#مريم
الجزء 10
ما نبيش نرد على حد و ما نبيش نروح .. كنت نعيط و منهاره و وجعتني نفسي ... انت مش حاسس بي النار الي فيا .. انا ما عاقبتكش و لا طيحتلك قدرك .. انا نحبك .. نحبك يا حسام و ما كنتش قادره نتقبل الغلط الي درته و عاقبت نفسي بس ...
قالي اهااااا 🤚🏻🤚🏻 يعني انتي معترفه انه غلط !! ..
انهرت و نزلت على ركابي طحت و قعدت نبكي .. جاني قالي مزال خاطرك تعاقبي نفسك و تعاقبيني ؟؟؟
انا نشرب على خاطرك ... انا يوم سلمت روحي شارب و كله منك .. انا قلبي وجعني و كله منك .. نترجى فيك ما تمشيش حوش خالك و انتي شي كأن كلب الي يجري وراك ...
انا ما كنتش نرقد .. النوم ما نعرفاش ... قهوة .. دخان .. و بس ..
يوم انا في الحبس ريحتك و ضحكتك و كلامك و خجلك و نظراتك بين عيوني ...
نترجى فيك تفتحي تليفونك و انتي شي ... شن الغلط الي درته انا ؟؟ جيتك دارك ؟؟ غصبتك على شي ؟؟ فتحتك ؟؟
نقولك نكلم اماليك تقوليلي من قالك نوافق عليك .. 👏🏻👏🏻
شي صار بيني و بينك و نعرف مع من نديره انا ... انا راجل ما تلفت نظري و لا بنت و لا جعان .. يعني يوم مسيتك هذا لان قلبي يحبك .. و كنت مستعد نقرا فاتحتك من تاني يوم .. يوم الي قتلك نبي ( ز ) بتلبز بي دمك كنت قاصدها و نتمناها و من قلبي طالعه ...
قاملي راسي و قالي مريم ...
انتي مع راجل يحب المرأه تكون جنبه و ما يكونش هو وراها ... كيف ما تبي هي و على كيفها ...
نوضي اغسلي وجهك ما فيش داعي صاحبتك تشوفك هكي ..
نضت لبست و انا منهاره بالكامل .. و انا طالعه شدني يبي يحضني .. قتله سيبني نحيتله ايديه و طلعت ..
ركبت السياره و طول الطريق نبكي روحي بتطلع و حسام يحاول يشد ايدي و انا انحي فيها .. وصلنا لي نهى ..
كان زعلان زي زعلي و اكثر .. تلفت لي قالي قيمي راسك فيا .. ما قدرتش ... شدني من راسي و قالي انا نحبك و ما نبيش نزعلك ..
قتله اهااااا هذا كله و تحبني امالا كان ما تحبنيش كيف !!!!
قالي مريم ..... اكبري ..... لي امته بتقعدي طفله ... ارجوك اكبري ...
و ما فيش داعي تنزلي توا و تعاودي تزعلي و تديري زي المره الي فاتت ...
تلفت له و قتله لا ما فيش شي نزعل عليه ... مش بالسيف تمسني ...
نزل راسه و قعد يهز فيه يمين يسار و يقول مش عارف كيف تفسري في الامور ...
نزلت و ركبت مع نهى ... قعدت تقولي خيرك قتلها شافني صاحب احمد خوي .. قعدت تولول و تديرلي في حلول و انا في داخلي نقوللها ارجوك اسكتي مش ناقصاتك ...
وصلت للحوش غيرت و قعمزت قدام التلفزيون بعدها جت امي قعدت تقول في كلام مش مفهوم على اللمه .. و انا في عالم تاني ..
خشيت داري قعدت نفكر و خنقتني عبرتي .. معقوله يدير فيا هكي ! زعمه شن يقول عليا ؟ تو يقول هادي متعوده ع الجو هذا و مش اول مره .... بيصدق ان انا اول مره ندير هكي ... اااااه يا مريم .. شن نظرته ليا !! شن احساسه ليا ؟؟ زعمه هو بياخدني لاني اخت صاحبه و ما يبيش يطلع مش راجل معاي ؟؟؟ ايه صح هو هذا علاش بياخدني .. بعتتله رساله لو بتاخدني ع خاطر احمد انا ما نبيش ناخدك و مش موافقه عليك ...
اتصل بيا قالي شن دخل احمد ؟ شن فتحتك انا و حصلت فيك ؟؟ قعدت ساكته .....
قالي انا مش عارف كيف متفوقه في قرايتك كان دماغك هكي ...
قتله شن قصدك ؟
قالي مريم ... انا زحمه عندي من كل مكان جاييني الناس .. تفضى الدنيا نكلمك ..
