قلوب تائهة

بارت 16

الساعة10:30ص
امجد وصل المزرعة.. لقاهم فايرييين لأنو شركة الطعام لسا م وصلت والعزومة اصلا عشا بس الناس من العصر ح يبدو يجو لأنو العقد المغرب
امجد: انتو م وصفتو ليهم المزرعة؟
انس:انا وصفتها ليهم وقالو عرفوها
امجد: كدي دق ليهم
انس: بديني الرقم خارج النطاق
عبداللّه:شوفو شركة غيرها
احمد: م ظنيت نلقى لأنو بكون بالحجز
امجد: رامي بكون عندو كم شركة
فهد: اي بس م ينفع نوريهو
عبدالفتاح: ممكن نجيب اكل جاهز؟
انس: برضو الا نكون متفقين مع مطعم قبل كم يوم
عبدالفتاح: اها والعمل
عبداللّه:بجو بجو
احمد اتنهد وفهد عضا شفتو التحت بفكر في حل
امجد شال تلفون انس منو ومسا وقف بعيد دقا اداهو الرقم خارج النطاق دقا تاني نفس النتيجة بعد 6 ولا 7 مكالمات كدا التلفون دقا ب  رقم غريب
امجد اتردد يرد ولا لأ في النهاية ردا وكان المشرف بتاع شركة الطعام
المشرف: ألو انس.. اها انا اتحركتا من الخرطوم المزرعة وين؟
امجد كورك: اتحركتا؟ يداب؟ انتو م عندكم احترام للمواعيد؟!
المشرف: انس لو سمعتا مف داعي للكواريك حصلت لينا ظروف اخرتنا
امجد: ظروفك دي تبلها وتشرب مويتها.. الكلام دا م ينفع معانا نحنا عندنا عرس ومعازيم م لينا دخل بظروفك
المشرف: انس ان شاءالله ح نلحق الوقت لسا بدري
امجد: اي احسن تلحقو والا صدقني ح اطين عيشة الجابوك ثم ثانيا م بترد علي زفت تلفونك دا ليه؟ شايلو ليه لو الناس م بقدرو يصلو ليك؟
المشرف: تلفوني وقع في الموية واعتقد انو دي حاجة م بتخصك تقريبا
امجد: اي اي م بتخصني انا البخصني انو الاكل يكون جاهز في مواعيدو والا ح اوديك ورا الشمس
المشرف: لو سمحتا اديني انس انت مستحيل تكون هو امجد: انت وين هسي؟
المشرف: داخلين علي الجيلي..
امجد بقى يوصف ليهو المزرعة دانة كانت ماشة لفهد تسألو من حاجة وهي مارة كدا شافت امجد من بعيد بكورك مع زول في التلفون وقفت وهي بتعاين ليهو ،عقدت حواجبها من عصبيتو ولمن اخد وقت طويل وهو لسا بكورك اتحركت عليهو وفي اول خطوة ليها ختت رجلها اليمين في قزاز وطعنتها وقعت في الارض وهي بتكورك: امممممجد
امجد اتلفت عليها ولما شافها واقعة قفل  التلفون ختاهو في جيبو وجاها جاري.. الرجال بالجهة التانية كانو شايفين امجد بكورك في التلفون وفجأة قفلو وقام جاري
عبداللّه:اخوك دا مالو ي احمد؟قوم شوفو
احمد: طيب
واتحرك علي امجد بخطوات سريعة ووراهو فهد وانس
في هذة الاثناء امجد وصل دانة قعد علي ركبتو الشمال وهو بقول ليها بخوف: في شنو مالك؟
دانة دموعها 10/10وقالت:رجلييي😭
امجد بقق عيونو من منظر الدم الجاري من رجلها وقف علي حيلو وشالها وجري علي جوا ،احمد وانس وفهد كانو جاين عليهم فهد لمن شاف امجد شايل دانة مشا بخطوات سريعة اقرب للجري..
امجد دخل الفلة لقى حجة عواطف قاعدة في الصالة جرا عليها  ختا دانة جنبها وهو بقول بصوت مهزوز من الخوف: حبوبة دانة اتعوقت حجة عواطف: سجممي كر علي
وفي اقل من دقيقة الحريم كلهم اتلمو فيهم
عبير: بسم الله عليك ي بتي مالك؟
دانة بتبكي كنكشت في يد امجد بيدينها الاتنين امجد ختا يدو فوق يدينها وقال:دقايق بس استحملي.. اتلفت وراهو وكورك.. ألين اتحركي
ألين جات نازلة من فوق جري مدت ليهو علبة الاسعافات مكسها منها فتحها ومسك القزازة الفي رجل دانة براااحة جراها
رفع عيونو لدانة: وجعتك؟
دانة غمضت عيونها وهي بتبكي وصغطت علي  يدو الشمال  في دا فهد وانس واحمد جو داخلين
فهد: في شنو؟دانة مالا؟
عبير: رجلها معوقة شكلها وقعت عليها
دانة همست: برااااحة
امجد اداها نظرة سريعة ورجع يعاين للجرح وهو بقول: اسف
بقى ينضف ليها في الجرح براااحة كأنو في جسمو وكلهم واقفين بعاينو ليهم..
امجد اتأفأف وهو بخت قطعة قطن مليانة دم وبشيل وحدة نضيفة غيرها
فهد قعد علي رجلو: ابا يقيف؟
امجد وهو مركز: ثواني
وفعلا بعد ثواني الدم وقف لفاها ليها بشاش ووقف علي حيلو وهو بقول لدانة:خلاص خلصنا
دانة نزلت راسها وهي لسا بتبكي حجة عواطف حضنتها بحنان وقالت: كر عليك ي بتي
ودانة بتبكي بحرررقة يعني بكاها م بكى  زول جرح رجلو امها قعدت جنبها امجد اداهم ضهرو عشان يمشي
عبير مسكت وش بتها وقالت:مالك ي بتي؟
دانة من حضن حبوبتها اترمت في حضن امها وهي بتقول:موجوووعة
امجد لما سمع كلمتها دي فهم هي مالا اتلفت عليها لقاها مغمضة عيونها قوووي وبتشهق بلع ريقو لأنو عارف وجعها كلهم فهمو انها موجوعة من رجلها بس هو عارف انها موجوعة منو وهو كمان حالتو م احسن منها مشا خلاها وخلي الناس كلهم واقفين فوقها بس هي م محتاجة ليهم محتاجة ليهو هو بس…
شركة الطعام وصلت وبدو يعملو الاكل وشركة المناسبات قربت تخلص الشباب طبعا متابعييين التجهيزات وواقفين فوقا….