وجدت الحب ولكن

البارت 14

وجدت الحب ولكن
البارت 14
الكاتبه رانيا سلام

قراءه ممتعه

أندك الباب بالليل
ام سلوان:منو اجانا هسه
سهام :ما أدري اکوم افتح
راكان:لا اني افتح  طلعت بره أصيح منووووو بس ما كو رد فتحت الباب
-بصدمه ....أم ورده خيرچ بيج شي
-انت مو رايدني وهاي اني أجيتك وطالبه تستر عليه بهل الليل
-ولچ انتي مخبله اكو وحده تسوي سوايتج
-راح تخليني على الباب
-أدخلي ادخلي ،طببتها وسديت الباب درت عليها وأني متفاجئ جايه هي وبنتها وجنطه أزغيره ، أم ورده خليني أرجعج لبيت أهلج لا تصير  مشكله  انتي هسه بحسبه ناهبه
- صدكني بس الي شايف الويل يخطي هيج خطوه واني دزيتلك رساله ومن وصلتني أشاره منك يله خطيت هيج خطوه ولو ما متأكده انت متمسك بيه ما أجي ألك 
-صحيح متمسك بيج ورايدج يا بنت الناس على سنه الله ورسوله بس مو بهاي الطريقه
-صدكني ماكو طريق ثانيه وبيت عمي مستحيل ينطوني
-بس هيج راح تصير عشاير و دم هذا شرف مو لعبه
-واني ما طالبه غير الستر وإذا تزوجني محد اله حچايه عليه
-بتردد ..... ما أعرف شگلج ..
-أدري ما تريد تتورط بالمشاكل من وراي عاذرتك  ،،يله ورده امشي
اخذت الجنطه وتريد تطلع فتحت الباب ركضت على الباب وسديته ،تعالي وياي
طبينا جوه ،سهام سهام 
-ها راكان اني هنا كاعده
-تعالي ... اجت تفاجئت  بأم ورده
-منو هاي المره راكان
-بعدين سهام اخذيها لغرفتج وانطيها مي
سهام اخذت أم ورده لغرفتها بقيت شويه بالمطبخ واني افكر اشلون راح افاتح امي بالموضوع شنو اگللها رحتلهم
ام سلوان:منو چان على الباب
-أنور عمو حبيبي أخذ اخوك وروح لأمك
راحو الاطفال واني أباوع لأمي وأشوف التسأولات بعيونها .....
يمه  أم ورده هنا بالبيت
-يا أم ورده
-ألي رحتي خطبتيها ألي
-شتسوي هنا بهل الليل وين هيه بره  يمها سهام ؟؟
- هيه هنا بغرفه سهام ،باچر أعقد عليها
-شنوووو شجاي تصخم ادگول
گامت على حيلها وهي تريد تروح للمره واني لزمتها
-يمه انتي ما ألج شغل
-شنو ما ألي شغل جايبلي كح***للبيت وتريدني اسكت باچر تگلب البيت كوا** ولازم اسكت مو
-محد أله شي يمي  و ما مسوي شي غلط وهي چبيره  مو ازغيره ،باجر أعقد عليها وتصير حلالي ...أباوع على أيه تبچي بس ما تكدر تحجي ولا تكدر تعترض ،وأمي تصيح وصوتها يلعلع
طركاعه لفتك راكان راح اتجيب مصيبه للبيت 
-كافي يمه الدنيا ليل  شهرتينا
-ولك يمه انت ما تعرف طفل.. تخيل واحد ياخذ اختك بدون ما تدري ويتزوجها  شتسوي
-يمه هذا عمها ومره عمها ولو ما متأذيه منهم ما تخطي هيج خطوه وانتي تدرين اني رايدها ومتمنيها
- گامت ادك على رجليها ..يا يمه راح يضيع الولد مني   ولك يمه رجعها رجعها لأهلها واني مستعده اخطبها الك بدل المره عشره 
-ما ترجع گلتلج ما ترجع بعدين  أكيد هسه حسو عليها ما موجوده بس ترجع يذبحوها غير
-الله واكبر عليك راكان ، مرمرتني بهل الليل موتي راح يكون على ايدك مثل اخوانك
-سمعتها هيج حچت لو انجنيت .....
احچي بصياح وكسرت الميوزه شلت التلفزيون وركعته بالكاع ما گمت اشوف گدامي  خرب الله  الكو*** ما راح اتجوزين مني مو كافي تحملت كل شي منج واني ساكت
على صوت الصياح والتكسير أجت سهام وام ورده عبالهم صاير شي
أسمعي انتي اباوع عليها وبعصبيه .....تقبلين تتزوجيني لو لا
دنگت راسها رجعت بصوت اقوى.....تقبلين لو لا إذا ما تردين حتى ارجعج لأهلج احجي
-اي اقبل
