مراهقة وأربعيني ( مكتملة)

البارت الثالث عشر

مراهقة _و أربعيني
الكاتبة بنين
البارت الثالث عشر

    لا يدنيا شجاج ..

مالج وي المحبين جودة ..
       ولا محنه ..

ضيوف چنا ومحرب اعلينا الوكت ..
    وبطارف ديارچ گعدنا ..
       گاطعين گلوب ..

            حتى اعز الناس ..
من شاف الوكت مچفي ابتعد ماچنه منا..

ودروب العشگ عثرات وما واحد نتلنا ..

  ياعذاب جروحنا ..
يفت الگلب وصلة كفنا ..

  ويا حزن يعگوب ..
ربع الربع مايلگاش منه ..

حتى خوتنا انتهت ..وتشتت وانشل لبنا ..

         اخ يانچلاتهم ..
كل ما يجي النوم اعلى جفني وطيّرنه ..

  البارت الثالث عشر ........................

غضب : ولج حنان أمي.. مريضة

حنان : يمة أسم الله شبيهة

غضب : عدهة زائدة وهية معاندة ماتسوي عملية الة هنا بلعراق..

حنان : وتالي شلوون

غضب : باجر يجون.. ونسوي العملية هناا

مياسم : أني كاعدة بلمطبخ وسمعت الخبر لو الضحكة شكت حلكي شكك.. والله مو شماتة بس ما أدري.. يجوز من العذاب الشفتة منهة والكره.. والتفرقة.. هية خلتني ماطيقهة.. من حجيهة وتصرفاتهة.. ولا يكلك مرة جبيرة..

ضليت ساكتة.. بس فرحانة لأن راح أشوف بتي وثاني يوم.. صدك أجو وهية شايلة خشمهة.. ولا يكلك مريضة..
أخذوهة لدكتور وحجزو للعملية.. وأني مكابلة بتي وكاعدة.. حبيبتي مكيفة بيهة.. أدعي تضل يمي وماترجع تاخذهة مني..

صار يوم العملية.. وغضب وأخوه وأخواتة وياهة.. سوت عملية.. وضلت يوم بلمستشفة وطلعت.. والله حطيتهة بعيوني.. مو إلهة إل الله.. وبناتهة وياي.. وكاعدين يمهة هية شوية فكت مني.. أباوع لغضب.. شلون يباوع عليه من أعتني بيهة.. مرت الأيام وصار شهرين.. على عمليتهة

ورا الشهرين كاعدين وكالت..

ام غضب :يمه غضب اريدن أرجع لتركيا أخيك عندة شغل وانه معطلتة لأن اريدن اروحن وياه..

غضب : يمة ضلي هنا ألمن رايحه مو زين على عمليتج

ام غضب : لا يبعد امك كلشي مابية بس اريدن اروح عطلت اخيك عن شغلة

غضب :هاذهو شوكت احجز الكم

ام غضب : باجر

اخو غضب : انه احجز لا تكلف نفسك

غضب : لا يخوي ماكو فرق بينة

ام غضب : وانتي الثانية كومي حضري غراض فضة

مياسم : اني كاعدة ومتأملة تبقيهة يمي.. والله ما توقعت تاخذهة مني.. لمن كالت كومي حضر غراضهة.. طفرت مخترعة..