ايدي انجرت حيل شفت ابو المحل
يخزر بية شسوين .
_ممممم مممم ، اختنكت وبديت ابجي حيل واتئتئ
طلع علاكة حط بيها جبسين وبسكت ونستلة وانطاني
_روحي بابا عيب تسرقين بعد ماشي
_مممم، اتنهدت بشهكة واومأت
رحت للييت مكيفة بالحلويات .
وصلت كالعادة متأخر محد يعرف وين ما وين .
فتت لبيت وصلت لغرفتنا اني و خيرية و امينة اختي الصغيرة جانو نايمين طلعت العلاكة وكعدت اكل بدون مااطلع صوت .
تبهذلت ملابس المدرسة كلة صار ككو وحلويات كملت رحت اذبهم بالزبالة امي جانت بغرفتها يمكن نايمة وجمان ودالية عدهم غرفة وحدهم وصلت للمطبخ ذبيت الجياس بالسلة و رحت حتى اغسل ايديني .
صعدت لغرفتنا وبدلت ملابسي ورحت لسرير ، غفيت كعدت العصر محد موجود بالغرفة يمكن كايمين من النوم ، نزلت شفت امي حاطة الصفرة ويشربون جاي صاحتني امي
عالية _يلة تعاي اكلي ميرا
_ززززززز يييي . وسكتت أثر خاشوكة الجاي اللي شمرتها امي جتي على ايدي .
_تاكلين زقوووم كوووون جمم مرة كلللللت لاتحجين هيج كلت لو لاااااااااا ؟
بديت ابجي طفلة وتتعرض لهيج موقف شلون يكون شعورها برأيكم تتعرض للضرب على شي مو بيدها .
_روحي ولي من كدامي .
طلعت للحوش ركض اكو زاوية ورة البيت محطوط بيه تنور الخبز كعدت يم التنور حشرت روحي وظليت ابجي حيل واشهك .
اعيط احاول انطق الكلمات صح بس متطلع الكلمة مني كلما اصرخ بكل حيل اريد بس يطلع صوتي بس متطلع اله بالكوة .
يكولون عندي شلل بالنطق مثل ابن عمي قادر ، بس يا ترى همين هيج سسوون بيه مثلي .
بسبب هذي المواقف اللي اتعرض الهة قررت لازم بعد اسكت مااحجي كلمة وحدة .
كالاادة تعودت عالضرب رحت للبيت كعدت عالصفرة واكل لبن وخبز . وخواتي يحجن بينهن ويضحكن .
عالية _من تاكلون سكتوا لاتحجون. تحجي بخزرة
سكتن خواتي .كملت الاكل رحت عالاساس احط كتبي وادرس بس ماافهم للمواضيع
رحت على امي جانت تغسل مواعين اشرت الهة عالكتب .
_معندي وكت روحي لخواتج .
ضربت رجلي بقهر عالكاع _دالية ماما دلووو .
_ها ماما
_ماما شوفي شتريد اختج قريها .
_مااء مااقريهة للوسخة .
بنترة _قريهة بلا كلام زايد
_افففففف ، تعاي
رحت وراهة فرحانة ، دخلت لغرفتهم ميخلوني افوت هواي لغرفتهم اول ما طبيت كرصتني حيل من زندي
أنت تقرأ
صمودي
General Fictionقصة حقيقة لفتاة تعيش في مستنقع الوحوش تسمع لا تتكلم "لربما يكونن في لساني عيبا لكن اهون من عيب القلب " بقلميwarda_jasim✒✒