-خلص باچر من الصبح  نعقد يم شيخ
-الله واكبر عليج. بالكح***** ام الزلم
-درت عليها ...تعرفين كلش زين منو ام الزلم ومنو الي كربستيها براسي. ...واباوع على أيه الي انصدمت من كلامي  ...درت على سهام
سهام أخذي ام ورده خليها تنام يمج اليوم وشوفيها اذا متعشيه لو لا  لحد ما يصير باچر الله كريم
رحت لغرفتي ما همني أي شي كل تفكيري معقوله راح تصير حلالي وتنسيني كل شي وتسعدني لو مثل أيه لو راح تدخل وتجيب المصايب كلها للبيت  اجت أيه ورايه للغرفه وبس تبچي
-ليش تبچين
تبچي وتناشغ وبالگوه تفتهم منها كلمه  امسي وجهچ  واهدي لأن ما جاي افتهم عليچ. مسحت وجها بأيدها والدموع ماليه وجها
-هي هاي الحياه الجديده الي تريد تبديها وياي
بشنو قصرت
-أيه ما مسوي شي غلط أني تره اني من اتزوجتج تره هم چنت متزوج سهام وين المشكله 
-سهام تختلف و انت دوم أدگلي سهام مثل أختي وما راح تصير مرتي بس انت هسه راح تتزوج الي تريدها وتعوفني اني ادري جاي تعاقبني  على غلط واحد  وعقابك چان قاسي كعدتني بالبيت  ورضيت بكل شي بس حتى أرضيك ونسيت  انت أن سبحانه الي ما يغلط واحنا مو ملائكه بشر
-غلط عن غلط يختلف و احمدي ربچ اني ما سويتلج شي وگلت لخاطر العشره وخاطر خالتي وأمي ودست على كرامتي وبقيتچ على ذمتي  لو عند اهلج متخيله شيسون بيچ چان انتي بالنجف  ويسون الج ثوابات
-زين هيه تدري انت متزوج  اثنين قبلها لو لا تدري هيه أن راح تخرب بيتي
-البيت تره هو خربان خربان  أما بالنسبه للزواج اكيد تعرف اني من رحت خطبتها كلتلهم اني متزوج
-تحچي بكسره ولوعه گلب راكان ...راكان
اوف يا گلبي
دگت أيدها قوي على گلبها مال واحد متئلم وگامت من عندي وراحت لصفحتها تمددت بقت تبچي شويه بعدين ثگل نفسها عرفتها نامت حاس بيها وأعرف الي بگلبها لأن مريت بيه بس مو وياها وي أم ورده
اني شنو لزگت ام ورده ..ام ورده باچر راح اتزوجها واني ما أعرف أسمها  ،مو مهم المهم راح تصير ألي ..... بس لازم احچي وياها يجوز ما تعرف اني متزوج  گمت فتحت الباب وطلعت رحت لغرفه سهام دگيت الباب طلعت سهام
-ها راكان خيرك محتاج شي
-اريد احجي وياها شويه كاعده نايمه
-لا كاعده
-صيحيها الي....
-ام ورده  عيوني راكان يريدچ
- اي
طلعت شافتني ودنگت راسها ،تعالي وياي للمطبخ اريد احجي وياج ...طبينا للمطبخ فتحت الضوه
-بتردد ام ورده اكو شي لازم تعرفي قبل ما نتزوج
-تفضل
-بس ما اريد تحكمين عليه من الاول اريد تفهميني
-امممممم
-اني متزوج وعندي اثنين نسوان 
-اد...
- رادت تحچي ما خليتها ..قبل لا تحچين بس افهمج سهام مره اخوي الله يرحمه تزوجتها لأن امي جبرتني عليها  وعلمود هم اهتم بجهالة اخوي ويكونون جوه عيني والثانيه هم امي زوجتني الها بس ما عندي حب الها انتي الوحيده الي حبيتها وتنميتها تصير ألي والحمد الله الله جبر بيه  شدكولين
- اني اعرف انت متزوج والله شاهد اني ما ردت اخرب بيتك لو اضوج أحد مني بس انت املي الوحيد حتى اطلع من جهنم
واني حتى مستعده اكون خدامه جوه رجليك بس المهم تستر عليه وعلى بنتي وتراعي الله بينا
-هسه ياله ارتاحيت،هذا هو لعد مثل ما تردين ام ورده
بضحكه ،ههههه هاي لحد الان اصيحلچ أم ورده وما اعرف اسمچ
دنگت بخجل
-اسمي وفاء
-الله وفاء عاشت الاسامي  يله لعد انتي روحي ارتاحي وباجر انشاء الله اجيب الشيخ
-تصبح على خير
-وانتي بألف خير ....

