#مريم
الجزء 14
خداني في حضنه و تغطينا و نضت قمت راسي و قعدت نتأمل فيه و نلعب بشعره و لحيته ...
كان يحاول يفتح عيونه لكن مش قادر و قعدت نضحك عليه و نقوله هذا الحب كل يوم يكبر ..
و نبوس في عيونه و خده و فمه ...
قعدنا في حضن بعض و بعدين فاق شويه و قالي حبيبي ..
قلت له روحها حبيبك ...
قال لي هي ننزلوا ناكلوا حاجة .. وقتها حسيته يبي يتهرب مني و خاطره يرقد معاي تاني بس ما يبيش يضايقني ..
خشيت غسلت وجهي و حطيت روج و لبست حوايجي و نزلت ..
لقيته في المطبخ بي بوكسر بس ..
كلينا فواكه و مكسرات و شكلاطه و شربنا عصير .. و قعد يلعب معاي و يقولي كولي مكسرات بالك دمك نازل 😉 🙈
كان جو حلو و يوم مميز .. اتصل بيا احمد و رديت عليه .. قالي تو نجي انا نروح بيك ما تروحيش مع نهى ...
خفت و انخلعت و قعدت نقول لي حسام هي هي نبي نروح حوش نهى ..
قالي حسام شن في ؟ قلت له احمد بيجيني يروح بيا و انا نخاف يوصل قبلي .. هيا نوض حبيبي وصلني حوش نهى ..
اتضايق حسام و قالي معاش نبي يصير هكي او تكوني خايفه و انتي معاي ..
لبسنا بسرعه و طلعنا و طول الطريق و انا نقوله بسرعه و راس حبيبي و حي عليا كان احمد يوصل قبلي و و و
رفعني حوش نهى و نزلت بسرعه .. و اول ما خشيت اتصل بيا حسام .. قالي ارتحتي توا ؟ ...
قلت له انا اسفه ... لكن ....
قالي مش معقوله لما كنتي حبيبتي واخدين راحتنا اكثر من توا !!
قلت له علاش انا توا مش حبيبتك ؟؟
قالي مريومتي بتقلبيها عليا توا ؟
قلت له لا ..
قالي خلاص تروحي الحوش كلميني .. قلت له اوك ..
جاني احمد متأخر .. و روحنا الحوش .. و قعدت نهدرز انا و امي ..
اتصل حسام و ركبت داري و قعدنا نحكوا لين خداني النوم ..
كانت الايام الي بعدها متشابهة ما فيهاش شي مميز ...
يومي كان محصور بين ترتيب الحوش و حلويات بسيطه تطير كساد العشيه و هدرزه خفيفه مع امي و اتصالات حسام و بس ...
بدا حسام في الصيام لان كان يبي بعد شهرين الصيام نديروا العرس .. و نسافروا ..
و في يوم جتني امي مستغربه قالت لي قولي شكون كلمتني و عزمتني ع العشاء غدوه !!
قلت لها شكون ؟ قالت لي سلفتك أسماء !!
استغربت قلت لها بمناسبة ؟
قالت لي قالت قلت خلي نعزم مريومه سلفتي و نديروا ليله حلوه قبل العرس ..
قلت لها و علاش ما كلمتنيش انا ؟
قالت لي هذا الي صار ... بما اني مش هاضمتها لكن لازم نمشوا عاد عيب ما تجيش ...
اتصلت بي حسام و قلت له أسماء مرت خوك عازمتنا ع العشاء ...
استغرب و قالي ما سمعتش و ما عنديش علم ...
قالي بتمشوا ؟ قلت له ايه ...
قالي الافضل ما تحتكيش بيها هلبا ... قلت له علاش ؟ قالي هكي و خلاص ..
في المغرب اتصلت بي رفيده و قلت لها و استغربت حتى هي ..
تاني يوم من الصبح و انا نجهز في نفسي و كأني ماشيه عرس .. و امي قالت لي احمد باش ترفعنا لي سلفة اختك ..
و احنا نوتوا في روحنا جت اختي مرام .. قلنا لها راهو احنا طالعين .. قالت عادي انا اليوم بايته هنا .. قالت لها امي خلاص ديري عشاء خوك و مش معطلين احنا ..
درت شعري ظفره ع الجنب و ميك اب خفيف و لبست قفطان قصير و واسع ابيض و كله زهر و الوان و ايديه عريانات بحكم الجو بدا يسخن ..
طلعنا و اتصل احمد بي حسام يعطيه النعته و طول الطريق حسام يوصف له في الحوش ....
وصلنا و خشيت انا و امي ..
و نحينا عباياتنا .. الغريب ان ما كانش في حد من امالي حسام !!! في اخواتها بس ...
و المفروض ان ام حسام موجوده و هكي الذوق يقول ..
قعمزنا و كان الحوش تحفه فنيه .. انبهرت بكل شي فيه ... كانوا اخواتها و امها و مرت خوها و جارتها موجودين ...
به علاش و لا حد من اهل حسام !!
قعدنا نهدرزوا و جو صغار خوه سلموا عليا ... كانوا مهذبين و ولدها كان اسمه سيف .. قالت لي هذا سماه حسام و قال بأذن الله يجيني ولد نسميه سيف الاسلام ...
قالت اخت اسماء الصغيره ( خلود ) اصلاً فيه شبه من عمه حسام طالع يهبل و نموت فيه انا ...
تضايقت منها و قلبي نار و ما كنتش نبي شي يبان عليا .. كانت لبستها مقززه سروال داخلي ضيق هلبا و خلخال في الرجل و اظافر صناعيه و شعر اسود و خراص في الخشم ..
