امنيات معلقه

البارت السابع

مساءكم ورد وياسمين ....
.
.
.
.
معتز ..... الو حور الو
شنو القصه يابه ليش سمعت حور هذا الحجي المسكينه قفلت الخط وراحت

ابو معتز .... واذا راحت شنو الي راح يصير يعني

معتز .... يصير انت قهرتها ...هسه تأخذ على روحها وعبالها انت تقصدها بهذا الحجي

ابو معتز .... عباله اقصدها شنو لعد اني اقصد منو برأيك

معتز .... ما فهمت

ابو معتز .... لك بابا عمك عناد رجع من بغداد ويكول عمها سعد نها عليها ... يريدها لابنه حسام  يعني عمامها ما موافقين عليك

معتز ..... هههههههه نهى عليها شنو ... حور مرتي  لو انتو ناسين هذا الشى

ابو معتز .... ابني مرتك شلون ..حور بعدها ببيت اهلها وانت ما داخل عليها 

معتز .... اي وليش بعدها ببيت اهلها منو السبب

ابو معتز ..... منو السبب

معتز .... انت السبب ...وشرطك السخيف على عمو محمد .... ضربني ابويه راشدي فرني بمكاني

ابو معتز .... ولك اني شرطي السخيف لو محمد الي غشنه ..وضحك علينه من البدايه

عناد ..... محمد غشك بشنو وضحك عليك محمد زلمه وعدا العيب ما يغلط

معتز ..... تعال عمو تعال احضرنه ابويه يريدني اعوف مرتي

ابو معتز .... لا حول الله لك ابني حور مو مرتك ومتصير مرتك بعد ....  اله على جثتي

عناد ...غير تفهمنه ليش هذا التعصب والرفض ... يا خويه ابنك عاقد عليها وكل امورنا كامله  .... نزفهم ونحط عمامها امام الامر الواقع

ابو معتز .... واذا اجو عمامها وكتلو معتز وراح دمه بالرجلين اني مو ينفعني فهمني حور لو محمد

معتز ..... يخسون محد يكدر يوصل بيوتنه ولا يندك بينه

ابو معتز .... انتو عقولكم وين ... متعرفون النهوه ...وشنو ابن العم من ينهي على بت عمه ...

عناد .... ينهي عليها اذا اله حق بيها ويستاهلها

ابو معتز .... شوفوا اني هسه راجع من ديوان ابويه ... وحجينه بالسالفه كال تفك البنيه من العقد وتعوفها وكلمن يكعد بمكانه

معتز .... يعني قصدك اطلكها واخلي واحد غيري يأخذها وهي مرتي

عناد ... يا اخي خلينه نروح لأبويه ونكله معتز متمسك بالبنيه وميقبل يطلكها ...وندز على محمد ونزفهم بالسكته بدون هوسه وهذا هو

ابو معتز .... استغفر الله العظيم ....ولك عناد المفروض انت توكف وياي وتقنع معتز يعوف بت الناس بحال سبيلها ..ويخلصها ويخلصنه من هاي المعمعه والمشاكل ...وانت رحت وي محمد لبغداد وكل الحجي صار كدامك