MI KU BO

Nen Tudu É Mar Di Rosa

♥️MI ku BO ♥️

📙Capítulo 8
📙Género:Romance/Drama
📙 Autor:Théo Gael ✍️

Pora, és alegria ki N teni na petu e grandi, akridita ma amor izisti y nos amor e prova mas ki sertu.

Ângela y Benício djes pasa 2 mês djuntu, txeus mumentus , djes anda tudu praia y es vivi sis romansi sima és kre.

So ki dia Di bai dja da.

Ângela manxi angústiadu, kel minina mimada ki ta brilha tudu kantu oji sta ku un ar abatidu y tristi.

- prima e manhan ne?
- sin prima e manhan? Kuze ki N ta fazi? Mo ki N ta da B es notisia?
- bu ka fla-l nada inda Inton,? Benício ta fika arazadu prima, bu ten ki fla-l mo.

- prima nha korason ka sta kebi dentu mi, N ka kre perdi algen ki sa ser tudu pa mi, finalmenti N inkontra algen ki N ta ama y ta aman, Pmd ki N ten ki sipara del? Keli ka justu prima.

Ângela sta devastadu y si laguas sta sufokal, e txoru ki ka ta kaba y dor ki Ângela ka sta podi suporta el só.

- prima, Ko txora nau, vida e si y si realmenti nhos tá ama kunpanheru inda distinu ta poi nhos na kaminhu kunpanheru.

Carla konsola Ângela y linpa si lagua ti ke kalma.

- tenta fazi bu dia oji ser inkrivel y nhos fazi un dispidida ki nhos ka ta skesi, aproveita nha flor.

Ângela prepara tudu, spera Benício txomal pés inkontra, és konbina di bai Santiago  pés bai deta bera mar y pasa un noti romantiku. Ângela sis pais é di Santiago y e gosta di klima di lá.

komu era si últimu noti na Cabo Verde e kria pasaba kel tenpu ku amor di si vida y na kau ke nasi.

Ângela sta aprensiva pé odja Benício mas e ka kre mostra si ar tristi.

Benício txomal, fla-l si dje sta pés bai, dje konsigui un amigu ki sta na porta pa lebas.

Silva e un grandi amigu di Benício e ten karu y senpri es ta djuda kunpanheru, amizadi e si, un tá djuda kelotu.

17h di tardi es da kaminhu pá Santiago, Benício sta felis, kontenti di sta bai pa un noti romantiku, kuza ke odja só na filmi y na livru.

- N ta akridita na nos! Benício diklara pá Ângela.

Ângela fika ku lagua na odju mas é ka txora pé ka kaba pa ku si noti.

Djes txiga Santiago, Benício kuida di Ângela tenpu interu, sima ke un pai ki sta kuida di si fidju.
Silva odja y fika adimiradu ku sis kunplisidadi, amor realmenti sta na pikenus ditalis y txeu atitudi.

ES bai pa kaza di família  Ângela, és konprimenta tudu algen, fala un poku y dipos és bai pa kuartu diskansa, dipos és sai pes konxi zona.

21h és janta dipos és sai pés bai pa mar fazi sis noti. Kantu es txiga és ruma sis kuzas tudu.

Ângela mesmu tristi é konsigui disfarsa, é kria un dia perfeitu.
Afinal é meresi, és kriatura pasa pa tantu kuzas ti ke sta ser felis, dexal aproveita si filisidadi só mas 12 h.

ES tivi un noti lindu, inkrivel, és kanta, és ri, és Beja y és asenti ses xama entri sexu y amor. Dia lindu, lua riba des ta lumias, skrela guia tudu sis toki. És durmi kantu sis korpu kansa.

Kazal korda sedu, Ângela manxi tristi  y Benício xinti ma Ângela ka sta sen por setu ku pensamentu na sis aventura.

- Mor kuze ki sta pasa? Kuze ki bu teni, bu ka gosta di nos noti?

-B, é ka isu nau, N adora nos noti, bu Dan tudu karinhu y és foi nha midjor noti, y sta na bu ladu e kuza maravilhozu pa mi.

-Inton kuze sa pasa ku sta tristi?
- e Ki N teni algu pan konta-u!! Ângela ka aguenta y kaba pa Txora.
- é kuze Ângela. Benício komesa fika transformadu.
- B, N ta bai PT oji di noti ! Mas txoru.

- modi, kuze?
-bu ta bai PT manha? Pmd ku sa fla-m só gosi?

Ângela ka sta konsigui fala, é só txoru,. Benício tanbe lagua dja komesa sai y lugar di felisidadi torna tristi.
Benício perdi fala, komu e sta xatiadu e prefiri silênsiu.

ES labanta és ruma tudu kuza y és Ben kaza mudu mudu, és txiga kaza és atxa djentis tudu na meza és konprimenta y és bai pa kuartu.

Benício txoma Silva pa bai buskas kelora, Silva ka intendi nada mas é ka kria kazu.

ES da rostu pa praia, ningen ka fala nada kaminhu interu, klima diferenti di kantu es Ben. És txiga praia, Benício dexa Ângela na kaza, bai pa kaza el ku Silva.

- e ta bai oji noti Silva! É  fla-m só oji yau. Pmd ki nada ka ta da sertu ku mi mo? Benício lagua ta disprinda.

- Ko fika asin nau nha manu, e gosta di bo mo,. Nhos e perfeitu pa kunpanheru. Nunka N odja kazal ton bunitu sima nhos. Até Dan siumi di nhos kantu N leba nhos. Lol

-pmd ke ka fla-m nada, e dexa-m akridita ma inda nu tinha mas dia djuntu.

- tanta intendel men, talves e sa sufri mas di ki bo, talves e ka kria pa nhos pasa pa isu. Superason é difisel, mas kela ka ten ki ser fin pa nhos.
Nhos podi luta pá nhos fika djuntu you. Ko dexal bai sen sabi mo ta luta pá el.

Benício sta disorganizadu, mundu kail na mo y e ka podi ku si pezu. Amor realmenti é forti, é podi faze-u ri ó tra laguas di bu odju y bu alma.

Benício dixi di karu y entra kaza, e bai pa kuartu y si kama e si saku pankada.