قلوب تائهة

بارت 44

عدت الايام..
امجد ودانة ورو سلطان الصورة وسطان مشا رباها شكلة لرب السما مع هادي وطردو من المصنع...

مهيب واسيل بدو يتكلمو بعد ما اسيل قرت الرسالة الفاضية كدليل علي موافقتها....
"الليييييييلة بكلم ليك امجد😁🤝🏻"...

بعد مرور عام..
في المستشفي..
ماسك يد ابوهو وخاتي فيها راسو وببكي..
اتذكر قبل سنة لمن ابوهو جاهو عشان يعتذر ليهو وهو م قبل الاعتذار وطلع خلاهم في بيتو مع ألين..
اتذكر قبل شهرين لمن امو قالت ليهو ابوك بين الحياة والموت وطالب يشوفك جنبو..
ابا ورفض رفضا قاااطعا انو يرجع لابوهو..رغم اعتذارات ابوهو وتوسلاتو رغم دموع امو..وكلام خيلانو وباقي العيلة معاهو..حتي ألين اتكلمت معاهو  وحاولت تخليهو يرجع لابوهو بس هو كان ردو الرفض القااااطع...كان مفتكر انو م محتاج لابوهو وانو خلااص بقى راجل بي بيتو وح يقدر يطلع من جلباب ابوهو..
لحدي قبل سااعة لمن دقو ليهو وقالو ليها تعال لقن ابوك الشهادة..خلى شغلو وجاهو جري..خلي زعلو وغرورو وكل مشاكلو مع ابوهو عشان يكون معاهو في آخر لحظات لكين... *الموت لا ينتظر احداً* وجا لقى الله اخد امناتو...
رفع راسو ودموعو 10 10 وقال بصوتو الزادت بحتو بسبب البكى:ابوي م تخليني..عاين لي هدا انا جيت..قوم خلينا نرجع سوا..اوعدك م ح ازعلك تاني..بس انت قووم..ابوي انا لسه محتاج ليك..ابوووووووووي

موتة الابو كسرة ضهر😪💔...

في حتة تانية..جات طالعة من جامعتها لقت امجد واقف ومتكل علي عربيتو...جات عليهو لقت ملامح وشو م بتتفسر
عاين ليها وهو ببلع ريقو وقال:خلصتي؟
دانة:اي..ليه؟
فتح ليها الباب:اركبي خليني اوصلك
عقدت حواجبها باستغراب:انت مالو وشك دا عامل كدا؟
امجد مسح وشو بيدو وقال:مف شي م نمتا امبارح بس
دانة ركبت وهي متسغربة فيهو..جايها الجامعة ليه؟! ووشو دا عامل كدا ليه؟!...استغرابها زاد لمن ركب ومسك يدها
عاينت ليهو بسرعة
عاين ليها وقال:عايزك تعرفي اني معاك..ح اكون اقرب ليك من وريدك
عقدت حواجبها باستغراب وقالت:في شنو؟!
امجد:مف شي بس عايزك تعرفي الحاجة دي
دانة:ووين اسيل؟
امجد ابتسم بالغصب وقال:اسيل بمسكها باليد التانية
عاينت ليهو بحقد وكانت عايزة  تفك يدها منو بس هو مسكها وقوي وقال:م تناتقي..الليلة بالذات م تناتقي
عقدت ليهو حواجبها وقالت:امجد وريني في شنو؟
م ردا ليها ودور العربية واتحرك..عاينت ليهو مسااافة تاني عاينت ل يدو الماسكها بيها..

