امنيات معلقه

البارت التاسع

مساء الورد...
.
.
.
.
.

وفاء .... طبيت للبيت والتهيت بمحمد والهوسه الي صارت بينه وبين نسيبه ... ونقهرت على فرحه من شفتها ...بقت جامده بمكانها متعرف شتسوي تلحك اخوها الي طلع زعلان لو تسكت ولدها الي هجو على خالهم...سحبت ولدي وكمت اعيط عليهم شلون يعتدون على الرجال .....واباوع محمد ساكت وفرحه تحجي ويا بس هو ميجاوب هزت ايدها ... عافت الصاله وصعدت للغرفه والدمعه بعينها ..تقربت على محمد
خويه

محمد .... هاا وفاء هااا

وفاء .... حقك تصيح وتصير عصبي بس مرتك صعدت مكسورت خاطر على اخوها ...ليش ما جبرت خاطرها بحجايه

محمد ..... وفاء هسه هي صعدت انتي شتريدين مني

وفاء ....اصعد وراها

محمد .... ما بيه حيل عوفيني ارتاح شويه

وفاء .... راحتك يمها اصعد بعد اختك وافتهم منها شنو الي صار ...وابو معتز ليش هيج انفجر وكام يحجي ... عليه وعلى حور واحنه اصلا مو يمهم ...من جبت اسم حور .. دكيت على خدودي ..عزا العزاني محمد

محمد .... ها وفاء شكو نووب عليمن هذا اللطم

وفاء .... حوررر محمد....حور

محمد .... شبيها حور وفاء والله خبلتيني الله رفع عنها وطلعت بالسلامه بعد شكو

وفاء ..... طلعت بس مو بالسلامه محمد معتز ما رجع حور للبيت ....طلعت ركض وصعدت لغرفتها كلت خاف اجت وصعدت من شافت الهوسه ... وحتركت حرك من سألت قمر وكالت عمه حور ما اجت وياكم ... عزا العزاني اي صدك هي ما اجت ويانه ... شلون يربي شسويت بروحي اني شلون عفت بتي عده شلون
نزلت محمد هذا ما جايب حور للبيت لحد هسه

محمد .... شلوون ما جابها ليش اني مو كلتج ابقي بالسياره ومن يوصلون تفوتين بتج .....وتمنعين معتز ميفوت للبيت

وفاء ... كعدت بالكاع ...وكمت ادك واللطم عزا العزاني ... عزا العزاني سمعت صوت فرحه والولد ...وطبيت ونسيت بتي يمه بتي وين انتي هسه يمه حور

محمد .... طلعت ركض للشارع بقيت التفت يمنه ويسره ماكو أي اثر لمعتز ولا لسيارته ...رجعت ما اعرف شلون اتصرف ... معقوله اني غبي لهاي الدرجه ونسيت كلام معتز من كال أخذها واروح لغيره ديره ...وين جان عقلي من وافقت تصعد ويا .... بس لا لا معتز خوش ولد وما اعتقد يسوي اي دكه ناقصه بحور لان هو يعرف هي مو اله وعمها ناهي عليها ...بقيت احجي وي روحي ...وما اعرف شلون اتصرف بهاي المصيبه ...
طبيت لكيت وفاء على كعدتها وفرحه والولد ملتمين عليها ... ما تحملت المنظر
طلعت شغلت سيارتي ورحت لديوان الشيخ حتى ابلغه بالسالفه ويصير عدهم علم بالي صار
واول ما طبيت صار بوجهي الشيخ

الشيخ .... ها يمحمد شعندك جاي لديواني ...ما تخجل تفوته وانت هاين ابني وعايل عليه انت وزعاطيطك بنص بيتك