الاتصال الاخير 📞💔

مقدمه 🖤

تلازمه وڪأنها سلسال ﻣعقود فـي قلبـه 🤎

°•ندى الخفاجي •• 🖤

كل شي بدأ واني طفله  جنت بالصف الخامس ابتدائي صادف وفاة ماما (الله يرحمها) من هذا اليوم لحد ماكبرت (نور لعادل وعادل لنور) هالجمله حفظتها حفظ بدماغي جانو الكل يكولوها وجانو الكل يشوفون اكو حب بين هالاثنين بس ياترى القدر حيجمعهم لو اله قرار ثاني ....

استمتعو بقرائه القصه حبايبي وملاحظه هالمره حتكون القصه باسمي يعني بقلمي اني ((ندى الخفاجي) )اللي كاتبتها وحقيقيه 100% لذلك اتمنى متابعه لحسابي حتى يوصلكم اشعار النشر حفظو هالمقطع يمكم بقائمه القرائه وتفاعلو حبايبي وعلقو وصوتو حتى تشجعوني عالنشر لان القصه كولش حللوووه واحداثها مشوقه وواقعيه وحقيقيه 100% عن شاب يحب بنت من الصغر لحد ميكبرون وتصير وياهم احداث كولش قويه شجعوني حتى انشرلكم وكالعاده كل يوم بارت
باي حبايب. 🖤❤️

***🖤❤️*******🖤❤️*******
جان دوامي صبح اني واختي الصغيره (فرقد) اني صف خامس واختي صف اول طلعنا من المدرسه والطلاب الولد ديطبون بالشارع التقينا بولد عمامي وواحد من ولد عمو گلي هالكلمه اللي هزتني هزز (ترا امج ماتت)  مصدگت بي لزمت اختي ومشيت واني ممصدكه باللي سمعته رغم اعرف انو ماما مريضه فد مره والدكتور جان يگول لبابا تحضرو بأي وقت تموت جنت ممصدكه وابتسم لأختي ولصديقاتي لحد موگفني صوت سماعة مسجد المنطقه والمؤذن يعلن خبر وفاة ماما حتى اهل المنطقه يصير الهم علم ويجون للفاتحه جان هالخبر مثل الصاعقه اللي صعقتني تثاقلت خطواتي اريد اوصل للبيت بعد ماعرف امشي شوي شوي صرنا قريبين عالبيت وبدا الصوت ينسمع صوت العياط والبجي والنسوان زوجة عمو اول وحده تلگتنا بحضنها اني واختي هالموقف ابدا ماانسى ابداااا هنا يلا صرت ابجي وابجي اباوع اخوي الجبير واكف بباب البيت ولابس اسود هو عريس مصارله فتره قصيره من تزوج ولابس اسود لابس اسود ع ماما طبينا للبيت جمدت بمكاني لما شفت التابوت موجهي عالقبله واخواتي يبجون ونسوان عمامي وعماتي اتذكر الصبح قبل لااطلع للمدرسه رحتلها جانت كاعده ع سريرها بوستها وطلعت وجان هذا اخر لقاء بيناتنا خلصت ايام الفاتحه بحزن وبجي واخواتي بس يبجون وجان الشخص الوحيد اللي مساندني هو (عادل) ابن خالتي .....
بعد مرور 6 سنوات صرت بالصف الرابع الاعدادي كبرت وصرت اهتم بشكلي وملابسي واناقتي صارت عيون الشباب عليه من اروح للمدرسه يضايقونا اني وصديقاتي بالطريق جنه نروح مشي لان موحيل بعيده علينا طبعا بابا ظل كل هاي السنوات المرت مااتزوج رغم ضغط اهله اخوانه ع انو يتزوج بس  لخاطرنا يخاف يتزوج وتطلع زوجته وحده موزينه وتأذينا بالاخص احنا الصغار اني واختي الاصغر مني لان بقيه اخواتي تزوجو المهم نسيت اكوللكم احنا خمس بنات وولد واحد اللي هو اكبرنا متزوج بنت عمو وكاعد يمنا بنفس البيت وطبعا تعلقنا حيل بأهل ماما ورا وفاتها صرنا نروحلهم كل خميس ونظل يمهم ونرجع ببدايه الاسبوع لان عدنا مدارس وبسبب كثرة روحاتنا الهم خوالي هناك وخالاتي جان ابن خالتي دائما يجي من نكون ببيت جدو ودائما وياي اسمه عادل ضخم وطويل واكرع يعني زين ينطلع بي بس عنده گلب طيب حيل ودائما جان وياي بكلشي بزعلي بعصبيتي بفرحي بحزني من جنت طفله وهو هيج يتصرف وياي بس مفهمت سبب تصرفاته ونظراته ليش الا من كبرت شوي (عادل لنور ونور لعادل)  جانت هالكلمات تتردد ع مسامعي هواي لحد مترسخت بباله بالنسبه الي ابد متأثرت بس هو بالعكس ترسخت بباله لحد مصار يحبني ويعشقني ابد مااعترفلي بس جانت تصرفاته ونظراته فاضحته واني مغلسه عالوضع وابد محسسته بغير شي غير انو هو يكون ابن خالتي وصديق فقط لااكثر جان دائما يكولي انتي حلوه وانتي هيج وهيج بس اني جنت اشوف نفسي عاديه جدا
امم خل اعرفكم ع نفسي واوصفلكم شكلي  اسمي نور مواليد 95 طولي 155 وزني 56 حنطاويه شعري طويل عيوني صغار مجرورات وعسليات يعني اني اشوف نفسي زينه ينطلع بيه بس جان اللي يميزنا احنا كلنا انو شفايفنا كبار اني واخواتي واخويه وهاا جنت مو كولش احب الدراسه اضوج من الرياضيات بس ضابطه الانكليزي احبه وكولش زينه بي المهم مرت الايام وبكل عيد من الاعياد نروح لخوالي وهناك نلتقي ونجتمع احنا وخالاتي وعمتي متزوجه واحد من خوالي وهم عدها درزن بنات وولد واحد اني ويا نفس العمر اسمه محمد دائما جنه نلعب سوه ونتعارك ونتصالح واني ويا نفس الطبع وحتى نتشابه ببعض الملامح وجان عادل يضوج من قربي لمحمد رغم هو يكون ابن خاله لعادل بس يضوج منه بسببي والله شنو لان جنت اني ويا نفس المرحله الدراسيه وندرس سوه ونتناقش سوه يعني شغله كولش عاديه بس الاخ عادل مكبر الموضوع وجان يضوج حيل ويتعارك وياي واني اضحك واكوله مثل ماانت ابن خالتي محمد يكون ابن عمتي وابن خالي من اجاوبه هالشكل يعوفني ويروح بكل هدوء بس العصبيه مبينه ع وجهه
معرفت سبب تصرفاته غير وماكلني الندم اصعب مايكون احساس الندم من تندمين ع شي فات وراح من ايدج بسببج او بسببه او بسبب الظروف او القدر منعرف ليش ...او يمكن بالبارتات القادمه حتعرفون .....

بقلمي  ندى الخفاجي 🖤

تفاعلو حبايبي هاي مجرد مقدمه للقصه حتكون حلوه كولش واحداثها قويه يبدي النشر حسب تفاعلكم اليوم (الاحد) يعني خلال اسبوع اذا شفت تفاعل حلو حبدي انشر بارتات كل يوم جزء رايده منكم تصويت وتعليق حلو مثلكم احبكم 😘

°•ندى الخفاجي •• 🖤