وقف العربية قدام المستشفي..وعاين ليها
همست ليهو:بابا مالو؟!
امجد مسك يدها بيدينو الاتنين وقال:ارح نشوفو
عاينت ليهو باتسغراب..نزل وجا فتح ليها باب العربية..بلعت ريقها لمن جرا يدها ومسكها تاني..عاينت ليهو كأنها بتقول ليهو م عايزة انزل..نزلت بخطوات مُثقلة ودخلت يدها في يدو وقلبها في يدها التانية..لمن وصلت قدام غرفة ابوها شافت فهد طالع وبمسح في دموعو..عاينت لامجد كأنها بتقول ليهو فهد ببكي ليه؟!
العيلة كلهم كانو متلمين اول ما شافوها  رفعو راسهم..
ألين كانت حاضنة عبير عمتها لمن شافت دانة قالت ليها:عمتو..دانة جات
عبير رفعت راسها واول ما شافت دانة بقت تمنح:الله انا ي دانة..ابوكي فاااات ي داانة..غتاكي فاات ي بتي
دانة بتمشي خطوة علي امها وبترجع 3 خطوات..كيف يعني ابوها يمشي يخليها؟!
رمت نفسها في الارض جنب امها وقالت:ماما..بابا وينو؟
عبير قامت تكورك:احييي ي بابا..احي ي ابو اولادي..احييي ي سيد الرجال
حضنت دانة وهي بتكورك:ابوكي فاااات ي بتي..ابوكي روووووح
دانة حست براسها تقييييل وعيونها بدو يضلمو رفعت حواجبينها الاتنين عشان تفتح عيونها كويس..ورووو وقعت في الارض..امجد وفهد جوها جارين شالوها واسعفوها والدكاترة قالو جاها انهيار عصبي...
قضت 72 ساعة عن الوعي..مراسم الدفن كان تمت والفراش اترفع..
امجد بس واقف قدام غرفتها ولا حضر دفن ولا عزا..
سمع صوت حاجة بتقع من جوا غرفتها دخل بسرعة لقاها قاعدة في الارض شكلها كانت طالعة وم قدرت
جا رفعها:دانة
عاينت ليهو بعيونها الواقعين وقالت:بابا وين ي امجد؟
امجد بلع ريقو:الله يرحمو
ضربتو في صدرو بيدينها الاتنين:م تقول الله يرحمو..يعني شنو الله يرحمو؟!..بابا عايش بابا م بمشي يخليني
جراها عليهو وهو بقول:استغفري ربك ي دانة
اترمت في حضنو وهي بتقول:انا عايزة بااابااا..امجد وديني لبااااباااا
حاوطها بيدينو وبدا يقرا ليها السور الحافظها ويدعي الله يصبرها ويخفف عليها..بعد اكتر من ساعتين حسا بيها نامت..شالا ختاها في السرير لاحظ اطرافها باااردة مشا نادى الدكتور فحص ليها لقى عندها صدمة سكري..ركب ليها دربات وكدا..فهد جا وامجد وراهو الحصل..

فهد واقف قدام باب غرفتها وبتذكر الحصل امبارح...

قاعد في مصطبة بعيدة شوية كدا من بيتهم..ومنزل راسو..حسا بزول بقعد جنبو عاين لقاها ألين..رما نفسو في حضنها وهو ببكي
ألين ضمتو عليها وهي بتحاول م تهلي دموعها تنزل
فهد:مات وهو زعلان مني..مات من غير ما اودعو
ألين مسحت ضهرو:لا هو مات وراضي عنك
فكتو ومسكت وشو بين يدينها:فهد انت لازم تكون قوي..عشان عمتو ودانة..انت سندهم الوحيد في الدنيا
فهد:وانا البسندني منو؟
ألين:انا بسندك..عمري م اتخلي عنك..متأكدة انك ح تقدر تتجاوز وجعك وترجع تقيف علي كرعينك..عشان دانة وعمتو..لانهم محتاجينك
عاين ليها مسااافة..مسحت ليهو دموعو وباستو في جبينو مساااافة ولصقت جبينها في جبينو..غمضت عيونها وقالت:ارجع فهد الانا بعرفو..خليك قوي زي ما بعرفك
باس يدها مساافة بعدها ختاها في عينو اليمين وقال:خليك معاي ي ألين
حضنتو وهي بتقول:حاضر..ح اخليني معاك
حضنها شديييييييد كأنو بستمد منها القوة....

