اميرتي

حلقة 7

#اميرتي

حلقة ( 7 )

بقلم محمد مالك

لاايك قبل ما تقراء
وتعليق بعد ما تقراء برايك

قراءة ممتعة للكل ❤

________________

دور الرقم فالرسائل واتصل بيه شوية ورد الراجل
الراجل:الو
زياد:صار انتا بنت خالتها ؟!
الراجل: من معاي ؟
زياد: توا نوريك من معاك

سكر عليه وحط تلفونه ف جيبه
وخش للمطعم

اول ما خش سيرين لمحاته وملامحها الي كانت تضحك تغيرت ف لحظة لي خوف كبير !!
تلفت الي مقعمز معاها عالطاولة !!

زياد..قرب عالطاولة ! : اوو سيرين وبنت خالتها
الراجل: من هوا هاده ؟؟! هيا اقلب وجهك
زياد: بنت خالتك قنينة طلعت احلي منك
سيرين..وقفت: زياد فاهم غلط
الراجل وقف: هيا برا خيرلك
زياد..ابتسم وقعد يشوف ايمين ايسار وضرب الراجل ع وجهه براسه لن طاح عالكرسي من قوة الضربة
سيرين..حاطه ايديها ع فمها
كان عطاولة كيف واصلهم بوكس السعادة
زياد..شافه وقامه : حق رصيد الي خداته بنت خالتك..غمز لي سيرين وطلع !!

جاا صاحب القهوة:اطلع برا مش ف شارع احنى تضرب زبون
زياد..شافله وفنص
مردش عليه وطلع

ركب السيارة
وطلع

واول ما وصل لي قدام الحوش قعد ف سيارته منزلش
شاف لي باقة الورد وتنهد
وشاف لي روحه فالمراية الي في سيارة
ومن كثر الضغظ الي صارله لاول مرة زياد يبكي بينه وبين نفسه !!
مسح دموعه وكان بياخد البوكس والباقة بيرميهم فالكناسة الي فشارع
تفكر كلام مؤيد ( ما عمرك عاملت اختك كويس و حبيبتك ترعش قدامها زي الجريدة )

مسح دموعه وخش
الحوش
ولقى عمه وبابا فالجنان

زياد: صباح الخبر
بابا:صباح النور شن صار فيك سلمته ليهم
زياد:ايه معا انه قالي مفروض مضربتاش هكي لكن وضحتله وقالي ضى ربي معاش يشوفه واماليه حتا مكانه مش حيعرفوه وين
بابا: هاده جزاء الي يضيع بنات الناس
مختار: لمن الباقة هادي
زياد: هادي للغالية
بابا: معاش تتحشم يا ولد انتا
زياد: لا مش زي ما فهمت هاده لي امي وهادي لي ندي ( عالبوكس )
مختار: ريت يا خيري ظلمته قصده امه الغالية
بابا: شكله نضرب ع راسه امس
زياد..خش
لقى امه فالمطبخ
زياد..ابتسم: هادي ليك يا غالية
ماما: الله محلاهاا ! شن المناسبة
زياد:لازم مناسبه كلكم مستغربين
ماما؛ محلااها ربي يحفظك ونفرح بيك
زياد..ركب الدروج وطق دار ندى مسمعش رد
وفتح الباب
وكانت الدار فااضية !!
زياد زي المجنون خش يشوف ايمين ويسار
طلع الممر..بصوت عالي: وين ندى

ندى...طلعت لابسة بدلة الصلاة وف يدها المصحف :نعم
زياد..تنهد براحة مشى ف باله انها هربت من جديد
قررب منها
ندى بدون ارادة وخرت
زياد: متخافيش مش ضاربك والله ..هاك شدى البوكس
ندى..خدت البوكس وخائفة فنفس الوقت
وزياد ..ركز عالخوف الي ف عيونها !!
زاد قرب منها وحضنها : متخافيش خلاص مؤيد حزها عليك
ندى..ابتسمت وساكته ومستغربة ف تصرفات زياد !