قلوب تائهة

قلوب تائهة...

بارت 43

اليوم القبل الاخير من الشهر الفضيل..
قُبيل الافطار..
قاعدة مع هديل بت عمتها سلطانة وبتعاين ليها..ديك بتتكلم وهي م مركزة معاها..بتفكر في المهمة الجات هنا عشانها دي..هل ح تقدر تنفذها؟!...
فاقت من شرودها علي صوت هادي بقول:اووو دندون معانا الليلة؟..وانا اقووول مالو البيت منور؟!
ابتسمت بالغصب وقامت تسلم عليهو وقالت:منور بناسو والله
هادي:اخبارك شنو عليك الله..يداب تجي علينا؟!
دانة ضحكت:تقول شنو بس مشغوليااات اللف
هديل:يحليلكم والله..عليك الله فهد كيف؟
دانة عاينت لهادي وقالت:كوويس حمدلله
هديل:هادي ورانا انو سرق من عمو قروش وعمو طردتو
دانة:م سرق..فهد مستحيل يسرق
هديل:اي انا كمان قلتا كدا بس بكون في سوء تفاهم
دانة:في مؤامرة في الموضوع م سوء فهم بس
هديل ضحكت:مؤامرة مرة وحدة؟!
دانة ضحكت:اي والله زي ما بقول ليك كدا..عاينت لهادي..وانا مصممة اكشفها
هادي اتنحنح:اقوم اتجهز للافطار انا..عن اذنكم
دانة وهديل:اذنك معاك..
فعلا شوية كدا وجاهم جاهز للافطار..قعدو فطرو وشربو عصيرهم وصلو وعملو قعوة عربية عشان دانة معاهم وكدا..
دانة رفعت تلفونها لمن حست بصوت رسالة
فتحتها لقتهاsms من امجد محتواها"دوون..اها الاوضاع ماشة كيف عندك؟!"
كتبت ليهو "كويسة ح ابدا بعد دا انفذ"
ردا ليها في نفس الدقيقة"تمام وريني الحصل شنو"
كتبت ليهو "حاضر"
امجد طبعا بعد كتب ليها بحبك..مسحها لأنو دا م وقتها..
دانة ماسكة التلفون قريب دقيقة منتظراهو يرد ليها لكين م ردا..ختت التلفون وقامت عشان تدخل كبابي القهوة المطبخ..اتعمدت انها تتأخر لأنة عارفة هادي ح يجي وراها..
فعلا جاها وقال:احلي يوم واحلي افطار واحلي قهوة
ضحكت وهي بتقول:م تبالغ
هادي:والله م ببالغ..شفتي ي دانة انا م بحب المجاملة نهاائي
دانة ضحكت:وانا م بحب الكتمة نهااائي..خلينا نطلع الجنينة ممكن؟
هادي طبعا ما صدق:طووالي
طلعو قعدو في الجنينة بقو يتونسو او بالاصح هادي برغي ودانة عاملة ليهو كدا😊
بعد شوية قالت ليهو:ثواني انادي هديل واجي
هادي:خليك انا بناديها
دانة:لا لا لا لا ارتاح انت انا بناديها
هادي:تمام منتظرك
ابتسمت ليهو ودخلت جوا..حمدت ربها انا لقت هديل وعمتها ماف في الصالة..شالت تلفونها عملتو صايلنت ودخلتو في جيب البنطلون تحت العباية..وطلعت لهادي
قعدت وهي بتقول: هديل شكلها نامت
هادي فرح:نوم العوافي..كويس ح ناخد راحتنا سوا
دانة ابتسمت ليهو وم ردت
بعد شوية قالت:جوالي وينو؟ شفتو؟
هادي عقد حواجبو:لا لا يمكن جوا شنطتك
دانة:لا لا شنطتي انا خليتها في غرفة هديل ونزلتو معاي
هادي:طيب خليهو هسي بعد ندخل جوا نفتشو
دانة وقفت علي حيلها:لا لا لا..بابا احتمال يدق لي في اي لحظة عشان ح يجي يسوقني
هادي طلع تلفونو:طيب خليني ادق ليك فيهو وشوفيهو جوا
دانة قعدت في الكرسي بتعب:افف ح ارجع جوا تاني؟
هادي دق ليها ومدا ليها تلفونو وقال:خليكي هنا انا بشوفو ليك جوا
دانة مسكت التلفون:طيييب
مداهو ليها واتحرك علي جوا عاينت ليهو لمن دخل..بعداك اتحولت في كرسيهو عشان لو جا طالع تشوفو..نورت التلفون لقتو مسجلها ب "داني♥️"
ابتسمت بسخرية وبدت تفتش التلفون...فتشتو كلللللو م لقت اثر ل حسابو في البنك..لاحظت المكالمة انتهت..دقت تاني ورجعت تفتش..واساسا التلفون بهز في جيبها..
قريب 10 دقايق هي بتفتش في تلفونو وهو بفتش في تلفونها جوا..بعد شوية جا طالع..اول ما شافتو جاي..طلعت من التطبيقات الدخلت فيها وفتحت المكالمة..
هادي:م لقيتو والله ي دندون لكين اصلي واجي افتشو ليك
دانة مدت ليهو التلفون:طيب م مشكلة
هادي دخل التلفون جوا جيبو:لو خالي جاك م تمشي الا انا اجي
دانة:طييب
هادي:يطيب خاطرك
واتحرك علي البوابة عشان يمشي الجامع يصلي التراويح..
دانة تمتمت:بالله انت بتعرف الله؟!
اول ما طلع..طلعت تلفونها من جيب البنطلون ودقت لأمجد وهي متمنية انو م يكون مشا الصلاة وفعلا هو كان متوضي وخلااص داخل علي الجامع..
ردا اول ما شاف مكالمتها ب:اها لقيتي شي؟
دانة:لا م لقيت..فتشتا جوالو كلوو م فيهو شي
امجد:ح يكون خاتي حسابو وين يعني؟
دانة:مدري..انت خاتي حسابك وين؟
امجد:في تلفوني..لكين ااااي زمان كنتا خاتيهو في الابتوب بتاعي
دانة:تفتكر هادي برضو ح يكون خاتيهو هناك؟
امجد:اي احتمال كبير..حاولي تصلي للابتوب بتاعو لو ماف خطورة عليك
دانة:طيب طيب بحاول
امجد:يلا انا داخل اصلي
دانة:طيب ادعي لي القى الحساب
امجد:ان شاء الله ي دانة ي بت عبير عمتي تلقي الحساب وتلقي اي حاجة نفسك فيها
دانة لا شعوريا:يعني القاك؟
امجد:شنووو؟!
دانة طق قفلت الخط..امجد ابتسم ودخل التلفون جوا جيبو ودخل يصلي...