قمري

قمري 20

*فهد*
لمن اشوفها كل الجوطة الجواي بتروق بتعدل مزاجي ومودي حتى بدون م اتكلم معاها مجرد م تكون قدامي بطمئن .. 💛

اليوم داك رجعت من الشغل تعبان وزهجان مريت على خالد عشان اشوف شوية اوراق مهمة عندو بس لقيتها قاعدة جمب الباب كانت بتتكلم في التلفون وباين الحزن من دموعها لمن شفتها بتبكي م قدرت استحمل وحاولت اواسيها بعد م قالت انو هي مشتاقة لي اهلها كمية الحنية الشفتها في عيونها في اللحظة ديك خلقت جواي شعور غريب ..
بسسس م قادر على اي شي بشعر بيهو حرفيا بقيت بحارب نفسي عشان م ارجع اعلق نفسي في شي انا يمكن اكون م قدرو ...💔

_______________________________________

فهد وصل البيت وعلامات تعجب واستفهام باينة على وجهو دخل لقا ابوهو وامو واختو بيان قاعدين في الصالة عاينو ليهو بدون اي ردة فعل تفسر ليهو الحاصل شنو .. قعد مقابلهم وقال بكل برود ممزوج بتعجب :
" ممكن اعرف ده شنو السمعتو ده خطوبة شنو ومن منو؟؟! "

رد ابوهو وعلامات العصبية باينة عليهو :
" انت عارف عملت شنو اول وبسبب تعجرفك كنت حتدمر حياة بت بريئة وتدخلنا في متاهات معاك "

فهد عدل قعدتو وصر حواجبو وعاين لي امو واختو عسى ولعل يفهم حاجة بس بدون فايدة كانت ملامحهم عادية .. عاين لي ابوهو مرة تانية وقال :
" ممكن توضح لي اكتر لأنو بصراحة ما فاهم شي "
عدنان كانت ملامحو جدية وحكى ليهو كل الحصل مع نون ..
فهد كان مصدوم نسبة لي انو م كان متوقع الامور تصل لي هنا
ابوهو قال ليهو هسي المفروض تجهز نفسك للمساء لانو حنمشي نخطب ليك بت عامر صحبي والموضوع ده م داير اتناقش فيهو او اسمع اي اعتراض وحسب الكلام الوصلني انو انت كنت على علاقة معاها فاحسن حل تاخد خطوة جادة في الموضوع ده .. قام بعد خلص كلامو وطلع على غرفتو وخلا فهد متحير وم عارف يعمل شنو ..

" عايزين تتحكمو في حياتي المستقبلية كمان زي م اتحكمتو بالسنين الفاتت 😡  " قال كده بنبرة غاضبة وعيون محمرة قام وكسر الكباية الكانت في التربيزة قدامو ومشى غرفتو وخلا امو واختو مهجومين ..

قفل باب الغرفة بكل قوة وقعد تحت قدام الباب ملامحو كانت ممزوجة بالغضب الشديد قام بسرعة وبقى يكسر كل حاجة قدامو بجنون حتى تلفونو رماهو في الحيطة وبقى يضرب بكفو شديد لحد م اتجرحت لحد م حس انو كل الغضب الجواهو بقى يقل شوية وحس بجفونو تقيلة وغلبو التفكير في اي حاجة واتجه تلقائيا على السرير وغط في النوم وهو بهلوس بصوت شبه مسموع " م من حقكم تدخلو في حياتي ... "

" يا امي اسمعي ولدك بعمل في شنو خايفة يقوم يعمل حاجة لي نفسو " بيان لي امها بتوتر بعد م سمعت صوت التكسير جايي من غرفة فهد

" انا حأمشي اشوف الحاصل عليه شنو عشان اقدر اتفاهم معاهو " امو قالت بنبرة ممزوجة بالحيرة والحزن قامت اتجهت على غرفتو حاولت تدخل بس لقتو مقفول وبقت تدق في الباب براحة " فهد افتح الباب ده خليني اتفاهم معاك ونوصل لي حل 💔"