*بسم الله*
.
.
.
.
.
.
.
.
.
.
**جواد**
جازت سمانة تع خدمة .. مريحتش كامل حطيت راسي غير فلخدمة وقعدت نسيي منخممش
مي واش ندير ! لي فلقلب ميتبدلش .. مقدرتش نحقد عليها
بلاک شافتني مناسبهاش .. مالغري كنا نورمال ربي يجيب لخير
اهم حاجة منيش حاب نزيد نشوفها .. منيش حاب نولي جواد لقديم معاها
فقت من سرحتي كي هبطت طيارة .. رفدت حوايجي وكوارطي وخرجت لقيت اكرم ومعاه ريان
اكرم: عسلامتک
جواد: الله يسلمک
ريان: توحشناک
جواد: باين
حكمنا طريق لدار .. غير وصلت لقيت طونوبيل تع قاسم .. تنهدت ودخلت
ريان واكرم سبقو لصالون وانا طلعت .. حبستني يما كي عيطتلي
رحمة: عسلامتک وليدي
روحت سلمت عليها فراسها
جواد: يسلمک
رحمة: روح اغسل ..بدل حوايجک وارواح لضيوف عرفو بلي ليوم تولي جاو يشوفوک
هدرتها بلخف وتترجا فيا بعينيها كي شافتني مجاوبتش كملت
رحمة: مجاتش
هبطت راسي وطلعت .. دخلت لبيتي وحطيت دوزاني بدلت قشي غسلت وجهي وهبطت
دخلت قلت سلام وريحت يعني جاو كامل غير هي وصحبتها حكيت لحيتي وتنهدت سمعونا خزرو كامل فيا
صهيب: راک مليح
جواد: حمدلله
ناضت يما خرجت تبعتها اسراء وانا ريحو يتفرجو فيا
آسينات: جواد اسمحلنا
قالتها وهي مهبطة راسها وهي حشمانة
صهيب: طفلة صغيرة وطايشة متعاندهاش وسمحلنا على واش دارت
جواد: متقولوش هكا ملومتكمش نتوما وخلاص سوجي يتغلق كل واحد يشوف طريقو
كنت حاكم روحي على شعرة ونحاول نهبط من صوتي ومنبينش تقلاقي
قاسم: ماتخمم والو كل شيء ان شاء الله بخير
هزيتلهم براسي وسكت .. حشومة نوض في وجهم مي قعدت
أنت تقرأ
♥عيناگ قدري♥{باللهجة الجزائرية}
عاطفيةسلااااموووو .. هاذي اول كرونيک ليا في حياتي تقدرو تقولو قريت كامل لواتباد ووليت نتخيل برک وقلت خلي نبين قدراتي الكتابية وافكاري 😂 .. نتمنى تعجبكم ونلقى التفاعل 🍁المقدمة 🍁 راح تكون بين شخص همو الوحيد الدين.. ونظرة المجتمع ... صارم بزاف.. شخصية مع...
