مساء الخير 💕
البارت 26
للكاتبه :banu
..................................
دخلت الملايه اني اخذت مكان وكعدت وبقت مياسين ونسوان ولد عمي بل مطبخ يقدمن الجاي ويسون
كعدت الملايه تنعى نعاوي تبجي الصخر كلها تبجي والطم وعماتي كطعن رواحتهن .. كمت اتذكر كل شي صار
واتذكر كلامها وياي وحبها الي .. بجيت ملخت روحي وشعري كطعته.. متت من البجي والصريخ .. وجهي خرمشته واضرب بي واتذكر روحي اذيتها بل كلام وكل الي حجيته وياها .. وهي ولا حجت ولا ضاجت بسرعه رضت اول ما شافتني تلكتني بل احضان .. لو من طرحت تبوس بيه وتكلي الله يعوضج ويترس حضنج اطفال .. وتدعي ارتاح بحياتي ..
عمتي ام مهند سحبتني وتحجي عليه وترزل بيه .. ما قبلت
وصلتني للدرج لازمتني وتحجي عليه وترزل .. كالت صعدي وبس اشوفج هنا لو تبجين اكسر رجليج
صعدت وكعدت على البايات الي بل اخير بحيث محد يشوفني .. كعدت ابجي واتذكر ببيبي وصوت عماتي وبجيهم.. يرن باذني .. والملايه هم اسمعها .. تعبت من البجي رحت توضيت وكعدت اصلي واقرالها قران
بعد ما نزلت ابد .. بقيت اقرا قران .. خلصت سوره البقره كلها والي وراها نصها .. اجت هنا الساعه ب ٨ لحتى اكل
كلتلها ما اشتهي .. لحت عليه بس ما قبلت بقيت اقرا لحد ما تعبت وطفيت .. خليت راسي على المخده ونمت .. ويين يالله كعدت .. لكيت حنان مكابلتني وكاعده فزيت ردت ابجي من شفتها اخترعت شعندها هنا وفوكاها مكابله وجهي
كلتلها تجيبلي بطل ماي نزلت وجابت ماي وتمر وجاي ضحكت عليها .. "شسوي بل تمر والجاي .."
ضحكت بخبال "غير ما اكلتي ويانا .. شام اني احبج واريد انام يمج بعد .. حبابه خليني .. "
ضحكت بوجها "ماااشي .. بس شوكت ترحون لبيتكم .."
ما حجت .. نوب كعدت تسولف
باوعت الساعه بل تلفون .. ب ١٢ هي من شافت التلفون بيدي طلبته مني
خفت انطي الها لا ادز صور او تنشر .. وهي ما تعرفله
كلتلها تعالي وياي باوعي
سالت شتردين بقت تباوعلي الضاهر ما تعرف شتريد .. طلعت فلم كارتون وكعدت وياها اتفرج .. سبونج نوب السنافر .. بحيث نسيت نفسي واني اتفرج
اجت رساله الي
مهند "وينج شام .. من الضهر بعد ما شفتج .."
ما رديت طلعت من اليوتيوب.. وغلقته .. جنت مخليه صوره الي بس بل حجاب خلفيه
كامت تباوع بيها .. وتحجي .. طلعتلها الصور وتباوع وكل شوي تحجي حجايه مرات افهم مرات لا
جنت حتى الركص مال حنه ماخذته من تلفون مهند وحافظته هنا .. هي شغلته وتتفرج .. وتكلي حلوه تسوين