كعدت الصبح رحت غسلت أيه بقت نايمه أو كاعده وما تقبل ادكوم  غسلت وبدلت 
ام سلوان :مستعجل ما تصدك شوكت
-صباح الخير يمه
-هو انت خليت بيها صباح كسرتني وكسرت مرتك كله علمود وحده ما تعرفها
-ألي يسمعج يكول طاردكم.... محاربكم 
ام ورده وسهام:صباح الخير
ما جاوبت  امي بس على سهام ،صباح الخير سهام
راكان :صباح النور يله جهزي نفسج اني الضهر بعد ما اعزل المحل  اجيب الشيخ واجي
دنگت راسها اني طلعت فتحت المحل الشارع طبيعي عجيب لحد الأن محد سئل عليها  سديت المحل  وخابرت على اثنين من اصدقائي يجون شهود
طلعت المنطقه زين هادئه احاول قدر الأمكان اخفيها وما أخلي احد يعرف هي يمي حتى لا تصير مشاكل او يصير عليها شي  رحت لنفس الشيخ الي عقدلي على أيه جبته واصدقائي لگيتهم واكفين بالباب
تفضلو  يا هلا وميه هلا .....دخلو للاستقبال شويه نسولف ونضحك والشيخ يحچي
-أبني اني مو قبل فتره عقدتلك لو اني متوهم
-اي شيخنا اني
- بضحكه ..شنو لازم تريد تجدد
-ههههههه لا شيخنا. ...بس تكدر ادكول قسمه ونصيب  يعني شنو حرام
-والله يأبني حرام لو كانت مرتك ما بيها قصور
-شيخنا شرعا حرام
-لا
-لعد على بركه الله
عقدلنا الشيخ وسلمت على الولد  وطبيت جوه
شفتها
-الف مبروك
-الله يبارك بيك
امي كاعده على صفحه وبصفها أيه   الي مبينه وجها من البچي مورم  وامي كاعده يمها ما حچن شي درت على أيه
أيه إذا عاجبج تكدرين ترجعين لشغلج 
رفعت راسها بقله حيله وتعجب وگامت وراحت لغرفتها
يمه شبيها
-يا صلاوات من سئلت ،يمه كل شي ما بيها  غير انت جبتلها ضره
-يمممممه
-وغمه أخذ مريتك وروح ما الي خلك على يا ساعه ينهجم هل الباب علينا من وره سوايتك
عفتها ورحت ادري بيها إذا ما تعكر مزاجي ما ترتاح اخذتها للغرفه معدتها على الچربايه
اسمعيني يا بنت الناس هذا البيت بيتج صار  وحالج من حال أيه وسهام ما أريد مشاكل وانتي هم راح تتعودين عليهن
-صار  ....... ورده ورده راكان
-شبيها حال حال ولد سلوان وهيه صارت بنتي وبأذن الله ما اقصر وياها
-الله يخليك الهم ويحفظك ...بس سؤال ولو راح اضوجك
-على گلبي مثل العسل. گولي
-بخجل اريد اجيب ورده تنام يمي
-لا هاي ما مقبوله نسيتي انتي اليوم عروس  اني وصيت سهام تنومها يمها اليوم انتي حصتي ...ووووو
ثاني يوم الصبح  كعدنا غسلت واني ما افاركها لازم بيها ما بدي افارگها لحضه
-راكان بس خلي اغسل وجهي
-غسلي اني لازمج
-لا عفيه 
-دفعتني خفيف وتبتسم بخجل رجعت عليها وحضنتها من وره
-والله هسه اجي عمتي لو وحده من البنات وعيب
-عيب ليش حلالي وبكيفي
-يااااا سلوان وخررر 
شردت مني غسلت اني وكعدنا على الريوك نتريك ،أيه ما تتريك وينها
ام سلوان: ما الك شغل بيها مو بعد ما أذيتها تسأل عليها  ...وتباوع لوفاء
أندك الباب قوي بعد شوي وتتكسر وما نسمع غير
افتحوا الباب يله وينكم والله لنسويها دم .....يتبع
لا تنسون التصويت على البارت   
رانيا سلام