اســعــد الــلـه اوقــاتــكــم احــبـتـي
بــــــارت 25
لــلــكــاتــبـه :banu
...........................................................
قـــرائـــه مــمــتــعـه
..........................................................
كُف عن قتلي عانقنِي وأخبرني أنهم لايُعنون لك شيء.🖤
تقربت يمي وتحجي حجي ما مفهوم خفت منها كلش ولازكه بوجهي .. صرت استغفر وابعد بيها
"شبيج امي وخري مني .."
شو هاي اجت عليه وتلزم بيه
صحت بصوت "عمه تعاااالللي .."
اجت عمتي وتسكت بيه تكلي عيب فضحتينا
وتكللها روحي لماما حبيبتي وهي لطشت يمي ومدري شدردش
جيت ابجي من الهبطه .. يعني شكلها يخوف والله مو اعيب خلقة ربي بس كلش خوفتني
عمتي تاشرلي اسكت لان عيب اني سكتت بس شنو الخوف ماكل كلبي وعيوني مفتوحه بكل وسعهم من الاستغراب
شفت طفله جانت وياهم يطلع عمرها تقريبا بل ٩ سنوات صحتها تاخذها عاد سمعت منها وطلعتها
البنات يباوعن عليه ويضحكون ويهدوني
سوزان "على كيفج عيني شهل موعان الزايد كلنا مايعه وما تتحملين مو هيج ترى حرام عليج خلقة الله هاي .. وبعدين البنيه مو بعقلها "
"وانتي شبيج منو يمج والله يا الله.."
هزيت ايدي وطلعت
اجت وراي هنا وتكلي عيب شلون هيج تحجين
"لعد وهي ما تستحي مسويه روحها زينه براسي .. وانتي اسكتي لساني ارجف من الخوف "
"ههههههه ولج اسكتي فضحتينا .. خطيه شبيج البنيه مو بعقلها "
"زين شبي شكلها يخوف "
"منغوليا خطيه "
"عزااا اول مره اشوف منغولي اسمر بل عاده بيض وحلوين مدبدبين "
"والله اجذب اذا اكول ما اخاف منها بس متعودين عليها "
"يمااااي لو اموت ما اتعود "
راحت هنا للمطبخ اني بعد ما طبيت لان سوزان موجوده كرهتها كلش شكد حشرية وبس تشوف مهند تبقى تسولف ويا وتتشاقى بس يطب
اما الباقين ما تدناهم... احس نار شبت بيه من القهر
والغيره حركتني حرك والله اتمنى امدها بل كاع واطلع ضيم كلبي بيها
رحت يم النسوان كعدت والملايه طبت وصارن يلطمن
اني اسمع واتكطع .. كمت ابجي بقوه واضرب على وجهي حيل .. فقدت من صدك .. كلها تباوعلي شسويت بحالي
اجت عمتي ام هديل .. شبكتني وتبجي وتنعى
بجيت وياها بصوت .. جانت مكطعه نفسها من البجي
ووجها مورم كد ما ضاربته .. الملايه بعدها تنعى وتلقي
