفه
قتله العقبه ليك ما باش يرد عليها و نزل و بعدها نزلت انا و اخته
و انا نازله من الدروج على مهلي نشوف فيه واقف تحت هو و امه و بنت اخته قام عيونه شافني و نزلهم
واضح انه متوتر و متلخبط
نزلت نادتني امه نسلم عليه حسيتها تبينا نشوفوا بعض او تبيه يحط العين عليا
مشيت سلمت قالتلي تعرفيه عاد صاحب خوك قتلها لا و الله اول مره نشوفه و ابتسمت ابتسامة مكر
شبحلي باستغراب و استاذنت و مشيت و كنت واثقه اني و انا ماشيه عيونه فيا
مشيت قعمزت جنب امي لين كلمنا احمد قال هي نروح بيكم لاني بنرجع نسهر هنا
روحت و خشيت داري و نحيت حوايجي و شديت تليفوني نتفاجأ برساله ع الفيس ع الانبوكس
حسام 😨
اهااااا يعني انت شفت اضافتي و عرفتني شكون و طنشت
و توا دوري انا نتجاهلك
كاتبلي في الرساله انتي ورده 🌺 و احلى ورده
يتبع ......... الحلقة 2
للكاتبه .. No name ♥️🌺
