#تحت_خط_الصفر
#بارت صغير (كرزات مسائية) تكملة للأحداث حسب طلبكم
#مريم_السعدي
َايام تمر علينا صاعد نازل تعب بتعب ماعرف راسي من رجليه.
كل همي يكفي الراتب نهايه الشهر
اغلب اكلنا من بره لان منلحك عالطبخ
يارا بدت تحجي ولسان والنهار كله اجرش وياها مونستني وذاك الارعن بس يكرر ويتمضحك
كلمات الانكليزيه الوان حيوانات علمتها عليها وافرح من ترددها بذكاء فطنه حيل
قنعت روحي ذوله كل حياتي والام ميفيد الحجي وياها عفتها
اكثر من مره شفت اسم وليد بتلفونها من يدك اتعارك واهوس منو ما منو تكولي نسيبك داستفسر منه عالهجرة
اتعارك واتخبل ورحت تعاركت وي وليد بيومها فضحته كدام مها الجانت متدري بسالفه الهجره ووصلت للظالين حتى اهله ميدرون
ورجعت تماضر
فتحت الموضوع ويايه بعيني واغاتي وحبيبي وحياتي واني قافل
توسلت بيه واني تعاركت حتى دخلت اخوها ادري بيها تخاف منه والاخ حار شسوه بيها حسها مطلع
الوالد متصل بعد حتى على موضوع سنا
ومن اتصلت براما تفاجأت كونها بعد ايام سنا تدخل عمليه الزائدة
-شعجب منين جاها
-عادي كومه تصير
- شو الوالد مدز عليه علمود الطلاق
- مادري سمعت يحجي وياها يگولها موثوبنا وهي قنعت وسكتت
- خوش على راحتهم
نهيت الااتصال شفت تماضر ورايه تسمع كالت
- منو بالمستشفى ابوك؟؟
- لا سنا عمليه الزائدة
- بلكن تموت وتاخذ البيت هههههه
مجاوبتها باوعتها بنظره خليتها تسكت دارت وجهه وكعدت كدامي
وبدت رحمه الله
- صديقتي ساكنه باليونان تكول تخبببل الشقق بيها رخيصه وارقى شقق والمدارس مستقبل للجهال وكم سنه ينطوك جنسية واكو شغل متوفر. للجوء
باوعتلها
- صديقتج كذابه تريد تورطج
- لا ليش خو هي مجربه. كلتلي اذا تردين تجين اني استقبلج واجرلج شقه. وترتاحين حيل هنا منطقه تخبلل
- تماضر موضوع منتهي تره لو تموتين
- اني اريد اروح
- داشوفين الباب شعرضها جسمج الجنه غزال يفوت ركض منها الله ومحمد والائمه كلهم وياج
- يعني قصدك اتطلك؟!
- اي لعد شنو
- وترجع لاهلك؟!
- اي اخذ جهالي وارجع
- موزوج اني داعوف جهالي واروح
- لا لعد خليهم يواجهون خوف القارب والامواج وهمه بهالعمر واني شجاريلي وضيفه ومرتاح وجهالي كدامي وببلدي
- يابلد انت شتحجي ياوظيفه النص الشهر يخلص راتبك
- انت مو عدج راتب تعاي صدك كال عماد نازله عقوبه بيكم سنتين صدك
