قلوب تائهة

بارت 35

من تاني يوم نزلو السوق وبدو يشترو في الحاجات..الحريم الكبار بشترو ي الريحة وكدا..ألين وران ومعاهم نسرين بشترو في الشيلة..
الاسبوع التاني نسرين قعدتهم في الدخان...وطبعا غلبوها شديد..ألين دي بتقعد دقيقتين وتقوم توي وي..وران بس صارة ليهم وشها..
الاسبوع التالت دخل..دوقو الريحة وجهزو الوضع لأنو الاسبوع الأخير ح يكون عبارة عن حنن بس..

في يوم زي الساعة 10 صباحا كدا..نسرين وشهد وألين وران قاعدين في العريشة الورا بتاعة ناس ألين..فيها حفرة الدخان وكدا..
نسرين ولعتو ليهم وقالت:يلا ي ألين قومي
ألين م اشتغلت بيها لأنها كانت بتخلط مع انس..طبعا الليل والنهار التلفون في اضانها..
نسرين ختت يدينها في نصها وقالت:أليييينوووو
ألين اشرت ليها بيدها نظام اصبري وقامت طلعت من العريشة..
نسرين:سجمي البت دي جنت
شهد ضحكت:دا اخوك م خاليها في حالا
نسرين ضحكت:اخوي بعد قلة ادبو دي كلها بحححبب الجيهة والكبرتة
شهد كر كر كر ضحكت
نسرين:كدي اقوم اجيبها
ران وقفت علي حيلها:خليها انا بقعد اول
نسرين:عاد مرررة انتي
ران ابتسمت ليها وم ردت...بالجد حاسة بالغربة وفاقدة وعد اختها...
شهد راقبت ران وهي بتقعد وقالت:رانوه..مالو وشك مخطوف كدا؟
ران غمضت عيونها وفتحتهم:فترانة الايام دي
نسرين:دا عدم الاكل..انا قلتا ليك الدخان دا عايز اكل لكين م بتسمعي الكلام
"هدى كيفتمام😂🤝🏻"
ران م ردت ليها..سرحت وهي قاعدة في الدخان..ح تعرس..الاسبوع الجاي..اتقبلت شووية كدا فكرة انها تعرس..لكين حتة انها تعرس فهد دي اصلها م وقعت ليها وكل ما تتذكرها بجيها وجع بطن..
ليهو اكتر من 3 يوم م اتكلم معاها..اساسا دق ليها زي مرتين ولا تلاتة بس عشان يسألها من حاجات مهمة..في حين انو انس 24 ساعة بتكلم مع ألين حتي لمن مشو يسترو الشيلة كان متابع معاها اول بأول..افف من الدخلت نفسها فيهو افف...

بدا اسبوع العرس وبدت معاهو الحنن..كل يوم في صالة..من حنة فهد لحنة انس..مع انو فهد رفض يعملو ليهو حنن كتيرة بس  وافق تحت اصرار انس..
الليلة الاربع..والعرس الجمعة..
انس وهو سايق العربية بتكلم بالتلفون:اي ي وليد فهمتا فهمتا..يعني بس اجيب الظرف الحيديني ليهو رامي؟..طيييب طيب..يلا في رعاية الله
وقف العربية قدام فلة عمو عبدالرحيم..فتح تلفونو رسل لألين..
"انا قدام بيتكم..قلبك م قعد يدق؟!"
ردت ليهو سررريع لأنها كانت اونلاين
"قعد يدق والله تصدق؟♥️"
انس "😂😂😂"
ألين "جيت ليه؟!"
انس "صح قلتا ليك وليد عايز اوراق وعد بتاعة الجامعة؟"
ألين "ايوة"
انس "بس جيت اشيلهم عشان ح ارسلهم ليهو"
ألين "اهااا"
"اوكيه"
انس "اي♥️"
"كدي اخش اشيل وبدق ليك"
ألين "طيب حبيبي♥️♥️"
انس رسل ليها قلوب وقفل الواتس..لاحظ انو قاعد ليهو قريب 10 دقايق في العربية اتنهد ونزل...واحتمال تأخيرو دا كان في صالحو او يمكن العكس...

فوق..
قبل دقايق..
ران بتتكلم بالتلفون:حاضر ي نسرين جاية
نسرين:بتقدري تجي؟..اجيب العروكة واجيك؟
ران:لا لا م بحتاج بجيكم انا
نسرين:تمام منتظرنيك..
ران:ألين اتعركت؟
نسرين:اي  هدي ليها خلصت
ران وقفت علي حيلها:تمام جاياكم
اساسا كانت لتبسة عباية وجونتات وشربات جدعت تلفونها في السرير..اصلا مف زول بدق ليها..وختت الطرحة في راسها ونزلت..