حسيت يومها انهم يبوا يبينوا الترف الي عايشين فيه و يهزولي ثقتي بنفسي ...
القعده على طولها و انا نجامل و بس ...
و مره مره نشوف فوني نلقى حسام باعتلي رساله او انا نبعتله رساله ..
كان التقديم كله مبالغ فيه ... حسيت روحي في حوش ناس من الخليج ... او احنا عيلتنا بسيطه للدرجه هادي ...
و بعد ما تعشينا .. قالت لي أسماء تعالي نوريك حوشي ... و نضت معاها و دخلتني حتى دار نومها ... ... !!!!!!!!!!!
فجأه بدت خلود تبي تتقرب مني ؟!!!!!! قالت لي شن رايك يوم تاني نتلاقوا في كافي نفطروا ؟؟
قلت لها بس انا ما نفطرش في كافيهات ...
قالت اسماء نجيك انا و نمشوا مع بعض ... في داخلي احساس ان في شي غلط .. لكن سبقت حسن النيه ..
اتصل احمد : وتوا روحكم انا قريب نوصل ..
نزلت بحدا امي و لبسنا عباياتنا و سلمنا و طلعنا ..
بعتلي حسام رساله توصلي كلميني .. قلت له حاضر ..
طول الطريق و انا نقول شن فيها كان طلعت معاهم و خالطت ناس ... و طول الطريق امي تشكر فيهم لي احمد .. قال لها شن ما عندهمش بنت للزواج ؟؟؟ قالت له امي و شن بترضى بيك انت حتى حوش ما عندكش ؟؟ قال لها احمد تي يالله انا نرضى بيها و عاجبها تسكن معاك باهي مش عاجبها تملح .. غير جيتي امي كان هذا خرطت خرطه باهيه .. هذا الي مازال ما جابتهاش امها الي ما ترضاش بيا
روحت غيرت حوايجي و خشيت فراشي ...
اتصلت بي حسام و قعدت نحكيله كيف استقبلونا و شن حطولنا و شن هدرزنا ..
قالي حبيبي .. قلت له نعم .. قالي ما نبيكش تخالطيهم بكل ..
قلت له عزموني ع فطور و قالت لي اسماء نجي نرفعك ..
قالي لا لا لا لا ... طلوع معاهم ما فيش لا فطور برا و لا شي ..
قلت له شن المشكله لو طلعت ع الاقل ما نبداش زي الغبيه لا نعرف محلات ماركات لا كافيهات لا شي ..
قالي انا نبيك هكي و كان ع الكافيهات خلي نكمل الصيام و كل يوم نعزمك في كافي و نرفعك انا نعرفك بكل شي ...
كملنا هدرزه عادي و صكرنا الخط و وقدنا ...
تاني يوم العصر كلمني قالي بعد المغرب نخطم عليك شويه .. قلت له به اخطم توا .. قالي صايم ما نقدرش .. قلت له اوك تمام ..
جاني بعد المغرب جابلي ورد و شكلاطه .. قعد معاي شويه و بعدها قالي بنمشي و هو طالع قالي بالك تبي حاجة ؟ قلت له نبي سلامتك .. و باسني من خدي و طلع ..
خشيت قعدت نشوف في كيسة الشكلاطه و استغربت لقيت فيها فلوس الف دينار ..
شن هذا ؟ زعمه ناسيهم ؟؟؟ اتصلت بيه قلت له حبيبي في فلوس في كيسة الشكلاطه .. قالي نعرف خليهم مصروفك ..
قلت له بجد ؟ قالي المره هادي تحشمت نعطيهملك في ايدك لكن المره الجايه ان شاءالله ....
فرحت لان ما عمري خديت مبلغ زي هذا ..
قلت لي امي شوفي حسام شن جابلي ... قالت لي الخميس نعزموه ع الفطور هنا و تو نقول لي خوك احمد يعزمه ..
قلت لها انا نعزمه مش احمد .. قالت لي المهم يجي يفطر هنا و خلاص ...
قلت لي احمد يطلعني و شريت كل شي ناقصني للعزومه ..
و يوم الخميس من الصبح و انا في المطبخ تفننت في كل شي و درت اكثر من سبعة اصناف ...
و بعد ما كملت خشيت دوشت و لبست ..
و قبل المغرب جى حسام و خش هو و احمد للصالون برا .. خشيت المربوعه انا و فرشت ع البساط و حطيت الفطور و كل شي .. و ناديت احمد قلت له كل شي جاهز كان بتخشوا للمربوعه ...
جاب معاه بكلاوه و شكلاطه و عصير لوزيات ..
خشوا للمربوعه و انا و امي في المطبخ الي كان كله حايس و نخمم من وين نبدا فيه ..
احمد ينادي فيا .. هذا خيره شن في ناقص ؟؟ بعدين ينادي في امي .. ناضت امي و قلت لها خلاص شوفيه انتي شن يبي ... مشتله امي و سلمت على حسام و قال لها احمد نادي مريومه .. نادتني و مشيت سلمت على حسام ..
قالي احمد راجلك ما يبيش يفطر و قال نادي العيله يفطروا معانا .. ضحك حسام و قاله عاد هي تطيب من الصبح و ما نقولهاش تعالي قعمزي افطري معاي ما تجيش .. قاله احمد تجي تجي و قعدوا يضحكوا ..تحشمت انا و قعمزنا انا و امي معاهم ..
كنت متحشمه ناكل و متوتره .. قعدنا نهدرزوا و نضت درت قهوة و حطيت بكلاوه و كان يوم جميل ....
يتبع الجزء 15
No name ♥️🌺
