قلوب تائهة

بارت 34

بعد مرور خمسة ايام...
راقدة في سريرها وبتعاين للسقف..بتتذكر الكلام الابوها قالو ليها امبارح بعد رجعو من جمعة العيلة...
عبدالرحيم: فهد ود خالتك عبير دا قال عايزك..وانا صراحة موافق عليهو وعاجبني شديد بس قلتا ليهو الراي الاول والاخير راي العروسة...
هه..هي العروسة؟! دقيقة تفهمها وحدة وحدة..فهد..اتقدم ليها..فهد عايزها..وكلم ابوها...
فهد..
فهد الواحد دا؟!
فهد البحب ألين؟!...هي وألين طبعا كانو عارفين انو انس ح يتقدم لألين يوم الجمعة..الي هو امبارح..لكين دقيقة دقيقة فهد اتقدم ليها؟! لييييييه؟! عشان يعرسها...طب ح يعرسها كيف وهو بحب ألين؟!...
دا كان تفكير ران البدور جواها..مع انو رقدتها بتوحي ليك انها مستكيييينة بس جواها جايط جوطة السنييين..وكيف م يجوط وفهد اتقدم ليها..هه فهد الهسي الاسبوع الفات كان بتتكلم معاهو في موضوع حبو لألين؟! فهد البتشوف عيونو بلمعو كل م تذكر قدامو اسم ألين بس؟! ياهو فهد دا ولا واحد غيرو...
ضحكت بسخرية وقالت:جنيت شكلك ي ود دبي
فرتلب قعدت علي حيلها شالت التلفون ودقت ليهو...توووت توووت...عاينت للتلفون بخلعة..هه فصل في وشها...لا لا لا لازم تشوف ليها صرفة مع جنونو دا...دقت تاني وفصل في وشها تاني..اتحمقت اكتر ودقت للمرة التالتة..المرة دي ردا من اول جرس
م ادتو فرصة يتكلم وهاجت فيهو:فهد دا شنو العملتو دا؟..انت جنيت ولا حاجة؟
ردا ليها بكل برود:ران..انا شغال حاليا نتلاقى لمن افضى
ران سكتت مسافة..هو مالو بارد كدا الشي دا؟
فهد:الوووو
قلبت عيونها:نتلاقى وين انا م مشيت الجامعة الليلة؟
فهد:م حنك بمر عليك في بيتكم..اساسا لازم نقعد ونتكلم
ران:زابت
قفل الخط..وهي جدعت التلفون بزهج...افففف نتكلم في شنو؟! فكرت تدق لألين بس تاني اتذكرت انها ح تكون في محاضرة...تصدقو بالخلعة م مشت الجامعة؟!...

في جامعة ناس امجد..قاعد وبتكلم بالتلفون مع عبير
عبير:اها
امجد:اها شنو؟..مشت بس وتاني م شفتها ل الليلة
عبير:وامبارح لمن مشيتو ليهم؟
امجد:انا دخلتا اتغديت بس وطلعتا..م مشيت علي جوا وهي م طلعت لبرا
عبير حركت راسها بتفهم:كالعادة..بتتهرب
امجد حكا راسو وم ردا
عبير كوركت:لا بالجد كنتا حاسي بشنو لمن قلتا ليها كدا؟
امجد:م عارف ي عبير م عارف
عبير:ع فكرة يعني انت اتفشيت فيها زعلتك وهي م عندها ذنب
امجد اتنهد:عارف ي عبير..قولي حاجة جديدة استفيد منها
عبير:دقيقة..اقول ليك حاجة جدييييدة اكتشفتها هسي وانا بتكلم معاك
امجد باهتمام:هااا
عبير:انت واحد سايكوبش وبس يعني
"مريض نفسي"
امجد بزهج:يخ ابوووك
عبير كر كر كر ضحكت:صدقني كل ما استوعبت الحاجة دي اسرع بكل افيد ليك
امجد:انتي م لاقتيها قريب؟
عبير:يوم الخميس لاقيتها
امجد:اها وكانت كيف؟
عبير ضحكت:عادية ي امجد..يعني اكيد م ح تتبكي اول ما تشوفني وتحكي لي
امجد ضحك:بتعرف تتداري وجعها
عبير:كلكم كدا..شكلو عندكم وراثة في العيلة
ضحك:انتي م تتكلمي عن المدارة
عبير:ok..Ididn't
"اوكيييه..م ح اتكلم"
امجد:تمام ح اقفل لأني داخل محاضرة
عبير:زابت يلا
امجد:يلا
قفل واتأفأف...يعني ينفع كدا؟! يمرق من مشكلة مع اسيل يخش في مشكلة مع دانة؟!...