حكاياتنا

حلقه سابعه

#حكاياتنا
الحلقه :السابعه
بقلم :فاطمه سالم الورفلي &صفاء احمد
.............
.....
عند مهرة :
مهرة تلطم في خدودها وتندب :ووه عليا وووه كله من هنيه لبزت علينا وخربت علينا الله عيشتها... وانتي يا هيدوقه ليش حارجه!

نهله تبكي:والله ما درتله حاجه والله

مهرة :احكيلي شن صاير

نهله تشهق ومسحت دموعها وقالت :تربحي في طولك في عرضك في متوازي اضلاعك يام تقوليلي كيف ندير... يا مينتي وخلااص مقعمزه لا بيا لا عليا نوازي في زويتينات ملقطتهن من الوادي.. وشوي نشوف رويجلي جمعه زعلان ... عاد كيف راجلي وزعلان!... واني موجوده معقوله!... لا ما يصيرش عاد شوي قلت شن ندير شن بديري يا نهله ...وهو ما يحبش من يقربه ...هو ما عنده دلع لازم اناديه بي اسم قنين اي كيف عاد ويا حنه ولازم ندلع زي زيي سلفتي شوي خطرتلي فكره... قلت خلاص تم... ويا حنه نضت درت شويه سواك وصنة وروج وشوي شوي جي قعمز على السليته جنبي.. واني نشوفله شويه شويه.. تنحنحت وقربتله وقلت بصوت هادي وحنين...

نهله:خيرها العطله زعلانه ❤😂

شوي يا حنه يشوفلي شوفه لين تخزرطت في مكاني.. توا يا يام في شني غلطت اني 🙄بالله عليك تو اني غلطت في حاجه؟.... شوي يطق الباب ويفتح وليدي وتخش عزوزتي وحماتي تقول غوله وفي ايدها غربال وبدن يحارفن ويصارفن على الفيديو لي منتشر... عاد اني بنسكت اوو!... لا مستحيل نسكت ... نطيت ياحنه كلمه مني وكلمه منهن لين حبكت بينا ايد وكراع وحزنا جمعه بعد شنو...وجابني هنا وهو طول الطريق يسحن وكلي كبدي

مهرة تصفق بيديها :يا فرحتي بيك ياحنه يافرحتيي بيك ... نوضي نوضي البسي عبايتك فيسع نمشو لي ام بشير شباحه تشوفلك مصيبتك شن هي نوضي

نهله :لا وكان يعقبني جمعه وما يلقانيش!

مهرة :غر نوضي بس نوضي ما تنشفيليش ريقي تو تغطي عليه نوال... وانتي يابنت كان جي بوك قوليله مشت لي عمتي وبتجي وقوليله توا توا كيف طلعت مش تقوليله من مبكري سامعه ولا!

نوال تقلب في القنوات :به باه

-وبالفعل ناضت نهله ومهرة ولبسن عباياتهن وخماراتهن وشنطتهن ومشن للشباحه...

ام بشير :اقلبي الفنجان هيا

نهلة شربت اخر جغمه وقلبت الفنجان شوي وخداته ام بشير..

ام بشير تصفر :اوف اوف يا نهله في لفعه لفعه تلود على راجلك

نهله خافت :حي علياا ماما اكيد هدي بنت عمته الهجاله هدي

مهرة تسحن :كله من هنيه وفعايلها ان شاء الله كيدها في نحرها .. اسمعي يا ام بشير نبيك اديريلي خدمه زي خدمه لي فاتت لكن لي ضرتي

ام بشير ابتسمت بخبث ودارت بيدها بمعنى الفلوس :ايدك على الفلوس بس وكوني هانيه

مهرة طلعت الفلوس من الشنطه رباطي رباطي :هاك وخلال يومين نبي الفلوس وانتي تعرفي كل المعلومات لي تلزمك