رجع لواقعو لمن سمع امجد بقول ليهو:دانة صحت
رفع راسو..مسح وشو ودخل ليها وهو مقرر انو ح يكون قوة وم ح يضعف..
اول ما شافتو بدت تبكي وهي بتقول:فهد بابا لسه عايش صح؟
جا عليها وهو بقول:بابا مشا حتة احسن من هنا..ومحتاج لدعانا حاليا
رمت نفسها في حضنو وهي بتقول:تاني م ح نشوفو؟!كيف ح نقدر من غيرو
فهد:الله كريم علينا ي اختي..ربنا يصبرنا علي فراقو
دانة كنكشت في قميص اخوها وبقت تبكي..بكت بكت بكت لمن حست روحها احسن..لمن حسن روحها ممكن تتقبل فكرة موت ابوها دي...

بعد مرور اسبوع...
دانة خرجوها من تالت يوم البكى وامجد ملازمها م خلااها ولا ثانية..في البداية كانت م بتاكل لكين مع اصرارو بقت تاكل شوية شوية...
في يوم بالمسا..
قاعدين في الطوطحانية..
هي مرفعة كرعينها وراقدة في حضنو وهو بحرك في الطوطحانية بكرعينو..
امجد:دوون
همهمت ليهو من غير ما ترفع راسها..اولا م عندها حيل ترفع راسها ثانيا هي مرتاحة شدييييد في حضنو..قرلو بسكن اوجاعها كلها..حتي دموعها م بتنزل في حضرتو..
ختا يدو في راسها وقال:انا بكرة نازل شغل
"اي اي شغل مالكم مخلوعين..امجد خلال السنة دي اتخرج واشتغل في شركة العين"
رفعت راسها سريع عاينت ليهو
امجد رجع ليها شعرها لورا اضانها وقال:دوامي لحدي 4 مسا..بجيك كل يوم بعد الدوام
عيونها اتملو دموع وقالت:ح تخليني انت برضو؟!
امجد:تؤ تؤ..ح اكون معاك بالتلفون..بعدين لازم انزل الشباب نزلو من رابع يوم البكى
ختت راسها في حضنو وقالت:م تبعد عني
امجد ضماها عليهو وقال:كلها شهر شهرين وتكوني معاي في بيتي
رفعت راسها عاينت ليهو باستغراب
ابتسم وقال: *بحبك ي دانة*
قلبها دقاا لمن سمعت كلمتو دي
امجد تابع:لا من الليلة ولا من امبارح...بحبك من قبل ما اعرف يعني شنو حب...قدر ما توجعيني وتجرحيني وتعذبيني..برضو بحبك..وحلال عليك عذاب قلبي الم دقا يوم لغيرك
دمعتها جرت من عينها اليمين
مسحها ليها وقال:كفاية مكابرة وكبرياء وزفت..كفاية نحسبها بعقلنا
ختا ليها يدها في قلبو وقال:شوفي دا؟..لاحظت لقلبو بدق بسررررعة..
امجد:دا ليكي وبنطق اسمك في كل دقة من دقاتو..دا كان تايه بعيد عنك..لكين خلااص لقى وجهتو
جراها ولصق جبينو بجبينها ونخرتو مع نخرتها وقال:كفاية تبعديني عنك..م قادر ابعد اكتر من كدا
مسكتو من لياقة قميصو وقالت: *بحبك ي امجد*
غمض عيونو وهو بتنهد وقال:آآآآه..الكلمة دي لي سنيييين منتظرها..سنين طويلة
دانة:الكلمة دي طلعت روحي وابت تطلع من خشمك
امجد:بحبببببببك
دانة  رمت نفسها في حضنو وهي بتقول:وانا كماااان بحبك...

سوري علي الاخطاء الاملائية😴🖤

#يُتبع...

mosha🌸✨