صكرت الخط ..
و في داخلي نقول مغرور ......
اتصل بيا متأخر ما رديتش عليه ..
نضت الصبح نزلت لي امي قتلها نبي فلوس قتلي بري ارقدي .. قتلها بجد نبي فلوس نبي حوايج نبي مكياج نبي ملابس داخليه ما عندي شي زي العالم ...
قتلي ما عنديش خلي لين يروح خوك ... مشيت ضميت الحوش و طيبت الغداء و نهى في جرتي ها شن صار فيك عاود صاحب احمد لي خوك شن صار ؟؟؟ من كثر ما فددتني بي أسألتها قريب قتلها نكذب عليك ...
العشيه امي وتت روحها تبي تمشي لحوش حسام و جاها راجل اختي رفعها و انا ما قلت لها حتى نبي نمشي و ما اهتميت بكل ..
مشت و لما وصلت غادي قالولها علاش مريم ما جت معاك قالت لهم اهو قعدت عندها قرايه .. اتصلت بيا رفيده قتلي وتي روحك نجي ناخدك .. قتلها رفيده ما خاطريش و مره تانيه ..
قتلي مبارح خالي حسام كلم حناي عليك و قاللها نبيها .. انصدمت قتلها كيف صار ؟ قتلي هذا هو .. قاللهم كلموا اماليها و بروا اخطبوها و ممكن نهاية الاسبوع يسافر لي خوك احمد ..
فرحت .. طرت من الفرحه .. قتلي هااا شن نجيك ؟؟
قتلها به تمام ..
جهزت نفسي و جتني مشيت معاها .. كان الحوش معبي و زحمه هلبا و احنا نهدرزوا سألتني عمته مخطوبه ؟؟؟ قلت لا 🙈
قالتلها ميسون هادي لينا يا عمتي .. تحشمت و الزعل الي كان فيا راح من الفرحه و حسيت اني نبي نحضنه .. بس ما تخافوش قررت نسيطر ..
كانت هدرزة حلوه و ضحك و فرحه ... و لما جت عمته بتروح قالت لهم نادولي عليه نسلم عليه .. جاها كان لابس عربي و على راسه عمامه و ساعه و خاتم .. كنت واقفه في المطبخ و هو جاها من باب المطبخ من جهة الجنان الخلفي .. خدالي عقلي و قلبي و روحي و كل شي
سلمت عليه عمته و قعدت تبوس فيه و انا في قلبي نقوللها خلاص ياسر متعي انا هذا ...
روحوا و بدا يفضى الحوش خش حسام بيسلم على امي لانه بيروح بينا هو ..
قعدوا يهدرزوا كيف صار هديكا الليله و كيف خشوا مسلحين و كانوا مستعدين يرموا عليه هو و صحابه و كيف جبد سلاحه و رمى عليهم ..
كنت نقول في قلبي انا فخوره بيك فخوره بيك يا روحي ..
سألاته رفيده الراجل الي توفى بتصيم عليه او كيف ؟؟ قاللها بنصيم شهرين و تلفت لي قال غير ان شاءالله نقدرهم لان من غير انقطاع ..
تحشمت و وجهي بدا احمر و صارت فيا حاله و امي ما فهمت شي الحمدلله ...
ركبنا معاه انا و امي و في الطريق بعتلي رساله ( جنبك في كيسه دبري كيف تنزليها معاك ) تلفتت لقيتها جنبي بعتت له ( اوك )
نزلت من السياره و نزلت معاي الكيسه بسرعه و امي تشكر في حسام ..
خشيت دسيتها و غيرت حوايجي .... لقيته باعتلي رساله ( يا قطوستي )
كان يتصل بيا و لما نرد نقوله الافضل ما نتكالموش الا لما تكلم احمد خوي .. يضحك عليا و يقولي نحبك يا زعوله ...
يوم الخميس سافر لي تونس و مشى لي احمد خوي و قعدوا مع بعض .. به شن صار ؟؟ كلمه ؟؟ قاله عليا ؟؟ به لو كلمه ليش ما اتصلش بينا احمد و قال لي امي ؟؟
زعمه نتصل بي حسام ؟ لا مش ح نتصل .. مش ح نبين انه هامني الموضوع اصلاً ..
تاني يوم كلم احمد امي و قاللها في ناس كلموني على مريم اليومين الي فاتوا غير ما فضيتش نقولك .. به !!!
قاللها تو يا حي لين نروح و نتم الموضوع غير شوفي بنتك قبل ...
قتله امي شكون العيله ؟ قاللها حسام ... شوفي بنتك كان ما عندهاش مشكله يجيب امه و اخته الراجل يعطوا فيها كلمه ...
يتبع 11
No name ♥️🌺
